El santuario terrenal y el santuario celestial
9
Dio ca-jʉgoyepʉ Moisére cʉ̃ ca-roti jʉgoriquere cʉ̃ cũʉ camaja cʉ̃ na cá-áti nʉcʉbʉgopere ca-rotiyupi Dio.
Ati yepapʉ wiire cʉ̃ na cá-áti nʉcʉbʉgopa wii quenare cá-áti rotiyupi Dio.
2 To bairo cʉ̃ cá-áti rotirore apiri Moisé ca-quenooñupʉ Dio wii waibʉcʉrã ajeri mena áta wii.
Diore cʉ̃ na cá-áti nʉcʉbʉgonucupa wiire ca-quenooñupʉ.
Jãa eja jʉgorica paʉre,
“Dio cʉ̃ ca-ani paʉ ãa,”
ca-ĩiñuparã.
Ti paʉ ca-añupe jĩa bujurique nʉcorica yucʉ,
ãpoa yucʉ.
Cajawa quena ca-añupe ʉgarique unie Diore na ca-joope peorica cajawa.
3 Eja jʉgorica paʉ jʉgoye maca,
yotorica ajero ʉjaropʉ ca-añupe Dio cʉ̃ ca-ani majuuri paʉ na ca-ĩri paʉ.
4 Ti paʉpʉ ca-añupe ca-ajiyarije mena na cá-áta cajawa ca-jʉti ñuurije na ca-joe buje mʉgori cajawa.
Ca-añupe ti paʉpʉre ca-ajiyari pata.
Dio,
“Caroare mʉjaare yʉ átibojagʉ,”
nare ĩi,
na cʉ̃ cá-áti rotirica pata ca-añupe.
Ti pata pupeapʉre ca-jañañupe ca-ajiyarije mena na cá-áta jotʉ,
“maná” ca-wamecʉtie ʉgarique ʉmʉrecóo macajepʉre Dio na cʉ̃ ca-joorique ca-jañari jotʉ.
Aarón ãnacʉ cʉ̃ ca-tuericʉ ca-puti atacʉ quena ti patapʉre ca-jañañupe.
Apeye Dio cʉ̃ ca-rotiriquere cʉ̃ ca-uca tuurica pãiri ʉ̃ta pãiri quena ca-jañañupe.
5 Ti pata bui maca ca-añuparã weericarã ángel maja pʉgarã.
Na querʉpʉri mena ca-ñubʉgá tʉjʉnucuñuparã ti pata buire.
Dio ye ca-buju baterijere,
Dio cʉ̃ ca-aniere iñoorã ca-baiyuparã.
Sacerdote maja ʉparã camaja ye wapa ãa ĩirã waibʉcʉ ye riíre na ca-turi paʉ bui majuu ca-ñubʉgá tʉjʉnucuñuparã weericarã ángel maja.
Atie ti wii macajere yucʉacã mʉjaare jã buio peo majiquẽe.
6 To bairo ti wii macaje caroaro quenooricaro bero Dio wii macana sacerdote maja ca-jãanucuñuparã,
jãa eja jʉgorica paʉpʉre.
Jãa ejari Diore na cá-áti nʉcʉbʉgopere cá-átinucuñuparã to canacã rʉmʉ.
7 Yotorica ajero ʉjaro ca-ani paʉpʉre sacerdote maja ʉpaʉ jeto cʉ̃ ca-jãapa paʉ ca-añupe.
Ca-jãanucuñupʉ to canacã cʉma jicãni jeto.
Topʉ waibʉcʉ cʉ̃ ca-jĩaricʉ ye riíre ca-jee jãanucuñupʉ,
camaja na caroorije wapa ãa,
yʉ ye wapa quena ãa ĩi.
8 To bairi atie sacerdote maja na cá-átie mena Dio Espíritu Santo oco bairo mani majiomi:
Dio cʉ̃ ca-ani paʉpʉre camaja nipetirã ca-jeni nʉcʉbʉgorã ca-jãa majiquẽjuparã.
Dio cʉ̃ ca-roti jʉgorique ca-ani wii to ca-ano maca nipetirã ca-jãa majiquẽjuparã mai.
Ti wii,
tirʉmʉpʉ Dio cʉ̃ ca-roti jʉgoriquena to ca-anicõamata sacerdote maja jetore jãa rotiboʉmi Dio.
9-10 Ti wii macaje,
sacerdote maja na cá-átipe ca-rotiyupi Dio ti rʉmʉripʉre,
caberopʉ na cʉ̃ cá-átibojapere na majioʉ.
Camaja Diore waibʉcʉrã jĩa joe buje mʉgo joobana quena ca-ñuurã ca-ani majiquẽjuparã.
Caroorije na cá-átiere ca-majiriti majiquẽjuparã.
Dio ca-roti jʉgoyupi ca-ʉgapere,
ca-etipere,
ca-ujapere.
