No hay que descuidar la salvación
2
To bairi Dio cʉ̃ Macʉrena cʉ̃ ye quetire cʉ̃ ca-buio rotiro ĩirã manire cʉ̃ ca-buioriquere caroaro tiere ca-apiʉjape ãa.
Tie quetire majiritiri ape wame macare mani átire ĩirã ca-apiʉjaparã mani ãa.
2 Tirʉmʉpʉ Dio tʉ macana ángel maja cariape ca-buioyupa Dio ye quetire.
To bairi na ca-buiorijere ca-bai botiorãre cariape na ca-popiyeyeyupi Dio.
3 To bairi mani quenare to bairona cariapena manire popiyeyecõagʉmi cʉ̃ Macʉ manire cʉ̃ ca-buioriquere caroa wame majuure mani ca-bai botioata.
Cʉ̃ ye quetire camajare na cʉ̃ ca-netoo catíopere na ca-ĩi buio jʉgoyupi mani Ʉpaʉ Jesú.
Cabero cʉ̃re ca-apiricarã,
“Cariape ãa atie queti,”
manire ca-ĩi majiowã naa yua.
4 To bairi Dio atie queti cariape ãa ĩi na cá-áti iñooñupi ca-acʉori wame,
áti rupeorica wameri capee wameri.
To bairi cʉ̃ Catírique Espíritu Santore na ca-jooyupi Dio cʉ̃re ca-apiʉja jʉgoricarãre.
Cʉ̃ Espíritu Santore na cʉ̃ ca-jooro ape wame cá-áti iñoo majiñupa na quena.
Dio maca nare cʉ̃ cá-áti iñoo majiogari wame cá-ájupa.
Jesucristo, hecho como sus hermanos
5 Ati ʉmʉrecóo ca-petiro bero cawama ʉmʉrecóo Dio cʉ̃ ca-wajoapere mʉjaare jã ĩi buio.
Ti paʉ ca-ano rotiquetigarãma Dio tʉ macana,
ángel maja.
Cawama ʉmʉrecóore ca-rotiparãre na cũuquetigʉmi Dio.
6 Camaja macare,
ati yepa macanare,
ati yepa macaje nipetirore ca-rotiparãre na ca-cũuñupi Dio.
To bairona ĩi ucarica wame ãa Dio Wadariquepʉ jicã paʉ oco bairi wame:
Dio,
¿nope ĩi camajare na mʉ tʉgooñatí?
¿Nope ĩi cawatoa ca-ãna,
ca-ani majuurã mee na ca-anibato quena na mʉ tʉjʉ cotetí,
Dio?
7-8 Ángel maja rʉgabʉjaro ca-rotiparã camajare na mʉ ca-cũuñupa ati yʉteacãpʉre.
Ángel maja rʉgaro ca-ãnare camajare cũubacʉ quena yucʉacã ʉparãre bairo ca-aniparãre na mʉ ca-cũuñupa.
To bairi ati yepa macaje quena waibʉcʉrã quena nipetirã ca-rotiparãre mʉ ca-cũuñupa camajare.
To bairi ape rʉmʉpʉ mʉ cá-átajere mʉ cote rotigʉ mʉre ca-apiʉjarãre.a
To bairo nipetiro cʉ̃ cá-átajere camajare na cʉ̃ ca-cote rotiro jicã wame na ca-rotiqueti wame manigaro.
Ca-bairi wame to ca-anibato quena nipetiri wame roti petiquẽema mai camaja.
9 Jesú quenare jicã yʉteacã ángel maja rʉgaro ca-ãcʉ̃re cʉ̃ ca-cũuñupi Dio Jesúre.
To bairo cʉ̃ cũuri cʉ̃ ca-bai yaji popiyecʉti rotiyupi Dio Jesúre,
mani mai tʉjʉri.
To bairo Jesú camaja nipetirãre na cʉ̃ ca-bai yajibojaro tʉjʉri Caʉpaʉ majuu cʉ̃ ca-cũuñupi Dio.
Caʉpaʉ majuu cʉ̃ cũuri,
“Nipetirã cʉ̃re na áti nʉcʉbʉgoato,”
ca-ĩiñupi Dio Jesúre.
To bairo cʉ̃re cʉ̃ ca-ĩiro nipetirãre ca-rotii ãmi Jesú.
10 Nipetirije ati ʉmʉrecóo macaje Dio cʉ̃ cá-átaje jeto ãa.
Nipetiro ca-anie cʉ̃ jʉgori bai.
