Cómo agradar a Dios
13
Jicãʉ punaa na ca-bairore bairona ame maicõa aninucuña,
Jesucristore ca-apiʉjarã aniri.
2 Mʉja tʉpʉ ca-ejarã caroaro na boca tʉjʉya,
mʉja ca-majiquẽna na ca-anibato quena.
Mʉja tʉpʉ na ani rotiya.
Tirʉmʉpʉre to bairona jicãʉ na ca-ani rotii tʉpʉre ca-ejayuparã Dio tʉ macana ángel maja.
Cʉ̃ maca,
“Dio tʉ macana ãnama,”
ca-ĩi tʉgooña majiquẽjupʉ.
3 Cristore ca-apiʉjarãre presopʉ ca-joo ecoorãre na tʉgooña mairi na átinemoña.
Na mena presopʉ ca-ãnare bairona nare tʉgooñaña.
Aperã rooro na cá-ánare na tʉgooña maiña.
Mʉja quena nare bairona ca-tamuorãre bairona na tʉgooña maiña.
Na átinemoña,
mʉja quena na mena macana Cristore ca-apiʉjarã aniri.
4 Caroorije cá-áti eperã aniqueticõaña.
To bairo ca-bairãre na popiyeyegʉmi Dio.
To bairi nʉmocʉti nʉcʉbʉgoya mʉjaa.
5 Niyerure ca-boo netorã aniqueticõaña.
Oco bairo Dio cʉ̃ ca-ĩrica wame tʉgooñaña:
“Mʉ yʉ aáweoquetigʉ.
Mʉ yʉ átinemonucugʉ,”
ca-ĩiñupi Dio.
To bairi apeye unie,
meere mʉja ca-cʉgori wame cõoacãrena cʉgo wariñuuña.
Pairo boonemoquẽja.
6 To bairi ñe unie tʉgooñarique pairique manona oco bairo ĩi ucarica wamere ca-tʉgooñape ãa:
Mani Ʉpaʉ manire cá-átinemoʉ ãmi.
To bairi ñeere mani uwiquẽe.
Camaja manire na ca-rooye tuugarije to ca-anibato quena mani uwiqueticõagarã.a
7 Mʉjaare Dio ye quetire ca-buio jʉgoricarã,
Dio yere mʉjaare ca-jʉgo átanare na tʉgooñaña.
Caroaro na ca-ãnajere Cristore na ca-apiʉjariquere tʉgooñaña.
To bairo tʉgooñari na ca-bairiquere bairona baiya.
8 Jesucristo ca-wajoaquẽcʉ ãmi.
Tirʉmʉpʉ cʉ̃ ca-bairiquere bairona yucʉ quenare baimi.
To canacã rʉmʉ to bairona anicõa aninucugʉmi.
Cʉ̃ quetire wajoaquẽemi.
9 To bairi aperã ricati na ca-ĩi buioro na apiqueticõaña,
cariape ca-aniere Jesú ye quetire mani tʉgooña janare ĩirã.
To bairi aperã,
“Atie ʉgarique boje rʉmʉ macajere ʉgarã ca-ocabʉti yericʉna,
caroarã Dio cʉ̃ ca-tʉjʉ wariñuurã mʉja anigarã,”
mʉja na ca-ĩiro na api nʉcʉbʉgoqueticõaña.
Dio jeto manire ca-tʉgooña yeri ocabʉtioʉ ãmi.
To bairi caroarã ca-tʉgooña yeri ocabʉtirã,
caroarã anigarã,
cʉ̃ ca-anie ca-ñuurije jetore tʉgooñaña mʉjaa.
10 Cristo manire ca-bai yajibojayupi,
cʉ̃ yarã ca-ñuurã mani ca-aniparore bairo ĩi.
Cabʉcʉ wame Moisé cʉ̃ ca-rotirica wame maca manire netoo catío ocabʉtiquẽjupa.
To bairi ti wamere cá-ána Dio yarã caroarã anigari ti wamere cá-ána anibana quena mani mena Dio yarã ani majiquẽema.
11 Judío maja yarã sacerdote maja oco bairo áama Moisé cʉ̃ ca-rotiriquere ána:
Waibʉcʉre jĩa átiri cʉ̃ riíre jee jãama Dio wii cʉ̃ ca-ani arʉa majuu na ca-ĩiropʉ.
Jee jãa,
Diore,
“Atie camaja caroorije na cá-átie wapa ãa.
Na caroorijere na majiriobojaya,”
ĩima.
Tiere ti arʉapʉ Diore joo átiri,
cʉ̃ rupaʉ macare jõopʉ macá tʉjaropʉ ne aáti joema.
To bairona áama sacerdote maja Moisé cʉ̃ ca-rotiriquere ána.
12 To bairona Jesú quena maca tʉjaropʉ ca-popiye tamuo bai yajibojayupi manire.
Topʉ ca-rií yajibojayupi caroorije mani cá-átiere wapaye reebojaʉ.