Nipetiro na rupaʉri cá-átipere na ca-roti jʉgoyupi Dio cawama wame cʉ̃ ca-buioparo jʉgoye,
cʉ̃ ca-roti jʉgoriquere cʉ̃ ca-wajoaparo jʉgoye.
To bairi tiere na cá-átie to ca-anibato quena na yeri macare ca-ñuu peti majiquẽjuparã.
11 Cristo macare ca-cũuñupi Dio,
sacerdote maja ʉpaʉ majuu,
caroa mani ca-ani majipere ca-joopaʉ anigʉmi ĩi.
To bairi Cristo manire ca-bai yajibojayupi.
Mani bai yajibojari bero ca-jã aájupʉ Jesú Dio wii ca-ani majuuri wii jõ bui macá wiipʉ.
Camaja ati yepa macana na ca-quenoorica wii netoro ca-ani majuuri wii ãa ti wii,
Dio wii.
12 Ti wii maca Dio cʉ̃ ca-ani paʉ majuu ãa.
To bairi Cristo manire ca-rií yajibojayupi.
To bairi cʉ̃ riíre ca-jooyupi Diore,
mani caroorije wapa.
Cabra na ca-ĩi waibʉcʉ,
o wecʉ jĩari na rií meere ca-jooyupi Jesú Diore.
Cʉ̃ majuuna manire ca-bai yajibojayupi,
Dio mena to canacã rʉmʉ mani ca-anicõa aninucuparore bairo ĩi.
To bairi jicãnina Dio cʉ̃ ca-ani wii majuupʉre ca-jãañupi Cristo,
mani ye wapa wapayeboja peoʉ.
Ati yepa macana maca sacerdote maja yotorica ajero ʉjaro ca-ani paʉpʉ Diore joorã capee ca-jãanucuñuparã,
wapaye peo majiquetibana.
13 “Ca-bai yajiricarã,
ca-boarãre pañarã ca-ʉguericʉna mʉja ãa,”
Moisére cʉ̃ ca-ĩiñupi Dio.
To bairi tie ca-ʉgueri cʉtiere ca-pañaricarã camajare caroorije to cojeato ĩirã waibʉcʉ jĩari na riíre ca-tu nucuñuparã napʉre.
To bairi wecʉore jĩa,
cõ joe,
cõ botire jee,
ocopʉ abaa átiri ca-boarãre ca-pañaricarãre ca-tu nucuñuparã tie quenare.
To bairo átiri,
“Meere,
mʉja ñuubʉja,”
ca-ĩinucuñuparã na rupaʉrire sacerdote maja yua.
14 Diore waibʉcʉrã na ca-joorije netoro mani yeri quenoomi Cristo maca ca-ñuurã mani ca-aniparore bairo.
Cʉ̃ maca mani yeripʉre caroorije mani cá-átiere mani majiriomi.
Cʉ̃ maca caroorije mácʉ aniri cʉ̃ majuuna manire ca-rií yajibojayupi mani caroorije wapa.
Dio Espíritu Santo to canacã rʉmʉ ca-anicõa aninucuʉ jʉgori to bairo ca-baiyupi.
To bairi Jesucristo manire cʉ̃ ca-bai yajibojaro tʉjʉri Dio mani majiriobojami caroorije mani cá-átiere.
To bairi mani yeripʉre mani cʉ̃ ca-quenoobojaro maca to canacã rʉmʉ ca-anicõaʉre Diore mani áti nʉcʉbʉgo maji yua.
15 To bairi Dio cawama wame,
oco bairo mʉjaare yʉ áti catíogʉ ĩi,
Cristore ca-jooyupi Dio cʉ̃re ca-buiobojapaʉre.
Cabʉcʉ wame Moisépʉre Dio cʉ̃ ca-rotirique mani áti peti majiquẽe.
Ñuuquẽto mani ca-bai botiorije wapa Cristo maca mani ca-bai yajibojayupi.
To bairo cʉ̃ ca-bairo,
“Cawama wame na yʉ átibojagʉ,”
Dio cʉ̃ ca-ĩricarore bairona manire átibojami Dio.
To bairi cʉ̃ ca-bejerãre cʉ̃ ca-roti jʉgoriquere mani cá-átiquetajere majiriocõari to canacã rʉmʉ cʉ̃ mena mani ca-anicõa aninucupere mani joomi Dio.
16-17 Jicãʉ cʉ̃ ca-bai yajiparo jʉgoye cʉ̃ yere ca-cʉgo ʉjapaʉre uca tuumi,
cʉ̃ ca-cʉgo ʉjapere buioʉ.
Ti pũuro cʉ̃ ca-bai yajiparo jʉgoye dope bairo áti majiña maa mai.
Cʉ̃ ca-catíro cʉ̃ yaʉ cʉ̃ yere jee majiquẽemi.
Cʉ̃ ca-bai yajiro bero cʉ̃ yaʉ cʉgo majigʉmi cʉ̃ ye ca-anibatajere cʉ̃ ca-uca tuuriquere yua.
