Fijemos la mirada en Jesús
12
To bairi capaarã ca-añuparã mani jʉgoye macana Diore ca-api nʉcʉbʉgoricarã.
Dio cʉ̃ ca-boori wame cá-ájuparã popiye nare to ca-anibato quena.
To bairi caroaro na ca-nʉca ocabʉtirijere tʉgooña majiri mani quena Dio cʉ̃ ca-boori wamere mani ána.
Popiye to ca-anibato quena mani nʉcarã.
Diore mani ca-nʉcʉbʉgoquẽto cá-áti wamere cõona caroorijere mani áti janacõato.
Oco bairo ãa:
Atʉri maja na mena macacʉ jicãʉ cʉ̃ yarãre na atʉ netogʉ cʉ̃ ye ca-nʉcʉrijere cũʉmi.
To bairona ape wame Diore mani ca-nʉcʉbʉgoquẽto cá-áti wamerire ca-jana cũu ree peticõape ãa.
To bairo ána popiye tamuoriquere nʉca ocabʉtiri Dio cʉ̃ ca-boori wame jetore mani ána.
2 Jesúre mani tʉgooña anicõato.
Caroaro Dio cʉ̃ ca-boori wame cá-ájupi Jesú cabero cʉ̃ ca-wariñuupere majiri.
To bairi cʉ̃re ca-jĩarã yucʉ tẽorica pãipʉ cʉ̃ na ca-papua jĩarije to ca-anibato quena ca-nʉcañupi.
Carooʉre cʉ̃ ánare bairona cʉ̃ na cá-áti popiyeyerije to ca-anibato quena ca-tʉgooñaquẽjupi.
Roorije ca-tamuoʉ anibacʉ quena,
“Wariñuurica wame yʉ joogʉmi Dio yʉ ca-tamuoro beropʉ,”
ĩrica wame macare ca-tʉgooñañupi Jesú.
To bairo mani tamuobojari bero Dio tʉna ruiimi,
cʉ̃ mena Ʉpaʉ aniri.
3 Rooro majuu cʉ̃ ca-ĩi epe tʉjʉteeyuparã.
To bairo caroorã cʉ̃ na cá-átiere cʉ̃ ca-nʉca ocabʉtiriquere tʉgooñaña mʉjaa,
jã quena popiye jãare to ca-anibato quena tʉgooñarique paiquẽnana jã ani ocabʉtigarã ĩirã.
4 Cristo cʉ̃ ca-tamuorique cõona mʉja tamuoquẽe mai.
Ñee wapa mee Jesúre cʉ̃ na cá-átatore bairona caroorã mʉja jĩaquẽema.
5 ¿Mʉjaare Dio punaare cʉ̃ ca-ĩi buioriquere mʉja majiritití?
Oco bairi wame ca-ĩi buioyupi Dio:
Yʉ Macʉ,
mʉre yʉ ca-ĩi buioro yʉ bai botioquẽja.
“Tie caroorije átiqueticõaña,
caroa macare ája,”
mʉ yʉ ca-ĩi buioro tʉgooñarique paiquẽja.
6 Yʉ ca-mairãre caroaro na yʉ beonucu.
Yʉ punaare na yʉ popiyeye,
caroaro jeto na áparo ĩi.a
7 To bairi mʉja ca-tamuoata nʉcaña mʉjaa.
To bairona tamuo rotimi Dio cʉ̃ punaare,
caroaro mʉja cá-áti majiparore bairo ĩi.
Ca-pacʉa na punaare na beonucuma.
Nare na ca-bai botioro na popiyeyema,
caroaro na apiʉjaato ĩirã.
To bairo jeto na cá-átipe ãa.
Dio quena na cá-átore bairona mani átinucumi manire,
cʉ̃ punaa mani ca-ano maca.
8 To bairo jetona áami Dio cʉ̃ punaa nipetirãre.
Mʉjaa cʉ̃ ca-beoquẽna mʉja ca-ãmata,
“Yʉ punaa ãma,”
mʉja ĩi ecooquetiborã.
Cá-áti eperã romiri punaare bairona,
ca-pacʉ manare bairona mʉja aniborã.
