‘Yang may bitala taa ya ra yuung ti Jesus ang pagtapnay tung pitung bilug ang dumakël tung kalimaung naang tuu kag pagpanaw-panawaw tung kakngaan yang pitung parabdungan ta kaas ang purus bulawan.

2 Nag̓askëanu yang tanan ang pag̓abuat mi asan,

yang pagpakabëdlay mi may yang pag̓aragwantaën mi tung mga kaliwag̓an ang nag̓apasaran mi.

Nag̓askëanu ka ang indiamung pisan pagkusintir tung mga taung mga malain.

Ay tinuung mi ra nganing yang duma ang nag̓ambu ang tanira unu mga taralig̓anu bilang mga apustulu buat.

3 Nag̓askëanu ka ang yamu mainagwantaën.

Ay maski may mga kaliwag̓an ang nag̓apasaran mi arangan da ilëm tung yëën ang nag̓akëgngan mi,

piru indiamu ka ëngëd pagpaluw̓ay.

4 Ug̓aring ilëm,

ya taa yang indi ëngëd nag̓auyunanu tung numyu.

Nanrusaw ra yang paggërëgmaën mi tung yëën.

Bëlag dang pariu atiing bakluamu pa ka ilëm nagtalig tung yëën^a.

5 Padëmdëman ming padëmdëman kung ya pa ag̓arig katinlu yang paggërëgmaën mi tung yëën atii kanay ang ya ray nalagpakan mi.

Ya ra ka dayun ay panlignaan mi yang pagkalagpak ming atia ang pagkatapus yang mga buat-buat ming atiing primiru,

ya si ay pakatuan ming usuyun.

Ay kung indiamu manligna,

pamirisiaanamu ra yëën ay kuatënu ra yang parabdungan yang kaas tung kindëngan na asan tung numyu.

6 Piru maskin nag̓apagbitalaw ta maning tia,

may sasa kang dayawënu tung numyu.

Aglalawayanamu ka tung ubra-ubra yang pamag̓usuy tung ni Nicolaus^b ang ya kang pisan ay nag̓alawayanu.

7 Purisu kung nainu pay pamamati,

kaministiran intindiën da nira ta mupia kung unu pay nag̓ianing yang Espiritu Santo tung mga tumatalig ang pamagsaragpun-sagpun ang kada sam pundaan.

Kung tinu pay magprusigir ka ëngëd ang magpakatu tung primirung paggërëgmaën na tung yëën ang durug kinit pati tung mga kaputulan na,

yay tugtanung mamangan yang burak yang ayung pagpangabuian ta unaynay ang duun agbëbtang tung kaismayaan tung katalungaan yang Dios^c.

Ya ra ilëm tia ay maaningu tung numyu.’”

‘Yang may bitala taa ya ra yuung ti Jesus ang makagag̓aëm tung tanan ang disti pa tung katëbtëw̓an ang asta ra ilëm tung kauri-urian,

andang pisan ay nag̓ainabu tung bilug ang kaliw̓utan ang lua pa tung kagaëmanu.

Napatayaw ang pagkatapus nabuiaw si kang uman.

9 Nag̓askëanu yang mga pinitinsiang nag̓apasaran mi.

Nag̓askëanu ka ang maskin maliliwag̓ënamu ka man,

piru manggaranënamu tung nag̓auyunan yang Dios.

Nag̓askëanu ka yang nag̓ipagbangdan tung numyu yang mga Judio asan ang para ya ray paglainan ta isip yang gubirnu tung numyu.

Kumus tanira mga Judio ka man,

pamansianing ang ultimu ilëm unu tanira ay matuud ang mga tauan yang Dios ang pagkatapus bëlag ka.

Kung indi,

yang pagpaturuw̓ulunan nirang sam pundaan bëlag yang Dios ang katulad tung nag̓alaum nira,

kung indi,

ya ra ti Satanas mismu.

10 Indiamu ëngëd mag̓ëlëd tung maskin unu pang mga pinitinsiaay ang dapat magdarangat tung numyu ang indi ilëm buay.

Patëntënën mi yang mga isip ming mag̓agwanta ay indi ra ilëm buay,

paisëg̓ën da ni Satanas yang may mga katëngdanan asan ang yang duma tung numyu ipakalabus da nira ug̓ud asanamu ra nga tag̓amay nira ta rëg̓ës ang para mamalpasamu ra tung yëën.

