Natëtëngëd Tung Mga Taung 144,000 Ang Naita Nang Pinagmarkaan Tung Mga Kikilayën Nira (7:1-8)
7
Pagkatapus tia,
may naitaw rang mga angil ang ëpat ang bilug ang pamagkantu-kantu tung bilug ang kaliw̓utan.
Masig̓awid tung ëpat nga palëtan ug̓ud andang pisan ay mag̓ëyëp tung katanëkan ubin tung tëëb ubin tung maskin unu pang ayuay.
2 Pagkatapus may naitaw si kang sam bilug pang angil ang pagpaabwat da tung langit ang duun manliit tung sag̓iid ang ampir tung lëlpakan yang kaldaw.
May ëkël nang nag̓ipagmarka tung mga tauan yang Dios ang unaynay kang lag̓i yang kabui na ug̓ud indi ra mangaunu pa kung ipaita ra nganing yang Dios yang kasisilag̓ën na tung kadaklan ang mga tau.
Numanyan nagkëkëndalën da tung mga aruman nang atiang ëpat ang pinamakdulan da yang Dios ta kagaëman nirang magdiadu tung katanëkan may tung tëëb.
3 Mag̓aning tung nira,
“Indi mi ra kanay palpasan yang mga palët ang atiang mamagdiadu tung katanëkan may tung tëëb may tung mga ayu mintras indi pa nag̓amarkaan yamën tung mga kikilayën nira yang mga taung pamagpaturuw̓ulun tung Dios ang ya kay pangag̓alënan ta,”
ag̓aaning.
4 Numanyan pagkatapus ta pagmararkaën nira,
nagngëlu ra kung ya pa ag̓arig kadakël yang tanan ang mga taung pinagmarkaan da.
Sang gatus may ëpat ang puluk may ëpat ang liw̓u nga tauan (144,000)a.
Tanira mga kanubli yang mga ana ni Jacob ang sam puluk may durua ang yay namamalana tung nasyun ang Israel atiing tukaw.
5-8 Kada sam bilug tung pinalaana yang mga ana ni Jacob ang atii,
salëgsang puluk may duruang liw̓u yang mga kanubli nirang pinagmarkaan (12,000).
Yang may mga kanubli,
ya ra taang ti Judah,
ti Ruben,
ti Gad,
ti Aser,
ti Neftali,
ti Manases,
ti Simeon,
ti Levi,
ti Isacar,
ti Zabulon,
ti Jose,
may ti Benjamin.
Natëtëngëd Tung Mga Taung Buntun Ang Nangapasar Da Tung Pinitinsiang Pinakamalbat (7:9-17)
9 Pagkatapus pagtëlëngu,
unu pay naitaw,
kung indi,
may mga taung buntun ang pisan ang indi ra ëngëd kayanan ta bilang.
Yang pinanliit-liitan nira maskin unu pang nasyunay,
maskin unu pang bitalaay tung bilug ang kaliw̓utan.
Yang mga taung atia tumalungaan tung siang bulawan may tung pag̓aningën ang karniru.
Yang suut nira purus aw̓ël ang langkuy ig makukulit.
Masigpëg̓ës ta paklang ang nag̓ipag̓awës-awës nira ang para mamagpailala ra yang kasadyaan nira ang tanira namandëëg da tung pagkuruntraan nira na Satanas.
10 Numanyan namagkëkëndalën da tanirang mag̓aning,
“Anday dumang pinangapunglan yang kalibrian ta,
ultimu ra ilëm yang Dios ang pag̓atuuan tang pagkarung tung siang bulawan durua yang pag̓aningën ang karniru,”
ag̓aaning.
11 Pagkatapus yang tanan ang mga angil namansilikus da tung mga mamaëpët ang duruang puluk may ëpat may tung ëpat ang nag̓abui may tung siang bulawan duun tung kakngaan nirang tanan ang pagkatapus diritsyung namagparagpa tung katalungaan yang siang bulawan ang namagtuu tung Dios ang yag kakarung asan.
12 Mag̓aning tanirang namagtimalës tung mga taung atiang buntun,
“Tamang pisan yang inaning ming atia.
Yang Dios ang naang pagpaturuw̓ulunan ta,
ya ka man ang pisan ay bag̓ay ang dayawën ta natëtëngëd tung kadëngëg̓an na may tung kawawayangën yang kinaisipan na may tung puirsa yang paggaraëmën na ang yang pagkadios na inding pisan mapasiring-siringan.
Dapat ang yay pirming pasalamatan ta tung anyang anday katapus-tapusan.
Maning tia,
magkatamang pisan ang yay buatën ta,”
mag̓aning.
13 Pagkatapus yang sam bilug ang pagpakigmaëpët,
ya ray nagtalimaan tung yëën ang mag̓aning,
“Tinu pa w̓asu yang mga taung atiang pamagsuut ta aw̓ël ang langkuy ig makukulit?
Ay pa w̓asu mamanliit?
Nag̓askëan mu?”
14 Mag̓aningaw tung anyang minlës,
“Inay,
apu.
Indi nag̓askëanu.
Yawa siguru ay nag̓askë.
Pakdëkay ka.”
Maning tung yëën ang tuminuw̓al,
“Yang mga taung atia,
ya ra yang mga taung nangasalapay ra tung puirting pandëëg-dëëg tung nira ang indi ra ka ëngëd namamalpas tung ni Ginuung Jesusb.
Kung tung pagburunakën pa ta aw̓ël,
ipinalimpiu ra nira yang mga sadili nira tung ni Ginuung Jesus atiing pagtalig nira tung anya ang yay nagpaturuk yang dug̓u na natëtëngëd tung nira ang katulad ka tung sasang karnirung idinasag.
15 Kapurisu ya ray natëngëran na ang tanira tumalungaan da tung siang bulawan ang pag̓akarungan yang Dios ig pamagtuu tung anya kaldaw law̓ii duun tung pagtuuan tung anyac,
ig yang pagkarung asan ya ray magmanada tung nira ang tanira maning pa tung palandungan na rang pisan.
16 Purisu indi ra ëngëd mangapasar ang uman ta pasuw̓uk may pakanal,
indi ra ka ëngëd matamaan ang uman yang puirting kinit yang kaldawd.
17 Kipurki naang pag̓aningën ang karniru tung tëpad yang pagkarung tung siang bulawan,
yay magpadag̓ën-dag̓ën ta maayën tung nira ang katulad ka tung sasang manigpastur ang pagpadag̓ën-dag̓ën tung kaayëpan nange yay nag̓amanguluan na ang para kaw̓utun da nira yang mga sungkuk ta waing bui tung kabukiranf.
Dispuis yang Dios yay magpamlëk tung tanan ang pinagpungawan nira ang yang kaalimbawaan na maning pa tung ya rag piiray na yang tanan ang mga luuk nirag,”
ag̓aaning duun yang maëpët tung yëën.