Yang Sulat Ang Nag̓ipaëkël Ni Jesus Tung Sam Pundaan Duun Tung Sardis (3:1-6)
3
Utru si,
mag̓aning si ti Jesus tung yëën,
“Buinu,
Juan,
magsulata si ta italig mu tung pangërëngan tung sam pundaan yang mga tumatalig tung yëën duun tung Sardis.
Ya taa yang ipabëtang-bëtang mu asan:
‘Yang may bitala taa ya ra yuung ti Jesus ang pagsinasaayami ta maayën yang Espiritu Santo ang yay may kaya nang anda ëngëd ang pisan ay pagkakulang na ig may pitung bilug ang dumakël ang nag̓atapnayu.
Nag̓askëanu yang mga buat-buat mi asan.
Kung tëlënganamu ta kadaklan,
midyu tung duruamug kabiw̓ung panirbian tung yëën.
Piru tung pagkamatuud panalugpatayamu ra ilëm tung yëën.
2 Purisu kung tung pag̓ërëlëkën pa,
mapuawamu ra!
Paktëlën mi ra yang pag̓urusuyun mi tung nag̓auyunanung midyu may nag̓aëpëd pa,
baklu madayunan ang mawarang pisan.
Sanu pang indiamu aningënu ay kipurki tung pagkainsapuu tung mga buat-buat mi,
talagang bëlag pang pulidu tung pagtërëlëngën yang Dios ang pagpaturuw̓ulunanu.
3 Purisu padëmdëman mi kung unu pay itinulduk tung numyung atiing primiru ang ya ra ka rin ay pinauyunan mi.
Ya si kay pakatuan ming usuyun ang nunut da ka ta panligna mi tung mga kasalanan mi.
Ay kung indiamu ka ëngëd magpamanman,
parusaanamu ra yëën ta inali ang katulad ka tung panaw yang sasang takawan ang indi mi pa ka man maskëan kung unu pang urasay ang magkaw̓ut.
4 Maayën ilëm may pira pang bilug asan tung numyu tung Sardis ang yang mga sadili nira,
ya ray inamlig̓an nira ta mupia ang para indi ilëm mamansaan ta kasalanan ang katulad ka tung aw̓ël ang ya ka ag̓amlig̓ay ang para indi mabulingan.
Purisu,
pagkaw̓ut yang uras,
magkaranunutanami ra tung kaliw̓utan ang baklu ang yang suut nira makukulit.
Kipurki yay magkabag̓ay ang pisan tung nirang indi ra ka ëngëd nagpadëëg tung sistimang pangkaliw̓utan.
5 Kumpurming tinu pay indi ka magpadëëg,
ya ra kay paablanu ta aw̓ël ang makukulit ig indi ra ëngëd punasënu yang aran nang isinulat tung listaan yang tanan ang pinaëyanganu ta pagpangabui nirang baklu ang anday pagtapusan naa.
Kung indi,
ipailalaw ra ëngëd tung ni Ama may tung mga angil ang pag̓apanuw̓ul na ang atia yay sasang tauanu.
6 Kapurisu kung nainu pay pamamati,
kaministiran intindiën nira ta mupia kung unu pay nag̓ianing yang Espiritu Santo tung mga tumatalig ang pamagsaragpun-sagpun ang kada sam pundaan.
Ya ra ilëm tia ay maaningu tung numyu.’”
Yang Sulat Ang Nag̓ipaëkël Ni Jesus Tung Sam Pundaan Duun Tung Filadelfia (3:7-13)
7 Utru si,
mag̓aning si ti Jesus tung yëën,
“Buinu,
Juan,
magsulata si kanay ta italig mu tung pangërëngan tung sam pundaan yang mga tumatalig duun tung Filadelfia.
Ya taa yang ipabëtang-bëtang mu asan:
‘Yang may bitala taa ya ra yuung ti Jesus ang yay ultimung pinilik yang Dios ang maggaraëmën tung uri.
Bilang yuu yang kanubli ni Adi David ang naulang magpapanaw tung paggaraëmën yang Dios ang baklu ang anday katapusan na.