13 To bairi mani quena camaja na ya maca cá-aá weorãre bairona judío maja na ya wame na cá-átiere ca-jana reeparã mani ãa.
To bairi Jesú macare apiʉja nʉcʉbʉgori judío maja na ca-ĩri wamere mani ca-apiquetipe ãa.
To bairo mani ca-bairo tʉjʉrã Jesúre rooro cʉ̃ na ca-ĩricarore bairona mani quenare rooro mani ĩigarãma cʉ̃ ye quetire ca-booquẽna maca.
14 Cʉ̃re ca-booquẽna mena macana mee mani ãa,
Dio yarã aniri.
To bairi ati yepapʉ na mena yoaro mani ca-anipa maca maa.
Na ya macari yajigaro.
Caberopʉ Cristo mena to canacã rʉmʉ cʉ̃ ca-anicõa ani macapʉ ca-aniparã mani ãa.
15 Jesú caroorije mani cá-átiere manire cʉ̃ ca-wapayebojaro maca mani majuuna Diore ca-jeni nʉcʉbʉgorã mani aninucu.
To bairi Diore ca-jeni nʉcʉbʉgorã aniri,
“Waibʉcʉrã Diore mani ca-jooro wariñuugʉmi Dio,”
mani ĩi tʉgooñaquẽe.
“Jã Ʉpaʉ mʉ ãa.
Ca-ñuu netoʉ mʉ ãa,”
cʉ̃ mani ca-ĩiro wariñuugʉmi Dio.
To bairi wame cʉ̃ ĩirã wariñuuriquere cʉ̃ mani joogarã.
16 Caroaro ca-ame átinemo aninucupe ãa.
To bairi wame mani cá-áto tʉjʉri wariñuugʉmi Dio.
17 Jesú ye quetire ca-buio jʉgorãre na nʉcʉbʉgoya.
Na ca-buiorijere apiʉjaya.
Diona mʉjaare ca-coteparãre na ca-cũuñupi,
ape wame macare apiʉjarema ĩi.
To bairi caroaro mʉja ca-apiʉjaro tʉjʉrã wariñuurique mena Diore boca yʉʉgarãma mʉjaare ca-buio jʉgorã.
Mʉja ca-aniere na cʉ̃ ca-jeniñari paʉ,
“Caroaro apiʉjama,”
cʉ̃ ĩi buio majigarãma Diore.
Mʉja ca-apiʉjaquẽtato bero to ca-ãmata jʉtiritiri Diore buiogarãma ca-ñuuquẽtie mʉja cá-átajere tʉgooñari.
To bairi na ca-rotirijere caroaro ája.
18 “Dio cʉ̃ ca-boori wame cõona jã áa,”
jã ĩi tʉgooñanucu.
To bairi Diore jã jenibojanucuña,
caroa jeto jã cá-átiparore bairo ĩirã.
19 Yucʉacana mʉja tʉpʉ yʉ ca-tunu aáparore bairo tie quenare Diore yʉ jenibojaya.
Bendición y saludos finales
20-21 Mani Ʉpaʉ Jesú waibʉcʉrã oveja na ca-ĩirãre ca-coteire bairona caroaro majuu mani cotemi.
Manire ca-rií peti yajibojayupi,
camajare na yʉ netoo catíogʉ ĩi.
Cʉ̃ ca-bai yajirique to ca-anibato quena Dio cʉ̃ ca-tunu catíoyupi,
ca-tutuaʉ aniri.
Dio,
caroa ãnajere ca-joʉ mʉjaare átinemogʉmi,
nipetiro caroa jeto,
cʉ̃ ca-boorije jeto mʉja cá-átiparore bairo ĩi.
Jesú jʉgori,
ca-ñuurã,
cʉ̃ ca-boori wamere bairona cá-ána manire cʉ̃ áticõato Dio.
To bairi Jesucristo to canacã rʉmʉ mani cá-áti nʉcʉbʉgocõa anipaʉ ãmi.
Amén.
22 Yʉ yarã,
atie queti petoacã ãa yʉ ca-buio joorije.
To bairi tiere caroaro api peocõaña.
23 Mani yaʉ Timoteore na ca-preso jooricʉre,
meere cʉ̃ buuyuparã.
To bairi yucʉacana yʉ tʉpʉ cʉ̃ ca-ejaata cʉ̃ yʉ ne aágʉ,
mʉja tʉpʉ aácʉ.
24 Jesú ye quetire mʉjaare ca-buio jʉgorã na ñuato.
Aperã Cristore ca-apiʉjarã nipetirã na quena na ñuato.
Italia macana Cristore ca-apiʉjarã ñuu rotima mʉjaare.
25 Dio nipetirã mʉjaare caroaro cʉ̃ átibojaato mʉja nipetirore.
To cõona ãa.