To bairi “jã Pacʉ” Diore cʉ̃ mʉja ĩi majiquetiborã ca-tamuorique mano mʉja cʉ̃ ca-beoata.
9 Mani pacʉa manire na ca-beoro na mani ca-nʉcʉbʉgowʉ.
Naa mani pacʉa ati yepa macana na netoro mani Pacʉ Dio ʉmʉrecóo macacʉ macare cʉ̃ ca-nʉcʉbʉgope ãa manire cʉ̃ ca-beoro.
To bairi cʉ̃ apiʉja nʉcʉbʉgori cʉ̃ mena caroaro mani ána.
10 Yoaro mee mani ca-bʉtiri rʉmʉri cõona mani pacʉa mani ca-beoyupa na ca-boo tʉgooñari wamere.
Dio maca caroa majuu mani beomi,
caroaʉ cʉ̃ ca-anore bairona caroarã mani ca-anicõa aniparore bairo ĩi.
11 Caroa jetore na áparo ĩi manire cʉ̃ ca-popiyeyeri paʉ mani wariñuuquẽna.
Mani tʉgooñarique pairãa.
To bairo ca-tamuoricarã anibana quena manire cʉ̃ ca-popiyeyero bero caroarã mani ani ocabʉti yua.
El peligro de rechazar la voz de Dios
12 To bairi popiye tamuorique mʉjaare to ca-anibato quena yeri ocabʉtiya mʉjaa.
Diore apiʉja janaquẽja.
13 Cariape Dio cʉ̃ ca-boori wame ája.
Aperã mʉja mena macana Diore ca-apiʉjarã cʉ̃ ca-boori wame cá-áti ocabʉtiquẽnare na átinemoña.
Ocabʉtirique na buioya,
mʉjaare bairona cariape Dio cʉ̃ ca-boori wame jetore na cá-áti majiparore bairo ĩirã.
14 Aperã nipetiro mena caroaro anicõaña,
ame ĩi punijiniquẽnana.
“Mani Ʉpaʉ Jesú caroaʉ majuu cʉ̃ ca-aniere bairo seeto yʉ aniga,”
ĩi tʉgooñaña.
Caroarã jeto cʉ̃ tʉpʉre cʉ̃ ca-tʉjʉparã ãma.
15 Ame buio ocabʉtioya mʉjaa,
jicãʉ mani mena macacʉ Dio ye caroa ãnaje áti ocabʉti wariñuuquetiremi ĩirã.
To bairo cá-áti ani wariñuuquẽcʉ cʉ̃ ca-ãmata punijiniri aperãre Cristore ca-apiʉjarã cʉti poa macanare na rooye tuuboʉmi.
Weje macajere oteriquere caroorije witi,
ca-puti rooye tuurore bairona Cristore ca-apiʉjarã watoapʉ jicãʉ to bairona ca-ãcʉ̃ cʉ̃ ca-ãmata capaarã aperãre na rooye tuuboʉmi.
16 Caroorije cá-áti eperã aniqueticõaña.
Dio yere ca-nʉcʉbʉgoquẽnare bairo aniqueticõaña.
To bairona Dio yere ca-nʉcʉbʉgoquẽcʉ ca-añupʉ Esaú ca-wamecʉcʉ tirʉmʉpʉ macacʉ.
Ca-jʉgocʉ aniri cʉ̃ baire ca-rotipaʉ,
cʉ̃ pacʉ yere ca-cʉgo ʉjapaʉ ca-anibajupʉ.
To bairo ca-jʉgo anipaʉ anibacʉ quena tiere cʉ̃ ca-anibope ca-maiquẽjupʉ.
To bairi jicã rʉmʉ ñigo riabacʉ ʉgariquere seeto ca-booyupʉ.
To bairo cʉ̃ ca-bairo tʉjʉʉ cʉ̃ bai maca,
“Mʉ yʉ nuugʉ.
Ca-jʉgocʉ aniri mʉ ca-cʉgo anibopere cabero yʉ mʉ ca-joata mʉ yʉ nuugʉ,”
cʉ̃ ca-ĩiñupʉ Esaúre.