Kung tinu pay nag̓alëlyag̓anung palg̓urun tung paggaraëmënung atia,
anday maampalar.
Kung tinu pay nag̓alëlyag̓anung ipaaw̓ig,
anda kay mapagsuspindi.
8 Nag̓askëanu yang pag̓abuat mi.
Maskin malakaamu ilëm ig aranëkamu ka man tung pagtërëlëngën yang mga kaarumanan mi asan,
piru pinadërëpan mi ka ëngëd yang bitalaw ang inusuy ig indiaw ka iningwara mi.
Purisu indi mi paglipatan yang pangakuung naa tung numyu.
Siguraduamu rang malg̓ud tung paggaraëmënung atia tung uri ay maning pa inabrianamu ra yëën yang purta na ang anda ëngëd ang pisan ay masarang ang magsuspindi tung numyung magpalg̓ud.
9 May mga tau asan ang kumus mga Judio,
pamansianing ang ultimu ilëm unu tanira ay matuud ang mga tauan yang Dios ang pagkatapus bëlag ka ay pamagbukli ra ilëm.
Yang pagpaturuw̓ulunan nirang sam pundaan bëlag da yang Dios ang katulad tung nag̓alaum nira,
kung indi,
ya ra ti Satanas mismu.
Purisu pampatalungaënu ra tanira tung numyung pampaluurun ang para mamag̓ilala ra ka ëngëd tung numyu ang yamu ka man yang nag̓agëgmaanu natëtëngëd yamu yang matuud ang mga tauan yang Dios.
10 Natëtëngëd tinuman mi yang itinuw̓ulu tung numyung mag̓agwanta tung mga kaliwag̓an,
purisu ta yëën,
dipindiranamu ra yëën tung uras ang ipagkaw̓ut yang mga kaliwag̓an ang durug lëbat tung bilug ang kaliw̓utan ang ya ray ipag̓ingaw̓us yang Dios tung mga taung pamagtinir tung kaliw̓utan ang kumpurming pagpasuag tung kalëlyag̓an nab.
11 Makaliaw rang maglëkat.
Purisu prusigiran mi ëngëd ta mupia yang pag̓abuat ming nag̓auyunanu ug̓ud indiamu mawaraan yang maning pa tung primyung gustuung ipagpadëngëg tung numyu.
12 Kung tinu pay magprusigir ka ëngëd tung nag̓ipatumanu tung anya,
padëngëg̓anu ta mupiang pabakërën ëngëd yang pagkabëtang na tung katalungaan yang Dios.
Buatënung maning pa tung sasang adiling ganëran tung pagtuuan tung Dios ang pagpaturuw̓ulunanu ang para duun da tanya magpakëën.
Dispuis,
yay sulatanu yang aran yang Dios ang pagpaturuw̓ulunanu ang para bistung pisan ang yay may anya tung taung atia.
Pati yang aran yang siudad ang tiniran yang Dios tung uri ang yay pag̓aningën ang Baklung Jerusalem ang duun manliit tung anya tung langit ang magparanëkc,
ya ra kay isulatu tung anya ang para bistu ka ang tanya sasang kinasakpan yang siudad ang atia.
Asta yang aranu kang baklu ang ya ray magpailala tung pagkabëtangung baklu tung uri,
ya ka,
isulatu ra ka tung anya ang para maintindian da ang yay sasang tauanu.
13 Purisu kung nainu pay pamamati,
kaministiran ang intindiën nira ta mupia kung unu pay nag̓ianing yang Espiritu Santo tung mga tumatalig tung yëën ang pamagsaragpun-sagpun ang kada sam pundaan.
Ya ra ilëm tia ay maaningu tung numyu.’”
Yang Sulat Ang Nag̓ipaëkël Ni Jesus Tung Sam Pundaan Duun Tung Laodicea (3:14-22)
14 Utru si mag̓aning si ti Jesus tung yëën,
“Buinu,
Juan,
magsulata si kanay ta italig mu tung pangërëngan tung sam pundaan yang mga tumatalig duun tung Laodicea.
