3 Ati ʉmʉrecóo nipetirijere cá-ájupi Dio,

“To ãmaro,”

ĩi wadaʉ.

Apeye unie mena mei cá-ájupi Dio ati yepa macaje nipetiro ca-baurijere.

Apeye unie ca-baurije to ca-manibato quena nipetiro cá-ájupi.

Caroaro tiere mani maji cʉ̃re api nʉcʉbʉgori,

cʉ̃re ca-tʉjʉquẽna anibana quena.

4 Abel ca-wamecʉcʉ tirʉmʉpʉ macacʉ Diore api nʉcʉbʉgori waibʉcʉ oveja na ca-ĩire ca-jĩa joe buje mʉgo jooyupʉ Diore.

Cʉ̃ ca-joorije macare ca-tʉjʉ wariñuuñupʉ Dio cʉ̃ jʉgocʉ Caín ye netoro.

To bairi Dio cʉ̃ ca-tʉjʉ wariñuuñupʉ Abel're.

Cʉ̃ tʉjʉ wariñuʉ,

“Abel caroaʉ ãmi,”

cʉ̃ ca-ĩi tʉjʉyupʉ.

To bairi Abel tirʉmʉpʉ ca-bai yajiricʉ cʉ̃ ca-anibato quena,

“Caroaro Diore ca-api nʉcʉbʉgoʉ ãnacʉmi,”

mani ĩi maji.

To bairi mani quena,

“Abel're bairo Diore mani ca-api nʉcʉbʉgoro caroaro mani átibojagʉmi Dio,”

mani ĩi maji.

5 Enoc ca-wamecʉcʉ cʉ̃ quena Diore cʉ̃ ca-api nʉcʉbʉgoro tʉjʉʉ cʉ̃ ca-tʉjʉ wariñuuñupʉ Dio.

Cʉ̃ tʉjʉ wariñuʉ cʉ̃ tʉpʉ cʉ̃ ca-pii mʉgo jooyupʉ ca-bai yajiquẽcʉrena.

Cʉ̃re cʉ̃ ca-pii mʉgo jooro bero camaja cʉ̃ ca-bʉgaquẽjuparã,

cʉ̃ macabana quena.

To bairona ĩi Dio Wadarique Enoc're Dio cʉ̃re cʉ̃ ca-tʉjʉ wariñuuriquere.

6 Diore mani ca-api nʉcʉbʉgoquẽpata mani tʉjʉ wariñuuquẽemi.

Cʉ̃re api nʉcʉbʉgoquẽna cʉ̃ yarã mani ani majiquẽe.

“Jocʉ me ãcʉmi Dio.

Cʉ̃re seeto yʉ ca-tʉgooña macaro yʉ majiogʉmi cʉ̃ ca-aniere,”

ca-ĩi tʉgooña api nʉcʉbʉgope ãa,

caroaro cʉ̃ mena macana anigarã.

7 Noé ãnacʉ quenare,

“Ca-ñuʉ ãmi,”

cʉ̃ ca-ĩi tʉjʉ wariñuuñupʉ Dio cʉ̃re cʉ̃ ca-api nʉcʉbʉgoro tʉjʉri.

To bairi ati yepare rooro cʉ̃ cá-átipere cʉ̃ ca-buioyupʉ Dio Noére.

To bairo Dio cʉ̃re cʉ̃ ca-buioro caroaro cʉ̃ ca-api nʉcʉbʉgoyupʉ Noé,

mai ca-baipere tʉjʉquetibacʉ quena.

Caroaro cʉ̃ api nʉcʉbʉgori cumua ca-pairica ca-quenooñupʉ.

Quenoʉ,

caroorãre Dio na cʉ̃ ca-reepere na ca-buiobajupʉ Noé.

Tia mena cʉ̃ ya wii macanare na ca-jʉgo catíyupʉ Noé ati yepa ca-ruaropʉ.

8 Ape wame queti buiorica wame tunu:

Dio Abraham're ape yepapʉ cʉ̃ ca-joopa yepapʉre,

“Aácʉja,”

cʉ̃ ca-ĩiro Abraham cʉ̃ ca-yʉʉyupʉ,

cʉ̃ api nʉcʉbʉgoʉ.

Cʉ̃ ya maca ca-ãnacʉ ca-buti aájupʉ,

cʉ̃ ca-majiquẽtopʉ aágʉ.

9 Aá,

topʉ ca-ejayupʉ.

Eja,

“Ati yepare mʉ yʉ joogʉ,”

Dio cʉ̃ ca-ĩricaropʉ ca-añupʉ.

Apero macacʉ anibacʉ quena ti yepapʉ ca-tuayupʉ,

Dio cʉ̃re cʉ̃ ca-ĩi cũuriquere api nʉcʉbʉgoʉ.

Ti wamere bairona ca-buioyupʉ Dio Abraham macʉ Isaáre,

cʉ̃ pãramipʉ Jacobopʉ quenare.

“Ati yepare mʉjaare yʉ joogʉ,”

na ca-ĩi buioyupʉ Dio.

To bairi Abraham,

na quena ti yepapʉ ãnaa waibʉcʉ ajeri wiiri yoaro me ãna wiiripʉ ca-aninucuñuparã.

10 To bairi Diore api nʉcʉbʉgori Dio ya paʉ majuu ãnaje macare ca-tʉgooñañupʉ Abraham.

Ca-petiqueti paʉ Dio cʉ̃ majuuna cʉ̃ ca-quenoori macapʉre cʉ̃ ca-anipe macare ca-tʉgooñañupʉ.

11 Cʉ̃ nʉmo Sara cõ quena Diore ca-api nʉcʉbʉgoyupo.

Ca-punaa máco,

seeto cabʉcʉo anibaco quena,

“Dio yʉre cʉ̃ ca-ĩri wame yʉ átibojagʉmi,”

Diore ca-ĩi tʉgooña nʉcʉbʉgoyupo.

To bairi cõ cá-átinemoñupʉ Dio.

Cõre cʉ̃ cá-átinemoro ca-macʉ cʉjupo yua.

12 To bairi Abraham ca-wamecʉcʉ seeto cabʉcʉ ca-punaa mácʉ cʉ̃ ca-anibato quena cʉ̃ macʉ ca-buiayupʉ.

To bairi capaarã cʉ̃ pãramerã ca-añuparã.

To bairi ñocoare,

pa rupaariacã quenare ca-cõoña peo majiña manore bairona cʉ̃ pãramerã cʉ̃ bero macanare cõoña peo majiña maa.

13 Naa yʉ ca-ĩirã nipetirã Diore ca-api nʉcʉbʉgorã,

“Mʉjaare yʉ joogʉ,”

cʉ̃ ca-ĩrique mai na cʉ̃ ca-jooquẽtopʉna ca-bai yaji peticoajuparã.

Dio na cʉ̃ ca-joopere tʉgooña ocabʉtiri ca-wariñuuñuparã.

“Ati yepa jã ya paʉ me ãa.

Ape yepapʉ Dio ya paʉ maca ãa jã ca-ani majuupa maca,”

ca-ĩi tʉgooñañuparã.

14 To bairo ca-ĩi tʉgooñarã ape yepa to canacã rʉmʉ na ca-anicõa aninucupa yepa macare ca-tʉgooñarã ãma.

Caroaro tiere mani maji.

15 Na ca-buti aáweorica macare ca-tʉgooñarã na ca-ãmata to bairona ca-tʉgooña tunurã aniboricarãma.

16 Na ca-buti aáweorica macare tʉgooñaquetiri ape yepa ca-ñuu netori yepa macare ca-boorã ca-añuparã,

jõ bui ʉmʉrecóopʉ na ca-anipere.

To bairo ca-tʉgooñarãre,

“Mani Ʉpaʉ ãmi Dio,”

ca-ĩirãre na tʉjʉ wariñuʉmi Dio.

Na tʉjʉ wariñuʉ,

na ca-anipa macare,

meere na quenoobojaricʉmi Dio.

17-19 Abraham're,

“Isaá mʉ ca-macʉcʉto capaarã mʉ pãramerã anigarãma,”

cʉ̃ ca-ĩiñupʉ Dio.

To bairo ca-ĩricʉ anibacʉ quena cʉ̃ macʉ Isaáre cʉ̃ ca-jĩa joe buje mʉgo joo rotiyupʉ Abraham're,

¿caroaro yʉre ca-api nʉcʉbʉgo majuʉna cʉ̃ ãtí?

ĩi.

To bairo Dio cʉ̃ cá-áti rotiro Abraham cʉ̃ macʉ jicãʉna ca-ãcʉ̃re cʉ̃ ca-jĩa joe buje mʉgoboyupʉ.

“Cʉ̃re yʉ ca-jĩarije to ca-anibato quena Dio cʉ̃ tunu catíogʉmi,”

ca-ĩi tʉgooñañupʉ Abraham.

To bairi cʉ̃ macʉre cʉ̃ ca-jĩagari paʉ majuuna Dio cʉ̃ ca-matayupʉ,

caroaro cʉ̃ ca-api nʉcʉbʉgoro tʉjʉri.

To bairi Isaáre cʉ̃ ca-netooñupʉ Dio,

ca-bai yajiboʉre.

Cʉ̃ netooʉ,

Abraham're cʉ̃ ca-tunuoñupʉ cʉ̃ macʉre.

To bairo ca-yajiboʉre cʉ̃ netooʉ Abraham're cʉ̃ ca-majioñupʉ mani camaja ca-yajiborãre Dio cʉ̃ ca-netoopere yua.

20 Cabero Isaá Diore api nʉcʉbʉgoʉ cʉ̃ punaa pʉgarãre Jacobo,

Esaú ca-wamecʉnare,

“Cabero Dio caroaro mʉja átibojagʉmi,”

na ca-ĩiñupʉ.

21 Isaá bero tunu Jacobo cabʉcʉ ãcʉ̃pʉ bai yajigʉpʉ cʉ̃ pãramerã José punaare,

“Caroaro mʉja átibojagʉmi Dio,”

na ca-ĩiñupʉ.

Ĩi,

cʉ̃ tuaricʉ mena tuatu mubia cumuri Diore ca-ĩi nʉcʉbʉgoyupʉ Jacobo.

22 Jacobo bero tunu José,

Diore api nʉcʉbʉgori bai yajigʉpʉ ca-buio weoyupʉ Israel maja Ejiptopʉ ca-ãna na ca-buti aápere.

To bairi Ejiptopʉre na ca-buti aáweopere tʉgooñari cʉ̃ punaare,

“To aánapʉ yʉ õwa ãnajere mʉja jee aágarã,”

na ca-ĩiñupʉ.

23 Caberopʉre Moisé cʉ̃ ca-buiaro cʉ̃ pacʉa itiarã muipua cʉ̃ ca-yajioyuparã,

Diore api nʉcʉbʉgorã.

Caroaʉ cʉ̃ ca-ano tʉjʉrã,

“Cʉ̃ jʉgori caroaro átigʉmi Dio,”

ca-ĩi tʉgooña nʉcʉbʉgoyuparã Diore.

To bairi Ejipto macana ʉpaʉ caʉmʉa niñaacãre na cʉ̃ ca-jĩa rotirije to ca-anibato quena uwiquẽnana cʉ̃ ca-yajioyuparã.

24 Moisé cabʉcʉ ãcʉ̃pʉ Diore ca-api nʉcʉbʉgoʉ ca-añupʉ.

To bairi Ejipto macana ʉpaʉ maco cõ majooricʉ anibacʉ quena,

“Ʉpaʉ maco macʉ ãmi,

ʉpaʉ pãrami ãmi,”

cʉ̃ na ca-ĩipe ca-booquẽjupʉ.

25 “Dio yarã mena macacʉ maca yʉ anigʉ.

Na menare yʉre na ca-popiyeyepe to ca-anibato quena Dio yarã mena macacʉ yʉ anigʉ,”

ca-ĩi tʉgooñañupʉ.

Ĩi tʉgooñari Ejipto macana mena caroorije áti wariñuurique macare ca-booquẽjupʉ.

“Na mena yʉ cá-áti ãmata yʉ wariñuucõa aninucuquetiboʉ,”

ca-ĩi tʉgooñañupʉ.

26 To bairo ca-ĩi tʉgooñaʉ cʉ̃ ca-ano rooro cʉ̃ ca-ĩi epeyuparã Ejipto macana.

Cristo,

Dio cʉ̃ ca-joopaʉre cʉ̃ na cá-átiparore bairona cʉ̃ ca-ĩi epeyuparã Moisére.

To bairo cʉ̃ na ca-ĩi eperije to ca-anibato quena,

“Caberopʉ caroa majuu ca-anie Dio yʉre cʉ̃ ca-joope Ejipto macana na ye na apeye unie netoro caroa anigaro,”

ca-ĩi tʉgooñañupʉ.

27 Diore api nʉcʉbʉgori Ejipto yepapʉ ca-ãnacʉ ca-butiyupʉ Moisé.

Ejipto macana ʉpaʉ cʉ̃ ca-punijinirije to ca-anibato quena cʉ̃ ca-uwiquẽjupʉ Moisé.

Dio camaja na ca-tʉjʉquẽcʉ cʉ̃ ca-anibato quena,

“Yʉ mena ãcʉmi.

Caroaro átigʉmi,”

ca-ĩi tʉgooña ocabʉtiyupʉ.

28 Moisé Diore ca-api nʉcʉbʉgoʉ cʉ̃ ca-ano Dio cʉ̃ ca-majioñupʉ Ejiptopʉ to canacã wii macanare ca-buia jʉgoricarãre na cʉ̃ ca-reepere.

To bairo cʉ̃ majioʉ,

“Oco bairo na áparo,”

cʉ̃ ca-ĩiñupʉ Dio.

“To canacã wiipʉrena na jope turicaroripʉ waibʉcʉ riíre Israel maja na tuato.

Tiere na ca-turo to canacã wiirena riíre na ca-turiquere tʉjʉri yʉ netogʉ,

ca-buia jʉgoricarãre reequẽcʉna.”

To bairo cʉ̃re cʉ̃ ca-ĩi buioriquere api nʉcʉbʉgori Moisé Dio cʉ̃re cʉ̃ ca-ĩricarore bairona na cá-áti rotiyupʉ Moisé Israel majare.

To bairi to canacã wiipʉrena na jope turicaroripʉ waibʉcʉ riíre ca-tuuyuparã.

To bairi Moisé caroaro cʉ̃ ca-api nʉcʉbʉgoro tʉjʉri ca-buia jʉgoricarãre cʉ̃ ca-reeboricarãre ca-reequẽjupʉ Dio Israel majare.

Ejipto macana jetore na ca-reeyupʉ,

riíre na ca-tuqueta wiiri macanare.

29 Cabero Israel maja Diore api nʉcʉbʉgorã Mar Rojo na ca-ĩri ya ca-pairi ya majuu ca-peñañuparã.

Ca-oco mani yepa aátatore bairona ca-peñañuparã.

To bairo na cá-aáto tʉjʉrã Ejipto macana na quena na cá-aáta wãarena ca-ʉjabajuparã,

na ñeegarã.

To bairo baibana ca-rua yaji peticoajuparã.

30 Cabero Israel maja Dio na cʉ̃ cá-átibojapere na ca-api nʉcʉbʉgoro Jericó na ca-ĩri maca ʉ̃ta rupaa mena na ca-werica janiro ca-ʉmʉari janiro ca-ñañupe.

Siete rʉmʉri ti janirore na cá-aá amojorero ca-ñañupe.

31 To bairo ca-baiparo jʉgoye ti maca macaco Rahab Diore api nʉcʉbʉgo,

Israel maja yajioro cõ ya macare na ca-tʉjʉra ejaro cõ ya wiipʉ na ca-jãa rotiyupo.

Ca-jʉgoyepʉ caʉmʉa mena cá-áti eperico anibaco quena Dio cõ ya maca macanare cʉ̃ ca-reepere ca-api nʉcʉbʉgoyupo.

To bairi cõ ya maca macana Diore ca-bai botiorã mena ca-bai yajiquẽjupo ti janiro ca-ñaro.

32 Aperã quenare Diore ca-api nʉcʉbʉgoricarã mʉjaare yʉ ca-ĩi buioboparã rʉjama.

Na cá-átaje mʉjaare yʉ ĩi uca buio peti majiquẽe.

Gedeón,

Baracʉ,

Sansón,

Jepté,

David,

Samuel,

aperã Dio ye quetire ca-buioricarã ãnana Diore ca-api nʉcʉbʉgorã ca-añuparã.

Na cá-átajere ca-buiope anibapa.

33 Jicãarã Diore api nʉcʉbʉgori ape yepa macanare na quẽrã na ca-netoñuparã.

Aperã caroaro ca-roti majirã ca-añuparã,

Diore api nʉcʉbʉgori.

Aperã Dio,

“Mʉjaare yʉ joogʉ,”

na cʉ̃ ca-ĩrica wamere yuu quepequetiri caberopʉ ca-cʉgorã ca-añuparã.

Aperã yaia nare na ca-ʉgagari paʉ na ca-ʉga majiquẽto cá-ájuparã.

34 Aperã na jĩa reegarã peero seeto ca-ʉ̃rijepʉre nare na ca-reero ca-ʉ̃ʉ̃quẽjuparã.

Diore ca-api nʉcʉbʉgorã na ca-ano maca na ca-netooñupʉ Dio.

Aperã ca-ruti majiñuparã na wapana nare na ca-jĩagari paʉ.

Aperã ca-tutuaquẽnare bairã anibana quena ca-yeri tʉgooña ocabʉtirã ca-añuparã,

Diore api nʉcʉbʉgori.

Aperã na wapana nare na ca-quẽro na ca-neto ocabʉtiyuparã.

Aperã apero macanare nare ca-jĩagabanare na ca-quẽ acʉo tunuoñuparã.

35 Aperãre cãromiare na yarã ca-ria yajicoatanare na ca-tunu catíobojayupʉ Dio cʉ̃re na ca-api nʉcʉbʉgoro maca.

Aperã Diore ca-api nʉcʉbʉgorã ca-tamuorã ca-añuparã.

Caroorã na ca-popiyeyeyuparã,

“Diore mʉja ca-api nʉcʉbʉgo janaata mʉjaare jã buugarã,”

ĩri.

To bairo na ca-ĩrije to ca-anibato quena,

“Diore jã tʉgooña nʉcʉbʉgo janaqueti majuucõa,”

ca-ĩiñuparã.

“Jãare mʉja ca-jĩarije to ca-anibato quena Dio tʉpʉ jã ani wariñuu netogarã,”

ca-ĩiñuparã.

36 Aperã Diore ca-api nʉcʉbʉgorãre rooro na ĩi eperi na ca-bapeyuparã wecʉ ajero wẽeri mena.

Aperãre come wẽeri mena na jiacõari na ca-preso jooyuparã.

37 Aperã Diore ca-api nʉcʉbʉgorãre ʉ̃ta rupaa mena na ca-ree jĩañuparã caroorã maca.

Aperãre yucʉ yijerica pãi mena na ca-yije ta jĩañuparã na recomacari.

Aperãre na ca-jare jĩañuparã.

Aperãre rooro na cá-ájuparã.

Camaja na ca-manopʉ na ca-cũu reyuparã.

To bairo na cá-ána waibʉcʉrã ajerina ca-jañañuparã,

jutii cʉgoquetibana.

Ñee unieacã cʉgoquetibana seeto ca-tamuoñuparã.

38 Ʉ̃ta yucʉpʉ,

ape paʉ ca-yucʉ manopʉ caroori paʉri majuu ca-bai teña tamuoñuparã.

Yeparina operipʉ,

ʉ̃ta totiripʉ quena ca-cani teñañuparã.

Ati yepa macana Diore ca-api nʉcʉbʉgoquẽna na netoro ca-ñuurã anibana quena to bairo ca-tamuoñuparã.

39 Nipetiro ati majare na ca-tʉjʉ wariñuuñupʉ Dio,

cʉ̃ na ca-api nʉcʉbʉgoro tʉjʉri.

To bairo caroaro Diore ca-api nʉcʉbʉgorã anibana quena nare Dio cʉ̃ ca-ĩi cũurica wame ca-cʉgoquẽjuparã mai.

“Caroare mʉjaare yʉ joogʉ,

caroa yepapʉ mʉja anicõagarã,”

na cʉ̃ ca-ĩrica wamere ca-cʉgoquẽna ca-añuparã mai.

40 Dio caroa majuu ca-anipa yepa joogʉmi.

Ti yepapʉ na ca-anipere ca-booyupʉ Dio.

Mani quenare ti yepapʉ mani ca-anipere boʉmi Dio.

To bairi na ãnana cʉ̃re ca-api nʉcʉbʉgorã na ca-anie to ca-anibato quena ti yepapʉ na ca-ani rotiquẽjupʉ Dio mai.

Caberopʉ mani menapʉ ti yepapʉ na cũugʉmi yua.