Magkatiniramu ra ta mga pinitinsia tung sëlëd sam puluk ilëm ang kaldaw.

Purisu magpadayunamu ra ka ëngëd ta ustu tung pagtaralig̓ën mi tung yëën,

maskin yay magakdan mi ta kamatayën mi.

Siguradung pakdulanamu ra yëën yang maning pa tung sasang primyung nag̓ipagpadëngëg tung sasang nandëëg tung karira.

Anday duma,

ipagpasapënamu ra yëën tung Dios ang asta tung sampang anda ëngëd ang pisan ay katapus-tapusan na.

11 Purisu kung nainu pay pamamati,

kaministiran intindiën da nira ta mupia kung unu pay nag̓ianing yang Espiritu Santo tung mga tumatalig ang pamagsaragpun-sagpun ang kada sam pundaan.

Kung tinu pay magprusigir ang asta masalapayan na ka ëngëd yang mga kaliwag̓an ang atia,

indi ra ëngëd sakpën yang sintinsiang atiang pag̓aningën ang yadwang kamatayën.

Ya ra ilëm tia ay maaningu tung numyu.’”

‘Yang may bitala taa ya ra yuung ti Jesus ang may maninga isi ta ispadang paglua tung ngangaw ang durug tarëm yang lantip nang magtimbang.

13 Nag̓askëanu ang asanamu pagtinir tung lansangan ang atia ang yang kadaklan ang mga masigkabanwa mi nag̓akëmkëm ta mupia ni Satanas^d.

Nag̓askëanu ka ang mapëg̓ët yang pamgës mi tung yëën.

Ay indiamu ka ëngëd nag̓ingwara tung yëën ang maning indiamu ra magpadayun tung pagtaralig̓ën mi tung yëën ag̓ad inimatay pa yang aruman ming ti Antipas asan tung pag̓atiniran ëngëd ni Satanas natëtëngëd ilëm tung pagtaralig̓ën na tung yëën.

Tanya sasang durug kapiadur ang nagpaingmatuud tung mga kaarumanan mi asan natëtëngëd tung yëën.

14 Piru may mga bag̓ay ang pira pang bilug ang indi ëngëd nag̓auyunanu tung numyu.

May mga kaarumanan ming duma asan ang pamag̓usuy tung magkapariu tung ikinunsiu ni maëpët ang Balaam tung ni Adi Balak atiing tukaw kung ya pa ag̓ari yang pagsunlug na tung mga Israel ang para mamanlipat da tung Dios ang mamagtuu tung bëlag̓an Dios.

Ay yang ikinunsiu na tung anya ang maayën pang pangimbitarën na yang mga Israel ang mamagpasakëp tung pista nirang mamagpakisaru tung nag̓isag̓ud nira tung bëlag̓an matuud ang Dios ang nunut da ka ta pagpakidalan nira tung maskin ninu pang baw̓ayay^e.

15 Yang pagpakigsaru yang mga Israel ang atii,

anggid-anggid da tung mga ubra-ubra yang mga kaarumanan ming duma asan ang pamag̓usuy tung nag̓itulduk ni Nicolaus^f.

16 Purisu magpamanmanamu ra yang mga isip mi.

Ustu ra tiang pagkusintir mi tung mga kaarumanan ming atia.

Ay kung indiamu magpamanman,

angayënamu ra yëën tung makali ang para silutanu ra yang mga kaarumanan ming atia.

Anday dumang ipagdaliu tung nira,

ya ra yang ibitalaw tung nira ang yay maning pa tung isi ta ispadang paglua tung ngangaw.

17 Purisu kung nainu pay pamamati,

kaministiran intindiën nira ta mupia kung unu pay nag̓ianing yang Espiritu Santo tung mga tumatalig ang pamagsaragpun-sagpun ang kada sam pundaan.

Kung tinu pay indi magpadëëg tung sistimang atiang pangkaliw̓utan,

yay pakdulanu yang pag̓aningën ang manang itinaluk^g.

Dispuis pakdulanu ka ta maning pa tung batung kulit ang may aran ang baklu ang isinulat asan ang inding pisan nag̓askë-askëan ta tau,

kung indi,

suluminting makdëk asan,

ultimu ilëm yang pakdulanu^h.

Ya ra ilëm tia ay maaningu tung numyu.’”

