Jesús es más importante que Moisé
3
Yʉ yarã,
Dio tʉpʉ to canacã rʉmʉ cʉ̃ mena ca-anicõa aniparã,
cʉ̃ ca-bejericarã mʉja ãa mʉja quena.
To bairo cʉ̃ ca-bejericarã aniri Jesúre caroaro cʉ̃ tʉgooñaña.
Dio cʉ̃ ye quetire aperãre cʉ̃ ca-buio rotiricʉ majuu ãmi Jesú.
Sacerdote maja ʉpaʉ majuu ãmi cʉ̃a,
camajare Diore ca-jenibojaʉ.
To bairo ca-ãcʉ̃ aniri seeto mani ca-nʉcʉbʉgopaʉ ãmi.
To bairi caroaro cʉ̃ tʉgooñaña.
2 Tirʉmʉpʉ macacʉ Moisére Dio cʉ̃re cʉ̃ cá-áti rotiri wamere bairo caroaro na cá-átibojayupʉ Moisé Dio yarãre Israel macanare.
To bairi Jesú quena Moisé ãnacʉ cʉ̃ cá-átibojaricarore bairona Dio cʉ̃re cʉ̃ cá-áti rotiri wame caroaro Dio yarãre na cá-átibojayupi Jesú.
3 Moisé netoro Jesú macare cá-áti nʉcʉbʉgoparã mani ãa.
Nii jicã maja nare ca-jʉgo ãcʉ̃ ucʉ̃ cʉ̃ bero macana ʉparã netoro cá-áti nʉcʉbʉgopaʉ ãcʉmi.
To bairona Moisé netoro Jesú macare ca-tʉgooña nʉcʉbʉgope ãa,
ca-jʉgo ãcʉ̃ majuu cʉ̃ ca-ano maca.
4 To canacã macaripʉrena nare ca-jʉgo ãna ãnama.
To bairo na ca-baibato quena Dio maca to canacã poa macanare na ca-jʉgo ãcʉ̃ ãmi cʉ̃ maca.
5 Moisé caroaro cá-ájupʉ Dio cʉ̃re cʉ̃ cá-áti rotiri wame cõo.
Diore paabojari majocʉ ca-añupʉ Moisé,
Dio yarã Israel majare na jʉgo ãcʉ̃.
Na ca-buioyupʉ cabero Dio cʉ̃ ca-buiopa wamerire.
6 Cristo maca Diore paabojari majocʉre bairo mee ca-añupʉ.
Dio Macʉ riape ãmi.
Jicãʉ punaa cʉ̃ bairãre na ca-jʉgo ãcʉ̃re bairo ca-ãcʉ̃ majuu ãmi Jesú.
Jicãʉ camajocʉ cʉ̃ ca-macʉcʉti jʉgoʉre bairo ca-ãcʉ̃ ãmi Jesucristo.
To bairo ca-ãcʉ̃ aniri caroaro cʉ̃ Pacʉ yere cá-ájupi.
Caroaro na cá-átibojayupi Jesú Dio yarã ca-aniparãre.
Mani quena Cristo yarã mani ãa cʉ̃ ca-tunu ejapere mani ca-tʉgooña nʉcʉbʉgoata.
To canacã rʉmʉ cʉ̃ mena,
cʉ̃ yarã mani ca-anipere mani ca-tʉgooña api nʉcʉbʉgocõa aninucuata cʉ̃ yarã mani ãa.
El descanso para el pueblo de Dios
7 To bairi Moisé ãnacʉ netoro ca-ãcʉ̃ ãmi Jesucristo maca.
Moisé ãnacʉ netoro ca-ãcʉ̃ cʉ̃ ca-ano ĩirã Espíritu Santo cʉ̃ ca-ĩrica wamere apiʉja ocabʉtiya.
Oco bairo ĩi Dio Wadarique jicã paʉ Espíritu Santo cʉ̃ ca-ĩrica wame:
Mʉjaare Dio cʉ̃ ca-buioro nemoo cʉ̃ apiʉjaya.
8 Cʉ̃ bai botioquẽja.
Tirʉmʉpʉre mʉja ñicʉ jãapʉ Diore cʉ̃ ca-bai botionucuñawã.