18 To bairona Dio Moisépʉre ca-rotiyupi:
“Jicãʉ caroare mʉjaare ca-joopaʉ mʉja bai yajibojagʉmi riícõari,”
na ĩi majioʉ,
“Waibʉcʉre cʉ̃ jĩari cʉ̃ riíre tuuya,”
ca-ĩiñupi Dio Moisére.
19 To bairi Moisé camajare Dio cʉ̃ ca-ĩi buio rotirijere nipetiro na ĩi buio yaparo waibʉcʉrãre na jĩa,
na riíre wecʉ macʉ ye,
cabra ye ca-ajuyupʉ oco mena.
Ajuri oveja poa na jũaorica bʉrʉare hisopo na ca-ĩricʉpʉ tu,
rií cʉ̃ ca-ajuriquepʉ weyoo átiri ca-wẽe yaye bate peoyupʉ Moisé Dio cʉ̃ ca-rotirije ucarica pũuripʉ.
Camaja quenare na ca-wẽe yaye bate peocõañupʉ.
20 To bairi,
“Atie rií tʉjʉri,
‘Jocaro mee bai Dio manire cʉ̃ ca-ĩi cũurica wame,’
mani ĩi tʉjʉ maji,”
na ca-ĩiñupʉ Moisé.
21 To bairona ca-wẽe yaye bate peoyupʉ Moisé Diore cʉ̃ na cá-áti nʉcʉbʉgori wiire,
apeye ti wii macaje quenare.
22 To bairona ca-añupa Dio cʉ̃ ca-rotirije.
Nipetirije,
meere atie ca-ñuurije ãa,
caroorije manie ãa ĩirã,
ca-wẽe yaye bate peonucuñuparã,
Dio cʉ̃ ca-roti jʉgoriquere bairona ána.
To bairi jicãʉ Dio cʉ̃ ca-cũricʉ cʉ̃ ca-rií yajiquẽpata Dio majirioquetiboricʉmi mani camaja ye wapare.
El sacrificio de Cristo quita el pecado
23 To bairi tirʉmʉpʉ Dio wiipʉre na cá-átipere cá-áti rotiyupi Dio,
cʉ̃ ye majuu jõ bui macajere na majiato ĩi.
Dio wii macaje apeye uniere riíre wẽe yaye bate peori,
“Ñuubʉja,
meere Dio wiipʉ anigaro,”
ca-ĩinucuñuparã.
To bairona jõ buipʉ Dio tʉpʉ cʉ̃ ya wii majuupʉ mani ca-eja majiparore bairo ĩi,
jicãʉ manire ca-bai yajibojape ca-añupa waibʉcʉ netoro ca-ñuʉ.
24 To bairi Cristo ca-jãañupʉ Dio wii majuupʉ,
jõ bui Dio tʉpʉ,
manire jenibojagʉ.
Ati yepa macá wiire manire ca-jenibojaʉ me ãmi Jesú.
Ati yepa macá wii maca camaja na cá-áta wii Dio wii jõ bui macá wii ca-bairi wamere ca-bai majiori wii ãa.
25 Manire judío majarã sacerdote maja ʉpaʉ to canacã cʉma jãanucumi Dio wiipʉre yotorica ajero ʉjaropʉ Dio cʉ̃ ca-ani paʉ majuu na ca-ĩri paʉpʉ.
Jãari,
to canacã ni jee jãanucumi waibʉcʉ cʉ̃ ca-jĩaricʉ ye riíre.
Cristo maca capee jooquẽcʉna,
jicãnina ca-jooyupi,
Diore cʉ̃ majuuna manire bai yajibojari.
26 Capee niri Diore cʉ̃ ca-joope to ca-ãmata ati yepa Dio cʉ̃ cá-átato bero nairoacã Jesú manire cʉ̃ ca-tamuo bai yajibojanucurije aniboro.
To bairi jicãnina yucʉacã ati ʉmʉrecóo to ca-petiparo jʉgoye ca-ejayupi Jesú ati yepapʉre.
Eja,
cʉ̃ majuuna jicãnina ca-jooyupi Diore,
manire bai yajibojaʉ.
To bairo manire cʉ̃ ca-bai yajibojaro tʉjʉri majiriomi Dio caroorije mani cá-átiere.
27 To bairi jicãnina mani bai yajigarã mani camaja quena.
Mani ca-bai yajiro bero Dio nipetiro mani cá-átajere mani tʉjʉ cõoñagʉmi.
28 Cristo cʉ̃ quena jicãnina ca-bai yajiyupi.
Bai yajiri camaja capaarã na ye wapa ca-popiye tamuo yajibojayupi cʉ̃re na ca-jĩaro.
Tunu ejagʉmi,
mani caroorijere wapayei ejaʉ mee.
“Tunu atígʉmi,”
ca-ĩi cote ãnare na catío acʉ́ tunu atígʉmi yua.