Yang Nag̓apanawan Ni Pablo Duun Tung Malta (28:1-10)
28
Atiing nadampatami rang nalibri,
baklu ra ngaskëay yamën ang yang pulung atiing pinagpadiskapaan yamën ya ra yang pag̓aningën ang Malta.
2 Numanyan yang mga magbaw̓anwa duun bëlag̓an ilëm gësyë yang istimar nira tung yamën.
Ay namagpagkal da ta apuy ang pinaparangan nira tung yamën,
ay nagkuran si,
durug lamig.
3 Ti Pablo nanlangaw ra kang nanguup ta sang kabingbing yang mga yësëk-yësëk.
Tung pagpagkal na tung apuy,
naa pala may iraw ang madalit duun tung adalëm yang langaw ang atiang nakabingbing na.
Pagkasinti na yang kinit,
dayun dang luminapus ang tuminëngkak tung kalima ni Pablong napabuyut-buyut.
4 Pagkaita yang mga magbaw̓anwa,
dayun dang namag̓araning-aningan ang mag̓aning,
“Yang taung naa talagang sasang nangimatay ta tau!
Maskin nalibri tung tëëb,
piru indi ra ka ëngëd tugtan ni Balësa ang mabui pa!”
ag̓aaning.
5 Piru ti Pablo tanya,
ya ra ilëm iwislikay na yang iraw tung apuy.
Indi ka naunu pa.
6 Simanyan nag̓apamalaran da ilëm nira kung panimpëngan da ubin kung gulpi ra ilëm ang tumumba asan tung kindëngan na.
Piru atiing nabuay ra yang pag̓ëlat nira ang anda kay malain ang naita nirang nainabu tung anya,
inuman da nira yang mga isip nira ang ti Pablo ya ra ag̓aningay nirang may pagkaginuu na ka unu.
7 Taa numanyan yang pagmangulu duun tung intirung pulung atii yay nag̓aranan tung ni Publio.
May tanëk nang alëngët ilëm duun tung nadampatan yamën.
Ya ray nag̓imbitar tung yamën ang magdayun tung balay na.
Tung sëlëd tulung kaldaw,
inasikasuami anyang sinag̓ud ta mupia.
8 Numanyan nagkatuun ang yang tatay ni Publio paglaru.
Karaw̓utun ta kinit ig pagtaki-taki.
Numanyan pagpaklëd ni Pablo tung anya,
dayun na rang ipinag̓ampu tung Dios ang nunut da ka ta pagdëën na tung tinanguni na ang ya ray pinagmaayënan na.
9 Pagkainabu ra tia,
nagsarambung da yang balita tung intirung pulu.
Tinëgkaan na,
yang tanan ang may mga laru sigi ra ilëm yang pagdarangëpën nira tung anya ig ya ra ka man agpagmaayën agpagmaayën.
10 Purisu natëtëngëd tung pag̓istimar nira,
duru-durung mga rigalu ang ipinamakdul-pakdul nira tung yamën.
Dispuis tung pagsaay yamën tung uri,
pinakdulanami pa nira yang mga kaministiran yamën tung pagbiriag̓iën yamën.
Natëtëngëd Tung Pagsaraayën Yamën Ang Nagliit Tung Malta Ang Asta Tung Pagkaw̓ut Yamën Duun Tung Siudad Ang Roma (28:11-16)
11 Numanyan pagtaklib da ta tulung bulan yang pagtirinirën yamën duun tung pulung atii,
nagsaayami ra tung sasang gulitang tag̓a Alejandria ang duun da ka tung pulung atii nagpalimbëng ang asta tumaklib da yang panimpung igbaralyu.
Yang gulitang atia ya ray paggug̓uuyan ang “Mga Ginuu-ginuung Kampi”b.
12 Pagsaay yamën,
nagpatabukami ra ang asta nakaw̓utami ra duun tung siudad ang Siracusa.
Duunami nagtinir ta sëlëd tulung kaldaw.
13 Pagkatapus nagpalayag̓ami sing nagpatindak tung siudad ang Regio.
Pagkapangayag,
minëyëp da yang salatan.
Purisu kumus pabur yamën,
tung sëlëd ilëm duruang kaldaw nakaw̓utami ra duun tung lansangan ang Puteoli.