To bairo cʉ̃ ca-ĩiro:
“Caberopʉ yʉ ca-anibope yʉ mai tʉgooñaquẽe.
Mʉ maca ca-cʉgo ʉjapaʉ ãña,”
cʉ̃ ca-ĩiñupʉ Esaú cʉ̃ baire.
“Baiyupa nemoo ʉgariquere yʉ jooya.
Ca-jʉgocʉ aniri yʉ ca-jʉgo aniboriquere mʉ yʉ joogʉ ʉgarique wapa,”
cʉ̃ ca-ĩiñupʉ Esaú cʉ̃ baire,
Dio yere cʉ̃ ca-cʉgobopere nʉcʉbʉgoquetibacʉ.
17 Cabero caroare boobacʉ dope bairo cʉ̃ baire cʉ̃re cʉ̃ ca-ĩrica wamere cá-áti wajoa majiquẽjupʉ.
Cʉ̃ pacʉre tʉgooñarique pairique mena cʉ̃ ca-jenirije to ca-anibato quena cʉ̃ pacʉ,
“Ca-jʉgocʉ ãnajere cʉgoya mʉa,”
cʉ̃ ca-ĩi majiquẽjupʉ.
Ti wame caroaro mʉja maji.
18-19 Mʉjaa Diore áti nʉcʉbʉgogarã,
mani ñicʉa Israel maja na cá-átatore bairo mʉja átiquẽe.
Na maca Dio cʉ̃ ca-wadarijere apigarã,
cʉ̃ áti nʉcʉbʉgogarã ca-ejayuparã ʉ̃taʉpʉ ati yepapʉ ca-aniipʉ.
Ejarã seeto ca-ʉ̃rije,
bujeri ca-tʉjʉyuparã.
Bujeri mena ca-naitĩañupe.
Wino ca-papuyupe.
To bairo ca-uwiorijere na ca-tʉjʉri paʉna tutuaro putiricaro ca-bʉjʉrijere ca-apiyuparã.
Tutuaro to ca-bʉjʉrona Dio cʉ̃ ca-wadarije quenare ca-apiyuparã.
Tie ca-uwiorijere acʉabana,
“To cõona Dio jãare cʉ̃ ĩinemoqueticõato,”
ca-ĩiñuparã.
20 Seeto uwibana ca-nʉca majiquẽjuparã.
Oco bairije na ca-rotiyupʉ Dio:
“Jicãʉ atii ʉ̃taʉre cʉ̃ ca-pañaata ʉ̃ta rupaa mena cʉ̃ ree jĩacõaña.
Waibʉcʉ quenare atiire cʉ̃ ca-pañaata ʉ̃ta rupaa mena ree jĩacõaña cʉ̃ quenare,”
ca-ĩiñupʉ Dio.
To bairo cʉ̃ ca-ĩiro apirã ca-nʉca majiquẽjuparã naa.
21 Moisé quena Dio cʉ̃ ca-anii ʉ̃taʉpʉ to bairo ca-bairijere tʉjʉʉ,
“Seeto uwibacʉ yʉ nanaabʉja,”
ca-ĩiñupʉ Moisé quena.
22-23 Mʉja maca Diore cʉ̃ áti nʉcʉbʉgorã na cá-átatore bairo mʉja átiquetinucu.
Mʉja maca Diore jeni nʉcʉbʉgorã cariape cʉ̃ mʉja wada cʉ̃ tʉ ca-ãna ʉmʉrecóopʉ ca-ãna cʉ̃ na cá-áti nʉcʉbʉgorore bairona.
To bairi Dio ca-catí majuʉ ya maca ca-aniparã mʉja ãa.
Topʉ apeĩ ʉ̃taʉ Sión ca-wamecʉtii ca-ani paʉpʉ ape maca ʉmʉrecóopʉ ca-ani maca Jerusalén na ca-ĩri macapʉ Dio mena mʉja anigarã.
Meere topʉ ca-ãnare bairona cariape cʉ̃ mʉja jeni nʉcʉbʉgo Diore.
