4
1-2 To bairi mani ñicʉ jãare caroa quetire na ca-joobajupi Dio.
Na maca Dio mena caroaro ca-tʉgooña yerijã wariñuu ani majiquẽjuparã,
Diore apiʉjaquetibana.
To bairona mani ñicʉ jãapʉre na cʉ̃ ca-ĩi joobatajere bairona mani ca-ĩi jooyupi Dio mani quenare.
“Yʉ mena caroaro tʉgooña yerijã wariñuu ãnajere mʉjaare yʉ joogʉ,”
mani quenare mani ca-ĩi jooyupi Dio.
To bairi mani maca nare bairo mani baiqueticõato.
Mani nʉcʉbʉgocõato caroa quetire,
“Yʉ mena caroa tʉgooña yerijã wariñuu ãnajere mʉjaare yʉ joogʉ,”
manire cʉ̃ ca-ĩri wamere.
Mani quena nare bairo mani ca-bai botioata cʉ̃ mena caroare mani bʉgaquetiborã.
3 Dio cʉ̃ mena caroa tʉgooña yerijã wariñuu ãnaje joomi cʉ̃re ca-apiʉjarã jetore.
To bairi mani ñicʉ jãare cʉ̃re ca-bai botiorãre:
Na ĩi punijini,
“Yʉ mena macana caroaro ca-tʉgooña yerijã wariñuurã mʉjaare yʉ ani rotiqueti majuucõagʉ,
jocʉ mee mʉjaare yʉ ĩi.
Caroa paʉ mʉjaare yʉ ca-cũborica paʉpʉ yʉ mena mʉja aniqueticõagarã yucʉra yua,”
na yʉ ca-ĩiwʉ,
ca-ĩiñupi Dio.a
Nemoopʉre ati ʉmʉrecóore cʉ̃ cá-áti jʉgori paʉpʉna caroaro na ca-tʉgooña yerijã wariñuu anipere na ca-cũbojabajupʉ Dio.
To bairo cá-átacʉ anibacʉ quena cʉ̃ mena caroaro na ca-tʉgooña yerijã wariñuu ani rotiquẽjupʉ,
cʉ̃ na ca-bai botiorije jʉgori.
4 To bairona ĩi jicã paʉ Dio Wadariquepʉ seis rʉmʉri bero ca-ani rʉmʉ:
Ati ʉmʉrecóo áti jʉgori siete rʉmʉri ca-ejaro Dio cʉ̃ cá-átiere áti yaparori ca-yerijã wariñuuñupʉ,
ĩrique ãa Dio Wadariquepʉ.b
5 Ape wame oco bairo ĩi ucarique ãa tunu:
Yʉ mena macana caroaro ca-tʉgooña yerijã wariñuurã mʉjaare yʉ ani rotiqueti majuucõagʉ.
Caroa paʉ mʉjaare yʉ ca-cũbori paʉpʉre yʉ mena mʉja aniqueticõagarã yua,
ĩrique ãa Dio Wadariquepʉ.
6 To bairi naa caroa quetire ca-api jʉgobatana cʉ̃ mena macana aniquetigarãma,
cʉ̃re na ca-bai botiorique bui.
Cʉ̃ mena caroaro tʉgooña yerijã wariñuu aniquetigarãma.
Aperã maca cʉ̃ mena caroaro tʉgooña yerijã wariñuurã anigarãma.
7 To bairi yucʉ quena cʉ̃re ca-apiʉjaparãre na macami Dio.
Mani ñicʉa cʉ̃re ca-bai botioricarã na beropʉ David ãnacʉ oco bairo Dio ye quetire ca-ĩi ucayupi Dio cʉ̃re cʉ̃ ca-ĩi buioriquere:
Mʉjaare Dio cʉ̃ ca-buioro nemoo cʉ̃ apiʉjaya.
Cʉ̃ bai botioquẽja,
ca-ĩi ucayupi David ãnacʉ.c
8 Moisé bero macacʉ ca-añupʉ Josué ca-wamecʉcʉ mani ñicʉ jãare ca-jʉgo ãcʉ̃.
To bairi Moisé cʉ̃ ca-ani yʉtea macana ca-ñee unie mani paʉpʉ ca-bai yajiricarã punaapʉre caroa yepapʉ na ca-jʉgo ejayupʉ Josué maca.
To bairi,
“Yʉ mena caroa tʉgooña yerijã wariñuu anigarãma,”
ĩi Josué caroa yepapʉ na cʉ̃ ca-jʉgo ejapere ĩiquetacʉmi Dio.