Ya taa yang ipabëtang-bëtang mu asan:
‘Yang may bitala taa ya ra yuung ti Jesus ang pagkërëng tung tanan ang pinangakuan yang Dios ang para magkamatuud da.
Yuu kay matalig̓an ming talagang matuud yang nag̓ipagdiklaraw tung numyu natëtëngëd tung planu na.
Dispuis,
ëkël tung yëën inimu na yang tanan.
15 Nag̓askëanu yang mga ubra-ubra mi.
Maskin indiamu ka man panalyud tung yëën,
piru bëlag̓anamu ra ka madërëp tung pag̓urusuyun mi tung mga kalëlyag̓anu.
Kisira manalyuramu ra ilëm,
u kung indi,
magpadërëpamu ra ilëm ta ustu,
atii ra rin.
16 Piru naang pamatuy-patuyamu ra ilëm tung yëën,
bëlag̓anamu ra madërëp,
indiamu ka panalyud,
puis yamu maning pa tung pamangan ang bëlag dang makinit bëlag da kang malamig ang pisan,
kung indi,
nangalaw̓ab da ilëm ang asan da nag̓ing malasay ra.
Purisu nag̓aisipanamu ra yëën ang iplëk ang maning pa tung yamu ag̓ibulaayu,
yang kalalasayën ming atia tung yëën.
17 Ayw̓a indiamu aningënu,
kipurki pag̓aningamu ang yamu manggaranën da,
maayën da yang pagkarabëtangën mid.
Anda ray mga kaministiran mi.
Piru naa pala andang pisan ay kaliw̓utan mi ang tung pagtërëlëngën yang Dios,
duruamug kaalang-alang ig makakaildawamung pisan!
Yang kaalimbawaan mi yamu maning pa tung sasang naputu ra,
maning pa tung sasang naburayan da,
maning pa tung sasang luas.
18 Purisu ya taa yang ikunsiuu tung numyu.
Tung yëënamu mangalang ta bulawan ang pinapag̓as tung apuy ug̓ud may kamanggaran ming matuud.
Pati aw̓ël ang makulit ang puiding masuut mi tung mga tinanguni ming luas,
alangën mi ka tung yëën ug̓ud matabunan da yang kaëyakan mi.
Pati bulung ang mapiid mi tung mga mata ming naburayan,
alangën mi ka tung yëën ug̓ud maulikan da yang panëlëng mi.
19 Ta yëën,
tanya,
kumpurming tinu pay nag̓agëgmaanu,
ya ray nag̓apatigbak-tigbakanu ta bitala ang para disiplinaënung tadlëngën.
Purisu magpadërëpamu ra ta ustung manligna tung pamatuy-patuy ming atia tung yëën.
20 Naa w̓a ya ray dapat ang pamaridëngdëngan mi ta mupia.
Katulad tung sasang taung panagbalay ra ang yay pag̓ëlat tung may balay ang patakwalën,
yuu ya ka.
Pag̓ëlataw ka tung numyung pag̓atag̓amanu ta tandëg yang mga isip mi kung imbitarënaw ra numyung magmangulu tung numyu u kung indi.
Katulad ka tung may balay ang mag̓imbitar tung panagbalay ang magtakwal da ig magpaklëd da ka dayun tung balay na,
kung tinu pay mag̓imbitar tung yëën ang magmangulu tung anya,
magpakibingkitaw rang pisan tung anya ang pariu tung durua nga tauan ang pirming pagsaduan tung pamangan.
21 Puis kung tinu pay masalapay tung gustuung ipasalapayu tung anya,
yay pakarungunu tung tëparu tung uri ug̓ud kasiraanami ra kang maggaraëmën.
Bilang mambung da tung yëën ang nasalapay ra ka tung ipinasalapay ni Ama tung yëën,
ang pagkatapus pinakarungaw ra ka anya tung tëpad na ug̓ud kasiraanami ra kang maggaraëmën.
22 Purisu kung nainu pay pamamati,
kaministiran ang intindiën nira ta mupia kung unu pay nag̓ianing yang Espiritu Santo tung mga tumatalig ang pamagsaragpun-sagpun ang kada sam pundaan.
Ya ra ilëm tia ay maaningu tung numyu.’”