Cómo portarse con los creyentes
5
Ape wame mʉ yʉ queti buionemogʉ tunu Timoteo:
Jesúre ca-apiʉjarãre tutirique mena na buioquẽja cabʉcʉrãre.
Nʉcʉbʉgorique mena maca na buioya,
mʉ pacʉare na buioʉre bairona.
Cawamarã quenare mʉ bairãre ca-buioʉre bairo caroaro na ĩi buioya.
2 Cabʉcʉrã romirire mʉ pacoa romirire buioʉre bairona caroaro na buioya.
Cawamarã romirire mʉ bairã romirire ácʉre bairona caroaro na ája.
Caroorije nare tʉgooñaricaro mano na buioya cawamarã romirire.
3 Ca-wapearicarã romiri quenare cá-átinemoña manare na átinemoña.
4 Aperã ca-wapearicarã ca-punaacʉna,
ca-pãramerãcʉna macare na punaa,
na pãramerã nare cá-átinemoparã ãma.
Nemoopʉna na ya poa macanare caroaro na tʉgooñari na cá-átinemoparã ãma.
To bairo na pacʉa nare caroaro na cá-átatore bairona nare átinemo amegarã baima.
To bairo tiere mani cá-áto tʉjoomi Dio.
5 Ca-wapearicarã ca-coteya mana maca,
“Yʉre átinemogʉmi Dio,”
ĩi tʉgooña wariñuuri cʉ̃re ca-jeni nʉcʉbʉgorã ãnama.
Ʉmʉreco quenare,
ñami quenare Diore jeninucurãma.
6 Aperã ca-wapearicarã romiri rooro ánama.
Na ca-ʉgari pearije jetore átiganucurãma.
To bairo átibana ca-tʉgooña maja catíquẽna ãma.
7 Atie nipetiro mʉre yʉ ca-queti buio joorijere caroaro na buioya Jesúre ca-apiʉjarã to macanare.
To bairije caroaro na cá-áto,
“Caroorije cá-ána ãma,”
na ĩiquetigarãma aperã maca.
8 To bairi noa una na yarãre na cá-átinemogaquẽpata ca-ñuuquẽna ãma.
Na ya wii macana majuure cá-átinemogaquẽna,
Dio ye quetire bai netoo nʉcarã áama.
Diore ca-apiʉjaquẽna netoro ca-ñuuquẽna ãma,
na yarãre na cá-átinemogaquẽpata.
9 Jesú ye quetire ca-apiʉjari poa macana ca-wapearicarã romirire na cá-átinemope ãa.
To bairi papera pũuropʉ na wameri ucari oco bairo ca-ãnare mʉja átinemogarã:
Cabʉcʉrã sesenta cʉmari ca-cʉgorã,
netobʉjaro ca-cʉgorã quenare.
Jicãʉrena ca-manapʉ cʉtana.
10 “Aperãre caroaro na cá-átinemoricarã ãma,”
aperã na ca-ĩirã.
Na punaare caroaro camajooricarã.
Aperã na ya wiipʉ cá-aáteñarã ejarãre caroaro na ca-ani rotiricarã.
To bairi Jesúre ca-apiʉjarãre cá-átinemoricarã,
ca-bopacoorãre na cá-átinemoricarã.
Noo ca-boori wame aperãre caroaro na cá-átinemoricarore bairona Jesúre ca-apiʉjarã ca-ani poa macana quena ca-wapearicarã romiri.
To bairo ca-bairã jeto na wameri ucari nare mʉja átinemogarã.
11 Cawamarã romiri ca-wapearicarã maca na wameri mʉja ucaquetigarã.
Jesúre ca-apiʉjari poa macana na cá-átinemoparã me ãma.
Cawamarã romiri maca yoaro mee Jesú ye na paariquere janacõaborãma,
aperã mena manapʉa cʉtigarã tunu.
To bairi na paariquere Jesucristo nare cʉ̃ ca-cũbatajere janacõaborãma yua.
12 To bairi,
“Dio yere na cá-átinemorã jã anicõagarã,”
na ca-ĩriquere janari ca-bai buicʉnare bairo aniborãma.
13 Apeye tunu jicãarã cawamarã romiri ca-wapearicarã Dio yere na paarique janari caroaro átiquetiborãma.
Aperã ye wiiripʉ nairoacã aáteñari dope bairo ca-bairije rooro wada pai bate teñanucuborãma.
To bairona na ye ca-aniquẽtierena jeniñaborãma rooro aperãre buio bategarã.
To bairi Jesúre ca-apiʉjari poa macana na cá-átinemonucuparã majuu me ãma cawamarã romiri ca-wapearicarã maca.
14 Aperãre ca-manapʉa bʉganemoparã ãma,
cawamarã romiri aniri.
Ca-punaa cʉtiparã ãma.
Punaacʉti,
na wiirire cote,
cá-átiparã ãma.
To bairo na una caroaro na cá-áto,
manire ca-booquẽna maca,
“Caroorije áama,”
manire ĩi wada pai majiquetigarãma yua.
15 Naa jicãarã ca-wapearicarã Jesucristo ye quetire na ca-apibatajere booquetiri to cõona api janari,
meere,
rooro Sataná cʉ̃ ca-boorije macare átinucuma.
16 Jesúre ca-nʉcʉbʉgorã una caʉmʉ o cãromio na ya wiiri macana ca-wapearicarã romiri na ca-ãmata na majuuna nare na átinemoato.
Jesúre ca-nʉcʉbʉgorã na ca-ani poa macanare nare na cote rotiqueticõato.
To bairo na yarãre na majuuna na ca-coteata Jesúre ca-nʉcʉbʉgorã na ca-ani poa macana aperã ca-wapearicarã romiri ca-cote mani majuucõarãre na cote majigarãma.
17-18 Apeye tunu.
To macana Jesúre ca-apiʉjarã nare ca-jʉgo ãna macare na nʉcʉbʉgoato.
Aperã netoro Jesú yere ca-buiorãre caroaro majuu nare ca-nʉcʉbʉgope ãa.
Dio ye queti ucarica pũuro oco bairo ĩi:
“Wecʉ trigore ca-wãiaʉ ca-tu amojoreire tiere cʉ̃ quena cʉ̃ ʉgaato ĩirã cʉ̃ rijerore ca-jia bipequetipe ãa.”
Ape paʉ oco bairo ĩi ucarique ãa:
“Paari majocʉre cariape cʉ̃ ca-wapayepe ãa.”
To bairona Jesúre ca-apiʉjarãre ca-jʉgo ãnare cá-átinemope ãa na quenare.
19 Apeye tunu Jesúre ca-api nʉcʉbʉgorãre ca-jʉgo ãcʉ̃ ucʉ̃re apeