10
Dio Moisépʉre cʉ̃ ca-buiorica wame,
ati wame jeto camajare na yʉ átibojagʉ ĩi mee ca-ĩi cũuñupi Dio ti wamere.
Tie caberopʉ camajare na cʉ̃ cá-átibojapere ĩi buio majiorica wame ca-añupe.
To bairi camaja ti wame Dio cʉ̃ ca-roti jʉgoricarore bairona to canacã cʉma waibʉcʉrãre joe buje mʉgonucuma,
Diore cʉ̃ joori.
To bairo átinucubana quena Dio mena caroaro ani majiquẽema.
2 Camaja Diore cá-áti nʉcʉbʉgorã waibʉcʉrãre cʉ̃ na ca-joobato quena caroorije na cá-átajere ca-majirioquẽjupi Dio.
Cʉ̃ ca-majirioata jicãnina cʉ̃ joorã,
“Meere,
caroorije mana jã ãa,”
ĩi tʉgooña boricarãma.
To bairo ĩi tʉgooñari joonemoquetiboricarãma.
3 To bairi to canacã cʉma waibʉcʉrãre joe buje mʉgo joonucurã,
“Caroorije yʉ cá-átie ãno mai,”
ĩi tʉgooña majima.
To bairi Diore joo janaquẽema.
4 Wecʉa,
cabra jĩarique na rií wẽe yaye bate peorique mani camaja ye caroorijere yajio majiquẽe.
Waibʉcʉrãre Diore mani joobana quena to bairona mani yeripʉ caroorijecʉna mani aniborã.
5 To bairi Cristo ati yepapʉ camajocʉ cʉ̃ ca-buiaparo jʉgoye oco bairo Diore cʉ̃ ca-ĩiñupʉ:
Waibʉcʉrãre na ca-jĩa joe buje mʉgorije,
poca unie quena mʉre na ca-joorijere mʉ booquẽe mʉa.
To bairi camajocʉre bairona ca-rupaʉ cʉcʉre yʉ mʉ ca-rupeowʉ,
mʉre yʉ ca-joopa rupaʉre.
6 Camaja na caroorije yajiogarã mʉre waibʉcʉrãre na ca-jĩa joe buje mʉgo joorijere mʉ tʉjʉ wariñuuquẽe.
7 Tiere mʉ ca-wariñuuquẽto tʉjʉri oco bairo mʉ yʉ ĩiwʉ:
“Yepapʉ camaja tʉpʉ yʉ aágʉ,
mʉ ca-boori wamere átii aácʉ.
To bairona ĩi mʉ Wadarique ucarica pũuripʉ yʉ ca-baipere,”
yʉ ĩiwʉ,
ca-ĩiñupi Cristo cʉ̃ Pacʉre.a
8 To bairi,
“Camaja na caroorije yajiogarã mʉre waibʉcʉrãre na ca-jĩa joe buje mʉgo joorijere mʉ tʉjʉ wariñuuquẽe,”
ca-ĩiñupi Cristo,
Moisépʉre Dio cʉ̃ ca-roti jʉgoricarore bairona na cá-átie to ca-anibato quena.
9 Ti wame ĩi yaparo,
“Yepapʉ camaja tʉpʉ yʉ aágʉ,
mʉ ca-boori wamere átii aácʉ,”
ca-ĩiñupi.
To bairo ĩi,
Moisépʉre Dio cʉ̃ ca-roti jʉgorica wamere wajoami Jesú.
Wajoari cawama wamere manire ca-buioʉ ãmi Jesú.
10 Cawama wamere buioʉ Dio cʉ̃ ca-boori wame cá-ájupi Jesú.
Camajare bairona ca-rupaʉcʉcʉ ãcʉ̃pʉ jicãnina manire ca-bai yajibojayupi.
To bairo cʉ̃ ca-bairo tʉjʉri mani caroorijere majiriomi Dio.
To bairi,
“Yʉ yarã ãma.
Caroarã ãma,”
mani ĩi tʉjʉmi Dio.
11 Mani yarã judío maja yarã sacerdote maja maca to canacã rʉmʉ Diore joonucuma,
cʉ̃re áti nʉcʉbʉgorica wiipʉre topʉna anicõari.
To canacã rʉmʉ to bairo jeto waibʉcʉrãre jĩa,
na joe buje mʉgo,
Diore joonucuma.
To bairo na cá-átie to ca-anibato quena caroorije mani cá-átiere yajio majiquẽema.
12 Cristo maca jicãnina manire ca-bai yajibojayupi,
Diore joʉ.
Cʉ̃ majuuna Diore joori caroorije mani cá-átiere yajio majimi.
To bairi mani bai yajibojari bero Dio tʉpʉ cá-aácoajupi,
cʉ̃ menare ca-roti ruii anigʉ.
13 Topʉ Dio mena yuu ruimi cʉ̃ wapanare Dio na cʉ̃ ca-netoparo jʉgoye.
14 To bairi cʉ̃ yarãre jicãnina na bai yajibojaʉ to canacã rʉmʉ ca-ñuurã ca-anicõa aniparãre na ca-cũuñupi Cristo.
15 To bairi wame mani majiomi Dio Espíritu Santo oco bairo mani ĩi buioʉ:
16 “Israel macanare yucʉacã oco bairi wame cawama wame na yʉ buiogʉ,”
ĩmi mani Ʉpaʉ Dio,
ca-ĩiñupi Espíritu Santo.
“Cabero yʉ yere yʉ ca-rotirije caroaro na yʉ majiogʉ.
To bairi na yeripʉ caroaro apiʉjagarãma.
‘Dio cʉ̃ ca-boori wame jetore cariape mani ána,’
ca-ĩirã anigarãma,”b
ĩmi mani Ʉpaʉ Dio,
ca-ĩiñupi Espíritu Santo.
17 Oco bairo ĩmi tunu:
“Caroorije na cá-átaje,
yʉre na ca-bai botioriquere yʉ tunu tʉgooñaquetigʉ yua,”
ĩmi Dio,
ĩi buiomi Dio Espíritu Santo.c
18 To bairi mani caroorijere,
meere cʉ̃ ca-majirioro maca,
mani caroorije ca-wapaye peocõañupi ĩirã,
waibʉcʉrãre ca-jĩa joe buje mʉgo joonemoquetiparã mani ãa yua.
Debemos acercarnos a Dios
19-20 Dio wiipʉre Dio cʉ̃ ca-ani majuuri paʉ na ca-ĩiro,
yotorica ajero ʉjaropʉre ca-jãanucuñupʉ sacerdote maja ʉpaʉ cʉ̃ jetona.
Aperãre jãa rotiricaro mee ca-añupe.
To bairi ca-jãa uwinucuñuparã.
Yʉ yarã,
yucʉra mania ti ajero yotoricaro mani uwi majiquẽe,
Jesú manire cʉ̃ ca-rií yajibojaro maca.
Ti ajerore ca-neto jãa peticõarãre bairona Diore ca-wadarã jeto mani ãa yua.
Cawama wame mani ca-cũbojayupi Jesú,
to canacã rʉmʉ caroaro Dio mena mani ca-anicõa aninucuparore bairo.
21 Mani yaʉ sacerdote maja ʉpaʉ ca-ani majuʉ ãmi Cristo,
Dio yarã manire ca-jenibojaʉ.
22 To bairo manire cʉ̃ ca-jenibojaro maca Dio tʉna mani áti nʉcʉbʉgorã,
mani yeripʉ ĩi jocaquẽnana.
“Dio yaʉ yʉ ãa,
Cristo yʉ ye wapa cʉ̃ ca-bai yajibojaro maca,”
ĩi tʉgooñari cʉ̃re mani apiʉjarã.
“Oco ca-ʉgueri manie mena wamore ʉgueri coje reericarore bairona yʉ yeripʉre caroorijere yʉ coje reebojaya,”
mani ĩirã.
To bairo ĩri Dio tʉna cʉ̃re mani áti nʉcʉbʉgorã.
23 “Yʉ tʉpʉ caroarã ca-aniparãre mʉjaare yʉ cũugʉ,”
cʉ̃ ca-ĩricarore bairona mani átibojagʉmi.
To bairi,
“Jocʉ mee ĩmi,”
ĩirã,
caroaro mani apiʉja ocabʉtigarã.
“Cʉ̃re ca-apiʉjaʉ yʉ anigʉ,”
mani ca-ĩiepere mani majiritiquẽna.
24 Mani tʉgooña ame ocabʉtiorã.
Mani mena macanare na mairã nare mani átinemorã.
To bairo nare caroaro mani ca-bairo tʉjʉrã na quena aperãre mairã,
na átinemogarãma tunu.
25 To bairi Jesúre ca-apiʉjarã aniri mani neñaponucurã.
Jicãarã ca-neñapogaquẽna ãma.
Nare bairo mani baiquẽna.
Neñaporã,
mani ame tʉgooña ocabʉtiorã.
Ati yepapʉ mani Ʉpaʉ cʉ̃ ca-tunu atípe petoacã rʉja.
To bairi neñapori seeto majuu ca-ame buio ocabʉtiope ãa.
26 Mani ca-ame tʉgooña ocabʉtioquẽpata caroorijere cá-átinucurã mani aniborã tunu.
Caroa quetire,
cariape ca-ani wamere ca-majirã anibana quena tunu rooro mani cá-átinucuata tiere cʉ̃re mani ca-bai botiorijere yajio majiña maa.
Cristo jicãʉna ãmi mani caroorijere ca-wapayebojaʉ.
To bairi cʉ̃re mani ca-booquẽpata Diore,
“Caroorije yʉ cá-átajere majirioya,”
mani tunu ĩi majiquetiborã.
27 To bairo ca-bai botiorãre seeto uwiobʉja nare.
Dio cʉ̃ wapana menare na popiyeye,
na joe reegʉmi peeropʉ.
28 Tirʉmʉpʉ Moisépʉre Dio cʉ̃ ca-rotirique nii ca-bai botioʉre ca-jĩa rotinucuñuparã.
Pʉgarã o itiarã cʉ̃ ca-bai botioro ca-tʉjʉricarã to macanare na ca-buioro cʉ̃ ca-jĩa roca rotinucuñuparã cʉ̃ bopaco tʉjʉquẽnana.
29 To bairo nare na ca-popiyeyeriquere tʉgooñarã,
¿dope bairo mʉja tʉgooñatí mʉjaa,
Dio Macʉre jicãʉri ca-bai botiorãa?
Dio Macʉ ca-rií yajibojayupi,
camajare na yʉ catíogʉ ĩi.
To bairo jicãʉri,
“Ca-ãni majuurije me ãa Cristo ye,
cʉ̃ ca-buiori wame,”
ĩirãma.
Cristo nare cʉ̃ ca-rií yajibojarique to ca-anibato quena,
“Ñee unie maa,”
ĩirãma.
To bairona ĩirãma,
Cristo nare cʉ̃ ca-netoo catíogarije to ca-anibato quena.
To bairona Dio Espíritu Santo cʉ̃ ca-tʉjʉ maibanana cʉ̃ ca-bai botiorãre netobʉjaro na popiyeyegʉmi Dio.
Moisépʉre Dio cʉ̃ ca-rotirique ca-bai botiorãre na cʉ̃ ca-popiyeyerique netoro na popiyeyegʉmi Dio.
30 Dio cʉ̃ ca-ĩrica wamere oco bairi wame caroaro mani maji:
“Yʉ maca ca-popiyeyepaʉ yʉ ãa.
Na caroorije wapa na yʉ popiyeyegʉ camajare.”
Cabero oco bairi wame Dio Wadariquepʉ ĩi ucarique ãa:
“Mani Ʉpaʉ Dio cʉ̃ yarã caroorije na cá-átiere cariape tʉjʉ cõoñari na popiyeyegʉmi,”
ĩrique ãa Dio Wadariquepʉ.
31 To bairi Dio cariape tʉjʉ cõoña majimi manire.
To bairi seeto uwiobʉja mani Ʉpaʉ Dio cʉ̃ ca-popiyeyeparãre yua.
32 Dio yere mʉja ca-maji jʉgori paʉ mʉja ca-bairiquere tʉgooñaña.
Cʉ̃re mʉja ca-apiʉja jʉgoro tʉjʉrã aperã maca mʉja ca-tee tʉjʉ tutiyuparã.
To bairo mʉjaare na ca-bai popiyeyerije to ca-anibato quena Dio yere mʉja ca-tʉgooña janaquẽjupa.
33 Aperã mʉjaare na ca-tʉjʉrona rooro mʉjaare cá-ájupa mʉjaare ca-teerã.
Rooro mʉjaare ca-ĩi wadayupa.
Aperãre Cristore ca-apiʉjarã na quenare rooro na cá-áto tʉjʉrã na mʉja ca-mai tʉjʉyupa.
To bairo na mʉja ca-mai tʉjʉrijere tʉjʉrã mʉja quenare ca-popiyeyeyupa.
34 Aperã Cristore ca-apiʉjarãre presopʉ na ca-jooricarãre na bopaco tʉjʉri na mʉja cá-átinemoñupa.
Cristore ca-apiʉjaquẽna maca mʉja yere mʉja na ca-emaro,
rooro mʉja na cá-átie to ca-anibato quena mʉja ca-tʉgooñarique paiquẽjupa.
Ca-petiquẽtie Dio yere mʉja ca-cʉgorije macare mʉja ca-tʉgooñañupa.
Manire na ca-emarije netoro mani cʉgogarã ĩirã mʉja ca-wariñuuñupa.
35 To bairi ñe uniere uwiquẽja.
Diore api nʉcʉbʉgo anicõaña.
To bairo mʉja ca-bairo caroaro cʉ̃ yere mʉja joogʉmi Dio.
36 Cʉ̃ tʉpʉ mʉjaare caroare cʉ̃ ca-joopere cʉgoga patowãcaquẽja.
Ca-nʉca majipe ãa.
To bairi yeri ocabʉtiya.
Yeri ocabʉtiri Dio cʉ̃ ca-boori wame áticõa aninucuña,
quepequẽnana.
To bairo mʉja ca-bairo,
“Caroare mʉjaare yʉ joogʉ,”
cʉ̃ ca-ĩi cũurica wame cõona mʉja joogʉmi Dio.
37 Petoacã rʉja mai mʉja ca-yuupe.
Oco bairo ĩi ucarique ãa Dio Wadariquepʉre caroa ca-anipere:
Petoacã rʉja mai yʉ Macʉ yʉ ca-cũricʉ cʉ̃ ca-ejaparo jʉgoye.
Yoaro mee ejagʉmi.
38 Yʉ yarã ãma caroarã yʉre ca-apiʉjarã.
Yʉre ca-apiʉjarã caroaro anigarãma popiye na to ca-anibato quena.
Jicãʉ uwibacʉ cʉ̃ ca-apiʉja janaata cʉ̃ mena yʉ wariñuuquetigʉ,
ĩrique ãa Dio Wadariquepʉre.d
39 Mani maca ca-apiʉja janarã mee mani ãa.
To bairi ca-yajiparã mee mani ãa.
Cʉ̃re ca-apiʉjarã aniri mani yeri ca-anicõa aniparã maca mani ãa.