Ángel maja capaarã majuu mena,
aperã nipetirã Dio yarã mena jõ buipʉ ca-ani macapʉ mʉja neñapogarã.
Nare cʉ̃ punaare na wamerire na uca tuuricʉmi ʉmʉrecóopʉre.
Cʉ̃ maca nipetirã Ʉpaʉ ãmi Dio.
Mʉja quena cʉ̃ mena macana mʉja ãa.
“Yʉ yarã,”
Dio cʉ̃ ca-ĩi tʉjʉrã,
ca-ñuurã cʉ̃ ca-ĩi tʉjʉrã nipetirã cʉ̃ yarã cʉ̃ mena Dio tʉpʉ anigarãma.
To bairi topʉre ca-neñaporã menare mani ca-aniparore bairona nemoona cariape cʉ̃ mena ca-wadarã mani ãa.
24 To bairi mani Ʉpaʉ Jesú mena macana mʉja ãa mʉja quena.
Cawama wame Dio,
“Na yʉ netoo catíogʉ,”
cʉ̃ ca-ĩricarore bairona Jesú maca mani catíomi.
Cʉ̃ ca-rií yajibojarique mena mani netoo catíomi Jesú.
Tirʉmʉpʉ macacʉ Abel ca-wamecʉcʉ maca ca-rií yajiyupʉ cʉ̃ jʉgocʉ cʉ̃re cʉ̃ ca-jĩaro.
To bairi cʉ̃ ca-jĩarique wapa cʉ̃ jʉgocʉre cʉ̃ ca-popiyeyeyupʉ Dio.
Jesú manire cʉ̃ ca-rií peti yajibojarica wame maca caroa wame jʉgori caroorije mani ye buire majiriomi Dio.
25 To bairi tiere caroa wame Dio cʉ̃ ca-ĩrijere caroaro cʉ̃ apiya.
Cʉ̃ bai botioquẽja.
Tirʉmʉpʉ Moisé ati yepapʉ ãcʉ̃ Dio cʉ̃ ca-rotirijere na cʉ̃ ca-buioro cʉ̃ ca-apigateeyuparã Israel maja.
To bairo cʉ̃ na ca-bai botiorije wapa Dio na ca-popiyeyeyupʉ.
To bairo na cʉ̃ ca-popiyeyericaro netoro na popiyeyegʉmi Dio Jesú macare ca-bai botiorãre.
Jesú maca ʉmʉrecóopʉ ca-ãnacʉ ca-ejayupi,
caroa wame buioʉ acʉ́.
To bairi caroaro cʉ̃ ca-buiorica wamere apiya.
26 Tirʉmʉpʉ Israel majare Dio na cʉ̃ ca-ĩi buiori paʉna ati yepa ca-nanaañupe.
Cabero oco bairi wame ca-ĩi buioyupi Dio:
“Cabero ati yepa to ca-nanaaro yʉ átigʉ tunu.
Ʉmʉrecoo quenare yʉ nanaogʉ,”
ca-ĩi buioyupi Dio.
27 To bairo ati yepa,
ati ʉmʉrecóo quenare yʉ nanaogʉ ĩi,
ati ʉmʉrecóo macaje nipetiro cʉ̃ cá-átaje cʉ̃ ca-reepere mani majiogami.
Ʉpaʉ cʉ̃ ca-anie jeto wajoa majiquetigaro.
Tie jetore reequetigʉmi Dio.
28-29 Ʉpaʉ cʉ̃ ca-anopʉ,
cʉ̃ ca-rotiri paʉ macana ca-aniparã mani ãa.
Ti paʉ macaje wariñuuriquere ca-cʉgoparã mani ãa.
To bairi tie Ʉpaʉ cʉ̃ ca-anie ca-wajoaquetipere majirã Diore cʉ̃ mani wariñuurã.
Cʉ̃ ca-boori wame caroaro mani ána.
Pe ca-ʉ̃rije ca-uwiorore bairona Diore ca-bai botiorãre na cʉ̃ ca-popiyeye reepe quena uwiobʉja.
To bairi mania caroaro cʉ̃ nʉcʉbʉgori cʉ̃ ca-boorije jetore mani ána.