‘Yang may bitala taa ya ra yuung ti Jesus ang yay pag̓aningën ang Ana Yang Dios ig yang mataung tëmëlëng durug kadëkdëk ang midyu tung apuy ang madkal,

ig yang kakayu midyu tung saway ang pinabalaan tung apuy ang pagkatapus pinakintab ta maayën.

19 Nag̓askëanu yang tanan ang pag̓abuat mi asan,

yang paggërëgmaan ming magpurutul ang nunut ta pag̓arasikasuan mi sasa may sasa may yang pagtaralig̓ën mi tung yëën ang mabakëd may yang pag̓aragwantaën mi tung mga kaliwag̓an.

Dispuis,

nag̓askëanu ka ang mas nganing nagtinlu yang mga ubra-ubra mi kay tung atiing primiru ang bakluamu pa ilëm nagtalig tung yëën.

20 Ug̓aring may sasang indi ëngëd nag̓auyunanu tung numyu.

Pagkusintiramu tung sasang baw̓ay asan tung grupu mi ang pagkapariung pisan ta ubra-ubra yang sasang raynang tukaw ang nag̓aranan tung ni Jezebelⁱ.

Pag̓ambu ang tanya unu sasang pag̓atalig̓an yang Dios ang magpalatay yang bitala na buat.

Ëkël tung nag̓itulduk na tung mga turuw̓ulunu asan,

nag̓adayaan nang magpakisadu tung nag̓isag̓ud tung bëlag̓an matuud ang Dios ang nunut da ka ta pagpakidalan nira tung maskin tinu pang baw̓ayay^j.

21 Tung bag̓ay,

pinakdulanu ra ta lugar nang manligna,

piru indi ka ëngëd malëlyag ang mamutwan tung pagturuldukun nang atia.

22 Iugtulu tung numyu,

masapuan na ra ilëm,

pinadalpëtanu ra ta laru nang matigbak.

Pati yang mga katabyang nang pamagtulduk da ka ta pariu ka tung nag̓itulduk na,

ya ka,

damayënu ra kang padalpëtan kung indi ra mamanligna tung mga ubra-ubra nirang atiang uyun tung nag̓itulduk na.

23 Asta yang kadaklan ang pamag̓usuy ra tung nag̓itulduk nang atia,

supukunu ra ilëm.

Duun da ngaintindiay yang tanan ang mga tumatalig ang kada sam pundaan ang yuuy pagbilid tung mga kinaisipan nirang tanan kung unu pa ëngëd ay pag̓asikad nira.

Purisu sasa may sasa tung numyu,

kumpurming unu pay mga buat-buat mi ya ra kay paatuanu ta iblësu tung numyu.

24-25 Piru ta yamung kadaklan asan tung Tiatira,

nag̓askëanu ang indiamu ra nagpasanyug tung nag̓itulduk yang baw̓ay ang atia.

Indiamu ra ka nagpaklëd tung pag̓aningën yang duma ang mga sikritung adaralëm ang ya unu ay nag̓ipabunayag yang Dios tung nira buat ang pagkatapus anday dumang pagpabunayag tung nira,

kung indi,

ya ra ti Satanas mismu^k!

Purisu ya ra ilëm taa yang nag̓aingaluku tung numyu.

Kung unu pay nag̓abuat ming nag̓auyunanu ya ray prusigiran mi ta ustu ang asta maglëkataw ra.

26-28 Kumpurming tinu pay indi magpadëëg tung aklës ni Satanas ang pagkatapus yang nag̓ipatumanu tung anya yay nag̓apadanayan nang asta tapusun da yang Dios yang kaliw̓utan ang naa,

yay pakdulanu ta katëngdanan nang maggaraëmën tung duma-rumang mga nasyun ang katulad ka tung ipinakdul ni Ama tung yëën ug̓ud kasiraanami ra kang maggaraëmën tung nira.

Durug kaigpit yang paggaraëmën yamën tung mga taung atia ay tanira ipabtang da ilëm yamën ang midyu tung mga urun ang panëmëk-tëmëkën da ilëm^l.

Dispuis,

partianu ra ka yang kadëngëg̓anu ang kung tëlëngan maning pa tung Kalamrag̓anën ang madëët yang bananag na.

29 Kapurisu kung nainu pay pamamati,

kaministiran intindiën nira ta mupia kung unu pay nag̓ianing yang Espiritu Santo tung mga tumatalig ang pamagsaragpun-sagpun ang kada sam pundaan.

Ya ra ilëm tia ay maaningu tung numyu.’”