Ti wame cʉ̃ ca-ĩata caberopʉ ape wame,
“Jicãarã yʉ mena caroaro tʉgooña yerijã wariñuu anigarãma,”
ĩiquetiboricʉmi Dio.
9 To bairi Diore ca-apiʉjarã cʉ̃ mena caroaro mani ca-tʉgooña yerijã wariñuu anipe ãa.
Dio ati ʉmʉrecóo áti yaparori siete rʉmʉri ca-ani rʉmʉre cʉ̃ ca-ani yerijã wariñuuricarore bairona caroaro mani ca-tʉgooña yerijã wariñuu anipe ãa.
10 Dio ati ʉmʉrecóo áti yaparori ani yerijã wariñuuricʉmi.
To bairona mani quenare cʉ̃ mena caroaro tʉgooña yerijã wariñuurique anigaro.
Mani ca-popiye cʉtie manire janagaro.
11 To bairi yeri ocabʉtiri caroaro mani ána,
cʉ̃ mena caroaro ca-tʉgooña yerijã wariñuurã anigarã.
Mani ñicʉ jãapʉ na ca-bai botioricarore bairo mani baire ĩirã caroaro cʉ̃ Wadariquere mani apiʉjarã.
12 Dio Wadarique caroaro catíriquere ca-joorije ãa.
Mani yeripʉ caroaro eja ocabʉti.
Jarerica pãi pʉga nʉgoapʉna caroaro oóri pãi áticõari manire ca-jĩagaʉ cʉ̃ ca-jarero netoro mani yeripʉre caroaro ejacõa Dio Wadarique tiere mani ca-apiro.
Dio caroaro majimi mani yeripʉre mani ca-tʉgooñari wamere.
“Caroaro yʉ átigʉ,”
mani ca-ĩi tʉgooñari wame quenare,
“Roorije yʉ átigʉ,”
mani ca-ĩi tʉgooñari wame quenare caroaro majimi Dio mani yeripʉre.
Caroorije mani cá-átigabatiere,
“Átiquẽja,”
manire ĩi majiomi Dio cʉ̃ Wadarique jʉgori.
13 To bairi mani cá-áti aniere dope bairo mani áti yajio majiquẽe.
Mani tʉjʉmi Dio.
Ati ʉmʉrecóo cʉ̃ cá-átanare nipetirã tʉjʉ majimi.
To bairi cʉ̃ cá-átana mani ca-ano nipetiro mani yeripʉre caroaro mani tʉjʉ majimi.
Cʉ̃ majuuna,
“¿Nope ĩirã to bairo caroorije mʉja tʉgooñatí?”
manire ca-ĩi jeniñaʉ ãmi Dio yua.
Jesús es el gran sumo sacerdote
14 Jesú aperã Dio wii macana sacerdote na ca-ĩirã ʉparã netoro ca-ãcʉ̃ ãmi Jesú.
Cʉ̃ maca Dio tʉ majuupʉ ejari mani jenibojaʉ áami Dio Macʉ Jesú.
To bairi ca-ani majuʉ cʉ̃ ca-ano maca caroaro cʉ̃ ye quetire mani apiʉja anicõarã.
15 Cʉ̃a Diore manire jenibojaʉ,
mani yaʉ sacerdote maja ʉpaʉ majuu ãmi.
To bairi mani bopaco tʉjʉmi mani ca-tamuoro.
Mani ca-yeri ocabʉtiquẽtiere caroaro majimi Jesú.
To canacã wame Sataná,
“Caroorije ája,”
manire cʉ̃ ca-ĩi wadajãrore bairona cʉ̃ ca-ĩi wadajãbajupʉ Sataná Jesú quenare.
Jesú maca cʉ̃ ca-apiquẽjupʉ.
To bairo Sataná cʉ̃ ca-ĩibatiere caroorije cá-átiquetacʉ aniri Sataná manire cʉ̃ ca-wadajãrije caroaro tʉjʉ majimi Jesú.
To bairi tʉgooña ocabʉtiriquere mani joo majimi Jesú.
16 To bairo Jesú ocabʉtiriquere manire cʉ̃ ca-joorije tʉgooñari uwiquẽnana Diore mani jeninucuto.
Mani maimi.
Mani bopaco tʉjʉmi.
To bairi mani átinemogʉmi mani ca-tamuoro.