Nag̓ipangukab Da Yang Pag̓aningën Ang Karniru Yang Ënëm Ang Ikinula Tung Kasulatan Ang Yag Lululun (6:1-17)
6
Numanyan naitaw ra yang karnirung pag̓ukab tung primirung ikinula tung pitung ipinangula tung kasulatan ang naang yag lululun.
Pagkaukab na,
may nagngëlung sam bilug tung ëpat ang atiang nag̓abui ang yang busis na maninga duldul.
Mag̓aning ang pagbitala,
“Ala,
lumuaa ra,”
mag̓aning.
2 Pagkatapus pagtëlëngu,
unu pay maitaung luminua,
kung indi,
yang sasang kabayung makulit yang kulay na ang yang pagsaay asan may ëkël nang panak may mga dëldëg.
Dispuis pinakdulan yang Dios ta isuklub nang bulawan tung kulu na ang yay pagpailala rang lag̓i ang tanya mandëëg.
Pagkatapus dayun dang naningayaw ta gira ang para pandëëg̓ën na ra yang tanan ang mga kuntrariu na.
3 Numanyan,
pagkaukab si yang karniru yang yadwang ikinula tung kasulatan,
nagngëlu si yang pangyadwang nag̓abui ang pagbitala ang mag̓aning,
“Ala,
lumuaa ra.”
4 Pagkatapus pagtëlëngu,
unu pay maitaung luminua,
kung indi,
yang sam bilug sing kabayung apuy-apuyan yang kulay na ang yang pagsaay asan tinugtan yang Dios ang magtukud ta mga gira tung intirung kaliw̓utan ang para magparatayan da yang mga tau.
Purisu pinakdulan ta ispadang abwat.
5 Numanyan,
pagkaukab si yang karniru yang yaklung ikinula,
nagngëlu si yang pangyaklung nag̓abui ang pagbitala ang mag̓aning,
“Ala,
lumuaa ra.”
Pagkatapus pagtëlëngu,
unu pay maitaung luminua,
kung indi,
yang sasang kabayung lag̓ëm ang yang pagsaay asan may nag̓abitbit nang timbangan ang nag̓ipagtimbang tung mga pamangan.
6 Pagkatapus midyu tung nagngëlaw si ta busis ang duun agliliit tung kakngaan yang ëpat ang atiang nag̓abui ang pagbitala ang mag̓aning,
“Kumus may panuw̓uk ang kumaw̓ut tung kaliw̓utan ang puirti-puirti,
purisu mag̓abwat dang pisan yang prisiu yang trigu may yang sibada.
Purisu yang kinaldaw yang sa nga tauan kung ialang na ta arina yang trigu,
duruang pulak ka ilëm yang maëklan na.
Kung arina ta sibada,
ënëm ang pulak ka ilëm yang maëklan na,”
mag̓aninga.
Pagkatapus dayun dang nagkalalangan tung pagsaay ang mag̓aning,
“Ëëy,
indi mu ra ilëm tandëg̓ën yang mga kaoliboan may yang mga kaubasanb.
Muya pamaalën da ka yang mga pruduktu na,”
mag̓aning.
7 Numanyan pagkaukab si yang karniru yang yaëpat ang ikinula,
nagngëlu si yang pangyaëpat ang nag̓abui ang pagbitala ang mag̓aning,
“Ala,
lumuaa ra.”
8 Pagkatapus pagtëlëngu,
unu pay maitaung luminua,
kung indi,
sasang kabayung lësparën ang yang pagsaay asan ti Kamatayën.
May pagdasun ka tung anya ang ya ra yang pag̓aningën ang ti Hadesc.
Tanirang durua linugtan yang Dios ang mamagpangimatay tung mga tau.
Kung ipabtang ta tung ëpat ang parti yang kinadakël yang tanan ang mga tau tung bilug ang kaliw̓utan,
yang sam parti yay magkarapatay nira.
Yang pag̓irimatayën nira duun ipapanaway nira tung gira may tung panuw̓uk may tung mga larung panilig may tung mga ayëp ang talunun ang mairisëg.
9 Numanyan pagkaukab si yang karniru yang yalimang ikinula,
unu pay maitaw,
kung indi,
ya ra yang mga ispiritu yang mga tumatalig ang pinangimatay ang duun tanira tung kakayan yang midyu tung lamisaan ang dakulu ang darasag̓and tung pagtuuan duun tung langite.
Yang ipinangimatay tung nira ay natëtëngëd tung pagparakaw̓utun nira yang bitala yang Dios ig tung pag̓urubligarën nira ang ultimu ilëm ti Jesus yang nag̓atingara nirang may kalalangan tung nira.
10 Numanyan namagkëkëndalën dang mag̓aning,
“Dios ang makagag̓aëm ang durung pisan agkasagradu,
nag̓atalig̓ana yamën ang magkërëng tung mga pangaku mu.
Basu,
mabuay pa ka ëngëd yang ëlat yamën baklu mu ra sintinsiaay yang mga taung atiing namagpangimatay tung yamën ang taniray pandilëman mu yang mga dug̓u yamën?”
mag̓aning.
11 Pagkatapus anday dumang binuat yang Dios,
pinampasuutan na ra ta aw̓ël nirang langkuy ang makukulit.
Pagkatapus dayun na rang inaning ang indi ilëm mamagmataka,
kung indi,
mamag̓ëlat da ilëm kanay ta gësyëng uras ang asta makumplitu ra yang kinadakël yang mga putul nirang pamagpaturuw̓ulun ka tung anya ang kumpurming itinipu nang irimatayën pa ka ang katulad ka tung nira.
12 Numanyan naitaw si yang karnirung pag̓ukab si tung yaënëm ang ikinula.
Pagkaukab na,
nayëgyëg da yang kaliw̓utan ta maktël.
Yang kaldaw nangiklëp dang pisan.
Yang bulan nanipula rang midyu tung dug̓u.
13 Asta yang mga dumakël,
nagkarataktak dang nagkarabugsu tung katanëkan ang yang kaalimbawaan nira maning pa tung burak yang igus ang ilaw pa ang pagkarapulak da kung sampiën da nganing ta palët ang maktël.
14 Pati yang langit naparëng da ka ang yang kaalimbawaan na maning pa tung amëk ang linulun dang ingkëlan.
Asta yang tanan ang mga bukid may yang tanan ang mga pulu,
gulping pinampaliit da tung dating nabtangan nirang ipinampauman.
15 Pagkatapus yang tanan ang bëlag̓an mga tumatalig tung ni Jesus tung bilug ang kaliw̓utan mag̓ing mga adi man mag̓ing may mga katëngdanan man mag̓ing mga iniral man mag̓ing mga manggaranën man mag̓ing mga darakulung mga tau man asta yang kadaklan ang mga tau,
mag̓ing turuw̓ulun man kag bëlag,
luw̓us dang namansitaluk duun tung mga lëyang ubin tung mga sirung yang mga yuntu tung mga bukidf.
16 Pagkatapus dayun dang namagtag̓am ta lalang tung mga bukid may tung mga yuntu ang namansianing,
“Aay,
tambakayami ra ilëm numyung italuk ang para indiami ra ilëm maita yang pagkarung tung siang bulawan ig indiami ra ka sakpën yang kasisilag̓ën yang pag̓aningën ang Karnirug!
17 Kipurki kinaw̓ut da yang uras ang makakaëlëd ang pisan ang ya ray ipagpaita nira yang kasisilag̓ën nira ang andang pisan ay masarang ang magsuspindi,
may sam bilug,”
mag̓aning.