14 Pagsalta yamën,
may nabag̓as yamën ang mga tumatalig ang ya ray namag̓imbitar tung yamën ang magdayun tung nira ta san linggu.
Pagkatapus tia,
dayunami rang nagpanaw ang para mangayami ra duun tung Roma.
15 Numanyan pagkabalita yang mga tumatalig ang tag̓a Roma ang yami pag̓angay ra duun,
namansiangay ra duun tung lansangan ang Poro de Apio ang para bag̓asënami ra nirang ëklan duun tung siudad.
May sam paluyug̓an pa ka ëngëd ang namagpakigbag̓as pa tung yamën tung tukawan duun tung pag̓aningën ang Tulu Nga Darayunan.
Pagkaita ni Pablo tung nirang tanan,
duun da kumintël yang isip nang nagpasalamat tung Dios.
16 Numanyan,
pagkaw̓ut yamën duun tung Roma,
ti Pablo tanya tinugtan da yang gubirnung magpaag̓ës tung mga prisung duma ta matiniran na.
Ug̓aring ilëm may sasang sundalung pagbantay tung anya tung tanan ang uras.
Natëtëngëd Tung Primirung Pagpasanag Ni Pablo Tung Mga Manigmangulu Tung Mga Masigka Judio Nira Duun Tung Roma (28:7-22)
17 Numanyan pagtaklib yang tulung kaldaw,
nagpaguuy ra ti Pablo tung mga manigmangulu tung mga masigka Judio nirang pamag̓istar duun tung Roma.
Pagkasagpun nira,
mag̓aning ti Pablong nagbitala tung nira,
“Mga kaputulanung mga masigkanasyunu,
yuu,
maskin anday binuatanung kuntra tung nasyun ta ubin kuntra pa tung kinaug̓alian ang pinanubli ta tung mga kinaampu ta,
piru dinëëpaw ka ëngëd yang dumang mga masigkanasyun ta ang pagkatapus inintrigaaw ra tung kagaëman yang mga tag̓a Roma.
18 Atiing pag̓imbistigar nira tung yëën,
anday kasalanan ang naita nira tung yëën ang para tumbasan da rin ta linawaw.
Purisu gustu ra rin nira ang yuu palpasan da ilëm nira.
19 Dispirinsia ilëm,
pinagpasuag̓an da yang mga masigkanasyun tang duma.
Purisu,
anda ray dumang rimidyung sarang ang mabuatu,
ang indi,
nag̓ingalukaw ra ilëm ta apilar tung ni Maginuung Ading Pinakalandaw taa tung Roma.
Piru maskin napag̓ingalukaw ra ka man ta apilar,
bëlag̓an ang mag̓aning ang yuu magbëblës ang magdimanda pa tung mga masigkanasyun ta.
20 Kapurisu ya ray ipinagpaguuyu simanyan tung numyu ang para magpasanag̓aw ra tung numyu.
Kipurki tung kamatuuran,
anday dumang natëngëran yang pagkërëdkërën tung yëën yang mga kadinang naa,
ang indi natëtëngëd ilëm tung pagtaralig̓ënung naa tung sasang taung pag̓aëlatan kang lag̓i yang intirung nasyun tang Israel ang nag̓apakbat,”
mag̓aning.
21 Mag̓aning tanirang namagtimalës,
“Kung tung bag̓ay,
yami tani tung Roma,
anday sulat ang kuminaw̓ut ang nagliit tung Judea ang natëtëngëd tung nuyu.
Maskin pa yang mga putul yamën ang duun ka manliit,
anda kay ëkël nirang balita ang maning yawa lain ang tau.
22 Ug̓aring,
gustu ra yamën ang magngël kung unu pay nag̓apëgsan mu.
Kipurki nag̓askëan da yamën ang maskin ay pang banwaay,
yang grupung atiang nag̓apasakpan mu pag̓akuntra unu ta mupia,”
ag̓aaning.
Yang Ultimung Pagpasanag Ni Pablo Tung Mga Masigkanasyun Nang Mga Manigmangulu (28:23-28)
23 Purisu simanyan,
namag̓irig̓uan da tanira na Pablo ta uras ang ipagbalik nirang uman tung anya.
