5
Sacerdote maja ʉpaʉ camajare Diore na ca-jenibojapaʉ na mena macacʉna ãcʉmi.
Cʉ̃re,
“Diore jãare ca-jenibojaʉ mʉ anigʉ,”
cʉ̃ ĩima camaja.
“Diore jã cá-áti nʉcʉbʉgori paʉ waibʉcʉrãre jĩari joe buje mʉgobojaya,
Diore cʉ̃ joʉ.
Cʉ̃ joʉ,
‘Caroorije na cá-átiere na majiriobojaya,’
Jãare ca-ĩibojaʉ mʉ anigʉ Diore,”
cʉ̃ ĩima cʉ̃ yarã.
2 To bairi cʉ̃a sacerdote maja ʉpaʉ camajocʉna ca-ãcʉ̃ aniri Dio cʉ̃ ca-boori wame cá-áti maji petiquẽcʉ ãmi.
Cʉ̃ quena nare bairo caroorije cá-ácʉ ãmi.
Nare bairo ca-ãcʉ̃ aniri cʉ̃ yarãre caroaro cá-áti ocabʉti majiquẽnare na ĩi buio majimi,
na ĩi punijiniquẽcʉna.
3 Cʉ̃na Dio wiipʉre waibʉcʉrãre jĩari joe buje mʉgoʉ,
“Yʉ yarãre caroorije na cá-átiere na majirioya,”
Diore na ĩibojami.
To bairo ácʉna cʉ̃ ye wapa quenare nare bairo caroorijecʉcʉ aniri,
“Yʉ quenare yʉ majirioya,”
Diore cʉ̃ ĩinucumi.
4 Jicãʉ cʉ̃ majuuna,
“Sacerdote maja ʉpaʉ yʉ anigʉ,”
ĩi ocabʉti majiquẽemi.
Dio jeto cʉ̃ cũu majimi sacerdote maja ʉpaʉ ca-anipaʉre.
Tirʉmʉpʉre Aarón ca-wamecʉcʉ ãnacʉre cʉ̃ ca-cũricarore bairona aperã sacerdote maja ʉparã ca-aniparãre na cũumi Dio na quenare.
5 To bairi Cristo cʉ̃ majuuna,
“Sacerdote maja ʉpaʉ yʉ anigʉ,”
ca-ĩiquẽjupi.
Dio maca cʉ̃re sacerdote maja ʉpaʉ cʉ̃ cũuri oco bairo cʉ̃ ca-ĩiñupi:
Yʉ Macʉ mʉ ãa.
Ati rʉmʉ to bairona ca-anipaʉ mʉ yʉ cũu,
cʉ̃ ca-ĩiñupi Dio cʉ̃ Macʉre.a
6 Ape paʉ Dio Wadariquepʉ oco bairo ĩi ucarique ãa:
Sacerdote majuu ca-anipaʉre mʉ yʉ cũu.
To bairi camajare ca-jenibojaʉ mʉ anigʉ.
Tirʉmʉpʉ macacʉ Melquisedé ca-wamecʉcʉ ãnacʉ cʉ̃ ya wamere bairona mʉ yʉ cũu.
To canacã rʉmʉ camajare yʉre na ca-jenibojaʉ mʉ anicõa aninucugʉ,
ca-ĩiñupi Dio cʉ̃ Macʉre.b
7 Cristo ati yepa ãcʉ̃ bai yajigʉ majuu otiri Diore tutuaro ca-jeni awaja otiyupʉ.
“Bai yajigʉ yʉ áa.
Yʉ mʉ netoo majii,”
ca-ĩi jeniñupʉ.
“To bairo yʉ ca-baigari wame to ca-anibato quena mʉ ca-boori wame maca yʉre to baiato.”
To bairo cʉ̃ ca-ĩi jenirijere apii cʉ̃ cá-átinemoñupʉ Dio.
8-9 To bairi Cristo,
Dio Macʉ anibacʉ quena ca-tamuoñupʉ.
Tamuoʉ,
Dio cʉ̃ ca-tamuo rotiri wame cõo ca-tamuoñupʉ,
cʉ̃ Pacʉre ca-apiʉjaʉ aniri.
To bairo Dio cʉ̃ ca-tamuo rotirijere cʉ̃ cá-áti petiro ĩi Dio maca cʉ̃ ca-cũuñupi cʉ̃re ca-apiʉjarãre cʉ̃ mena to canacã rʉmʉ ca-anicõa aninucuparã ca-catíopaʉre.
10 To bairo Jesúre cʉ̃ cũuri oco bairo cʉ̃ ca-ĩiñupi Dio:
“Sacerdote maja ʉpaʉ ca-ani majuʉ mʉ anigʉ,”
cʉ̃ ca-ĩiñupi Jesúre.
“Melquisedé ca-wamecʉcʉ cʉ̃ ca-ãnatore bairona ca-ãcʉ̃ mʉ anigʉ sacerdote maja ʉpaʉ majuu,”
cʉ̃ ca-ĩiñupi Dio cʉ̃ Macʉ Jesúre.
Peligro de renunciar a la fe
11 Ati wame sacerdote maja ʉpaʉ Melquisedé tirʉmʉpʉ macacʉ cʉ̃ ca-ãnaje capee mʉjaare ca-buiope anibapa,
paro mʉja api majigaquẽe.
To bairi yucʉacã capee jã buio majiquẽe.
12 “Yoaro Jesucristore ca-apiʉjarã jã ãa,”
mʉja ĩi.
To bairo ca-ĩirã mʉja ca-aniera Cristo yere caroaro ca-majiparã mʉja anibapa.
Aperã quenare na ca-majioparã mʉja anibapa.
To bairo mʉja ca-bairona aperã mʉja macare majiogarãma.
Ca-majirioqueti wamere mʉjaare buiogarãma Dio Wadariquere.
To bairi caroaro ca-api majiquẽna aniri cadaquerã ca-ũpurãacãre bairona mʉja bai.
Ca-ũpurã cadaquerãacã ca-tutuaquẽna aniri waibʉcʉ riire ʉga majiquẽema.
To bairona na ca-bairore bairona mʉja quena mʉja ca-tʉgooñabori wamere,
ca-majiriori wamere ca-api majiquẽna mʉja ãa.
13 Caniñaa ca-ũpurã cabʉcʉrã na ca-paarique cʉtore bairo paa majiquẽema,
ocabʉtiquetiri.
Nare bairona mʉja bai mʉja ca-tʉgooñarijepʉre.
Mʉja yeri ocabʉtiquetiri ca-majiriori wame Cristo yere mʉja api majiquẽe.
Caroa macajere mʉja áti majiquẽe.
14 Cabʉcʉrã maca waibʉcʉ riire ca-ʉga majirã ãma.
Ca-ocabʉtirã ãma.
Mʉja quena ca-ocabʉti yericʉna mʉja ca-ãmata caroa macajere mʉja áti majiborã.
“Caroorije ãa ati wame.
Ca-ñuurije ãa ape wame,”
mʉja ĩi majiborã.