Natëtëngëd Tung Kasulatan Ang Yag Lululun Ang Anday Mapagsulw̓ad (5:1-14)
5
Pagkatapus may naitaung kasulatan ang yag lululun ang nag̓apëgsan yang pagkarung tung siang bulawan tung kalima nang tuu.
Yang kasulatan ang naa sinulatan tung duw̓ali may duw̓ali pagkatapus kinula ta taru ang pitung nagnurunut.
2 Pagkatapus may naitaung sasang angil ang maktël ang durug tunul yang busis nang mag̓aning,
“Tinu pa kayay magkabag̓ay ang magpangukab tung ikinula tung kasulatan ang para masulw̓ad da?”
ag̓aaning.
3 Piru anday naita ang may pudir nang magsulw̓ad yang kasulatan ang para manginsapu ra rin kung unu pay napabtang duun.
Maskin tung langit man,
maskin tung katanëkan man,
maskin tung kadalman man,
anday masarang ang mangukab.
4 Atii nagtarangitënaw ra ta duru ay natëtëngëd anday naitang magkabag̓ay ang magsulw̓ad yang kasulatan ang para manginsapu ra rin kung unu pay napabtang duun.
5 Pagkatapus may sasang maëpët ang nagbugnu tung yëën ang mag̓aning,
“Ustu ra tiang pagtarangitën mu.
Uay,
tëlëngan mu w̓a.
Nandëëg da yang sasang maning pa tung liun ang nanubli tung ni Judah,
bilang yang nag̓aguuyan ang Saringsing Ni Adi Davida.
Purisu yay magkabag̓ay ang magpangukab da tung pitung ikinula tung kasulatan ang atia ang para masulw̓ad da,”
ag̓aaning.
6 Pagkatapus may naitaung sasang karniru asan tung tëpad yang pagkarung tung siang bulawan.
Yag këkdëng tung kakngaan yang ëpat ang nag̓abui may yang mga mamaëpët.
Ang tëlënganu,
may mga lastru tung tinanguni na ang tanya inimatay ang maning pa tung idinasag.
Dispuis may mga sungay nang pitung bilug ig may mga mata nang pitu kang bilugb.
7 Numanyan yang karnirung naa nagpalëngët da tung pagkarung tung siang bulawan ang pagkatapus yang kasulatan ang atiing yag lululun ang nag̓apëgsan na tung kalima nang tuu ya ray ingkëlan na.
8 Pag̓ëkël na yang kasulatan,
naang ëpat ang nag̓abui may naang duruang puluk may ëpat nga mamaëpëtan ya ra mamansiluud tung pinagtaralungaan nira yang karniru ig namagtuu ra tung anya.
Sinag̓ëkël-ëkëlay ta turugtug̓an ang dikuirdas ang yay pag̓aningën ang arpa ig may salëgsang bilug ang mangkuk ang bulawan ang punuk ta paamut ang yay ag̓ipataw̓uk nira.
Yang taw̓uk ang atii yay kapananglitan yang pag̓arampuën tung Dios yang mga taung kumpurming binuat nang mga tauan na.
9-10 Pamagkanta ra ta sasang kantang baklung pisan ang ya ray nag̓ipagdayaw nira tung karniru ang maning taa yang sarabyën na:
“Ultimung yawa ilëm ay magkabag̓ay ang mangkël yang kasulatan ang atia ig magpangukab da tung mga ikinula.
Kipurki yaway inimatay ang maning pa tung sasang idinasag ig ëkël tung dug̓u mung tuminuruk,
ginawad mu ra tung kalainan yang mga taung kumpurming pinagpilik mu ang maskin unu pang bitalaay maskin unu pang nasyunay tung bilug ang kaliw̓utan ug̓ud asan da nga paulikay mu tung Dios ang pinagpaalawiran da rin nira.
Tanira kay binuat mung mga tauan yang Dios ang katulad ka tung nasyun ang Israel atiing tukaw.
Ipinabtang mu ra ka ang yay may kalëlëngtën ëngëd tung anya ang katulad ka tung mga pari ug̓ud mamanirbian da ka tung anya ang ya kang lag̓i ay pagpaturuw̓ulunan yamën.
Purisu tung uri tanira kay mamaggaraëmën tung bilug ang kaliw̓utan,”
ag̓aaning.
11 Pagkatapus tëlënganu si,
may naitaung mga angil ang liniw̓u-liw̓u ang pira-pira rang laksa ang yay namansilikus da tung mga mamaëpët may tung ëpat ang nag̓abui may tung pagkarung tung siang bulawan ang ya ngakaknga tung nirang tanan.
12 Nagngëlung pamagkarantaën ta maknul ang yang sarabyën yang kanta nira maning taa:
“Magkabag̓ay ang pisan ang yang karnirung inimatay,
yay dayawën natëtëngëd tung pangatëngdanan nang durug tinlu may tung tanan ang mga kaayënan ang nag̓ipakdul nang aw̓undang pisan,
pati tung kawawayangën yang isip nang indi makdingan,
asta tung paggaraëmën nang maktël.
Dapat galangën ang padëngëg̓an ta mupia” ag̓aaning.
13 Pagkatapus yang tanan ang inimu yang Dios,
mag̓ing tung kalangitan man mag̓ing tung katanëkan man mag̓ing tung kadalman man mag̓ing tung tëëb man,
luw̓us da kang nagngëlung pamagkarantaën ang maning taa yang sarabyën yang kanta nira:
“Yang pagkarung tung siang bulawan durua tanira yang karniru,
yay bag̓ay ang pisan ang galangën ig dayawën ang padëngëg̓an ang asta tung sampa natëtëngëd taniray makagag̓aëm tung tanan,”
ag̓aaning.
14 Pagkatapus mag̓aning naang ëpat ang nag̓abui ang namagtimalës,
“Ëë ka man,
magkamaningan da ka man ta maning tia.”
Pagkatapus,
naang mga mamaëpët,
dayun dang namagluud ang namagtuu tung Dios durua yang karniru.