Natëtëngëd Tung Pagturuuën Tung Dios Duun Tung Langit Kung Unu Pay Palaksu Na (4:1-11)
4
Pagkatapus tia,
may ipinadakat si tung panëlëngu.
Unu pay maitaw,
kung indi,
may sasang purtang abirtu ra tung langit.
Pagkatapus yang busis ang atiing primirung nagngëlu ang midyu tung tunul ta sasang budyunga,
nagngëlu sing pagbitala tung yëën ang mag̓aning,
“Tania tung abwat.
Ipaitaw ra tung nuyu kung unu pay dapat ang magkarainabu tung uri,”
ag̓aaning.
2 Atii lag̓i-lag̓ing ginaëmanaw ra yang Espiritu Santo.
Unu pay maitaw,
kung indi,
may sasang siang bulawan ang may pagkarung asan.
3 Atiing pagtëlëngu tung pagkabëtang na,
durung pisan agkabananag ang yang kulay na birdi may apuy-apuyan ang katulad ka tung kulay ta mga batung mamaalën.
Dispuis may buluntun pang naliw̓ut tung sia na ang yang kulay na birding durug kadëët.
4 Dispuis,
tung paliw̓ut yang siang atii,
may duruang puluk may ëpat ang mga siang bulawan ang magkaanggid ka tung siang atiing sam bilug ig may kumarungan ka asan ang durua kang puluk may ëpat nga mamaëpëtan ang yang mga suut nirang mga aw̓ël makukulit ig tung mga kulu nira may maninga binakurung ang bulawan ang yag susuklub ang yay pagpailala ang may pinandëëg̓an da nirab.
5 Numanyan may duldul ang paglëlpakën may kidlat ang ya rag papabugsu tung katanëkan ang asan agliliit tung siang atiing sam bilug.
Dispuis may pitu nga kaasan asan tung katalungaan na ang ya ray kapananglitan yang Espiritu Santong may kaya nang andang pisan ay pagkakulang.
6 Dispuis may asan ka tung katalungaan na ang midyu tung sasang salamin ang pariu ka tung tëëb aglapad ang lauk-lauk ilëm ang tëlëngan.
Dispuis pa tung paliw̓ut yang siang atii tung mga binit nang magtirimbang,
may ëpat ang inimu yang Dios ang pulus mga bui ang yang mga tinanguni nira tadtad ang pisan ta mga mata.
7 Yang primiru may kulu nang midyu tung kulu ta liun,
yang pangyadwa may kulu nang midyu tung kulu ta turu,
yang pangyaklu may ityura nang midyu tung ityura ta tau,
yang pangyaëpat maninga kanug ang paglayug-layug.
8 Yang ëpat ang atii,
parariung talaënëm yang pakpak nira ang yang mga tinanguni nira lëëp ang pisan ta mga mata.
Dispuis pa kaldaw law̓ii anday katadëng-tadëngan yang pagkarantaën nirang pagdarayawën tung Dios ang maning taa yang sarabyën na:
“Durung pisan agkasagradu yang Dios ang makagag̓aëm tung tanan,
Tanya asan da kang lag̓i disti pa tung katëbtëw̓an ang asta simanyan ig asta ra ilëm tung sampa idayun na ka ëngëd agyapun yang pagtaraw̓angën na tung mga tauan na,”
ag̓aaning.
9-10 Kada mamagdayaw yang ëpat ang atii ang nunut da ka ta pagpasalamat nira tung pagkarung tung siang bulawan,
atiing mga mamaëpët ang duruang puluk may ëpat,
ya ra mamansiluud tung pinagtaralungaan nira yang pagkarung tung siang bulawan ang para mamagtuu tung anyang unaynay kang lag̓i yang kabui na.
Pati yang yag susuklub tung mga kulu nirang bulawan,
agkukuatën da nirang ag̓ipabtang tung katalungaan yang siang atii.
Bilang yay pagpailala nira ang indi namandëëg tung mga kuntrariu nira kung bëlag tung anyang pagkarung asan.
Yang pagturuuën nira,
nunut da ka ta pagdarayawën nirang mag̓aning,
11 “Yawa yang Dios ang pangag̓alënan yamën,
bag̓ay ang pisan tung nuyu ang yaway pirming dayawën ta mga tau natëtëngëd tung kadëngëg̓an mu kag kagaëman mu ang inding pisan mapasiring-siringan,
ay kipurki yawa yang nag̓imu yang tanan ang bag̓ay.
Natëtëngëd ilëm tung kalëlyag̓an mu namansiëyang da ka man,”
ag̓aaning.