Ca-ñee unie mani paʉpʉ,
“Dio manire popiyeyequẽcʉmi cʉ̃re mani ca-apiʉjaquẽtie to quena,”
ca-ĩi tʉgooñabama.
9 Cuarenta cʉmari to bairona ca-bai botioyawã,
ca-acʉori wame áti iñoorica wameri capee na yʉ ca-iñoorije to ca-anibato quena.
10 To bairo na ca-bairo to cõona na yʉ ca-punijini tʉjʉwʉ.
Punijini,
“Yʉre ca-bai botionucurã ãma.
Na yʉ ca-rotirijere booquẽema,”
na yʉ ca-ĩiwʉ.
11 To bairo na ĩi punijiniri,
“Yʉ mena macana caroaro ca-tʉgooña yerijã wariñuurã mʉjaare yʉ ani rotiqueti majuucõagʉ,
jocʉ mee yʉ ĩi.
Caroa paʉ mʉjaare yʉ ca-cũborica paʉpʉre yʉ mena mʉja aniqueticõagarã,”
na yʉ ca-ĩiwʉ yua,
ca-ĩiñupi Espíritu Santo.a
12 To bairi yʉ yarã,
nare bairo baiqueticõaña.
Mʉja yeripʉre caroaro tʉgooñaña,
rooro bai botiori mani yeripʉre Diore mani áti nʉcʉbʉgo janare ĩirã.
13 To bairi aperã caroorijere,
ricati ca-ĩitorã ãnama.
“Atie macare mʉja cá-áti ʉjaro mʉja wariñuuborã,”
ca-ĩitorã ãnama.
To bairo ca-ĩitorãre mani apiʉjare ĩirã Dio yere ame ĩi buiori ame ocabʉtioya mʉjaa.
Caroorijere mani cá-átinucuata Dio ye macare mani áti ani wariñuu majiquetiborã.
To bairo áti ani wariñuu majiquetibana Diore mani áti nʉcʉbʉgo janaborã.
To bairo mani baire ĩirã ame ĩi buiori ame ocabʉtioya.
To canacã rʉmʉ Jesucristo cʉ̃ ca-tunu atíparo jʉgoye to bairona ame ocabʉtioya.
14 To bairi nemoona cʉ̃re mani ca-apiʉja jʉgoeparore bairona to canacã rʉmʉ to bairona caroaro cʉ̃ ca-apiʉjacõa aninucupe ãa.
Mani ca-ani rʉmʉri cõo to bairo jeto mani ca-ãmata cʉ̃ mena macana mani anigarã.
15 To bairi Dio Wadariquere oco bairo ĩi ucarica wamere bairona ája:
Mʉjaare Dio cʉ̃ ca-buioro nemoo cʉ̃ apiʉjaya.
Cʉ̃ bai botioquẽja.
Tirʉmʉpʉre mʉja ñicʉ jãapʉ Diore cʉ̃ na ca-bai botio nucuñaricarore bairo baiqueticõaña.b
To bairona ĩi ucarique ãa.
16 Na maca Dio Wadariquere ca-apirã anibana quena ca-bai botioyuparã.
Nipetirã Ejipto yepapʉ ca-anibatana,
Moisé cʉ̃ ca-jʉgo butiricarã cʉ̃ ca-bai botioyuparã.
17 To bairo na ca-bairo na ca-punijini tʉjʉyupʉ Dio.
Na punijini tʉjʉ,
cuarenta cʉmari ca-ñee unie mani paʉpʉrena na ca-ani rotiyupʉ Dio.
To bairo na ani rotiri topʉna ca-ñee unie mani paʉpʉ na ca-bai yaji rotiyupʉ yua.
18 Nare,
“To cõona yʉ mena caroaro ca-tʉgooña yerijã wariñuurã mʉja aniqueti majuucõagarã,”
na ca-ĩiñupʉ Dio cʉ̃re ca-bai botiorãre.
19 To bairo Dio na cʉ̃ ca-ĩriquere apirã oco bairi wame mani ĩi maji:
Diore cʉ̃ na ca-apiʉjaquẽtie bui cʉ̃ mena macana ca-ani majiquẽjuparã.
Caroa paʉpʉ na cʉ̃ ca-cũborica paʉpʉre ca-eja majiquẽjuparã.