To bairi Cristo mena ca-rotinemoparãre ca-booyupi Dio camaja capaarã cʉ̃re ca-apiʉjaparãre.
Cristo nipetiro cʉ̃ ca-rotiri paʉ ca-anopʉ Dio cʉ̃ cá-átajere rotinemogarãma.
To bairi Jesú manire ca-catíopaʉre manire ca-tamuoboja popiyecʉti rotiyupi Dio.
Mani camaja capaarã caroaro cʉ̃ mena ca-rotirã mani ca-aniparore bairo ĩi cʉ̃ ca-tamuoboja popiyecʉti rotiyupi Dio.
11 Cʉ̃a Dio Macʉ Jesucristo mani caroorije reeri caroarã Dio yarã mani ca-ano áami.
To bairo manire cʉ̃ cá-áto mani quena Dio punaa mani ãa.
To bairi Jesú maca Dio punaa mani ca-ano tʉjʉri,
“Yʉ bairã majuu ãma,”
manire ĩi boboquẽemi Dio Macʉ Jesucristo.
12 To bairo manire ĩi tʉgooña boboquetiri oco bairo cʉ̃ ca-ĩi buioyupi Jesucristo Diore:
Na yʉ ĩi buiogʉ yʉ bairãre mʉ ca-aniere.
Na ca-neñapori paʉ,
“Ca-tutua netoʉ ãmi Dio,”
yʉ ĩi wariñuu buiogʉ yʉ bairãre.b
13 Ape paʉ oco bairo ca-ĩi buioyupi:
Yʉ tʉgooña nʉcʉbʉgo majuucõa Diore.
Ape wame oco bairo ca-ĩiñupi tunu:
Atona yʉ ãa Dio punaa mena,
yʉ bairã Dio yʉre cʉ̃ ca-jooricarã mena,
ca-ĩiñupi.c
14 Mani “yʉ punaa” Dio cʉ̃ ca-ĩirã,
ca-rupaʉricʉna mani ãa.
To bairi Jesú quena manire bairona camajocʉ ca-rupaʉcʉcʉ ca-buiayupi.
To bairi,
“Camajocʉ aniri nare yʉ bai yajibojagʉ.
Nare ca-reeboricʉrena Satanáre cʉ̃ rocagʉ,
na yʉ bai yajibojagʉ,”
ca-ĩiñupi Jesú.
15 Mani camaja mani ca-bai yajipere ca-uwirã mani ca-anibajupa,
Sataná yarã aniri.
To bairi Jesú camajocʉ aniri,
manire bai yajibojaʉ,
manire ca-netoo catíoyupi Jesú Sataná yarã ca-anibatanare.
16 Dio tʉ macanare ángel majare na átinemogʉ mee camajocʉre bairo ca-buiayupi Jesú.
Mani camaja macare,
mani ñicʉ Abraham Diore cʉ̃ ca-apiʉjaricarore bairona Diore ca-apiʉjarãre na yʉ netoo catíogʉ ĩri ca-baiyupi Jesú.
17 To bairi Dio cʉ̃ cá-áti rotiri wame cõo caroaro cá-ájupi Jesú.
Mani átibojaʉ,
“Caroorije na cá-átiere na majirioya,”
mani ĩibojami Jesú Diore.
Mani judío maja mani tʉ macana Dio wii ʉparã “sacerdote” maja ʉparã na ca-ĩirã to bairona ĩibojama Diore.
Jesú maca na cá-átie netoro caroaro mani átibojami,
mani mai tʉjʉri.
Cʉ̃ majuuna caroorije mani cá-átiere ca-wapayebojayupi.
To bairo na yʉ átibojagʉ ĩi cʉ̃ yarãre bairona camajocʉ ca-rupea paʉ ca-añupi,
manire bai yajibojagʉ.
18 To bairi camajocʉre bairo ca-rupaʉcʉcʉ ca-buiaricʉ aniri Jesú quena camajare bairona ca-tamuoʉ ca-añupi.
Cʉ̃ quenare,
“Caroorije átiñajate,”
cʉ̃ ca-ĩi wadajãbajupʉ Sataná.
Caroorije cá-átiquẽjupi Jesú maca.
To bairi caroorijere ca-bai botio netooricʉ aniri mani camajare mani átinemo majimi cʉ̃a.
Mani ca-tamuori paʉ,
Sataná,
“Caroorije ája,”
manire cʉ̃ ca-ĩi wadajãgari paʉ quenare mani átinemo majimi Jesú.