Pagkaw̓ut yang uras ang atii,
asan da ka tanira namansikaw̓ut tung pag̓atiniran na.
Mas dakëlë tanira kay tung primiru.
Atii,
mag̓impisa tung timpranu,
nag̓apun ilëm ta pagpasanag ni Pablo tung nira.
Nagpaingmatuud da tung nira natëtëngëd tung paggaraëmën yang Dios ang atiang baklung tinukud ni Jesu-Cristo.
Tinag̓aman na kang pangkëlan yang mga isip nirang mamanangëd da ang ti Jesus ya ra ka man yang pag̓aningën nirang Cristo ang pag̓aëlatan kang lag̓i nirang magtukud tung paggaraëmën yang Dios ang atiang baklu.
Yang pangatadlëngan na ipinatiël na tung naula ni Moises may tung nagkaraula yang mga manigpalatay yang bitala yang Dios atiing tukaw.
24 Numanyan yang dumang namamati,
ipinaëkël da nira yang mga isip nira tung pinagpaintindi na.
Piru yang duma,
indi ra ëngëd nangalëlyag ang mamanangëd.
25 Purisu yang dinangat na,
atiing pag̓urulikan da rin tanira,
pamagsuruag-suag̓an da ta mupia.
Numanyan,
baklu namagliit,
may sasang inaning pa ka ëngëd ni Pablo tung nira ang mag̓aning,
“Tamang pisan yang sasang pinag̓aning yang Espiritu Santong ipinagpalatay ni Isaias tung mga kinaampu tang tukaw,
ay maskin tung numyu numaan,
tëmëng dang pisan.
26 Ay mag̓aning yang Espiritu Santo tung anya,
‘Ala,
angayën mu yang mga masigkanasyun mung atiang panganingën ta maning taa:
Maskin sam pulukamung mamati,
indiamu ka ëngëd maintindi,
maskin sam pulukamung magpaniid,
indiamu ka ëngëd masiman.
Maning tia,
Isaias,
ya ray ianing mu tung nira.
27 Ay ya pa ag̓ari,
yang kinaisipan yang mga taung atia indi ra ka ëngëd maklëran,
pati mga talinga nira maning pa tung pinabëngël da nira,
asta mga mata nira,
maning pa tung pinamëyëng da ka nira.
Anda ëngëd ay gustu nirang magpasadsad,
ay may pangamanan ëngëd nira asan ang muya kung maklëran da yang mga kinaisipan nira,
kung maning pa tung mangikas da yang mga talinga nira,
kung maning pa tung mabuskad da yang mga mata nira,
muya mangapagsug̓at dang mamagpatapnay tung yëën ang pagkatapus tapnayënu ra ka rin,’
mag̓aningc.
28-29 Kapurisu,
mga mamaëpëtu,
yang dapat ming intindiën,
yang balitang naa natëtëngëd tung pagtarapnayën yang Dios tung yatën ang mga tau kung ya pa ag̓ari,
nag̓ipagpakaw̓ut da ka tung mga taung tag̓a duma-rumang nasyun ang bëlag̓an mga masigka Judio ta.
Tanira talagang mamanangëd,”
mag̓aning ti Pablo duun tung nirad.
Sigi-sigi Ra Ilëm Yang Pagparakaw̓utun Ni Pablo Duun Tung Roma (28:30-31)
30 Numanyan tung sëlëd durua rang takun nagtinir ti Pablo tung sasang balay ang pag̓arkilaan na.
Kung tinu pay nalëlyag ang mangay tung anya,
ya ray sinapët nang tanan ta mupia.
31 Yang pagsarapëtën na tung nira,
nunut da ka ta pagparakaw̓utun na tung nira natëtëngëd tung paggaraëmën yang Dios ang baklu kung ya pa ag̓aring mapalg̓uran da nira,
ang nunut da ka ta pagparasanag̓ën na natëtëngëd tung ni Jesus ang ya ra ka man yang pag̓aningën ang Cristo ang yay nagtukud tung paggaraëmën nang atia.
Anday inëntëran nang nagbitala tung mga tau ig anda kay nagtag̓am ta ampalar tung anya.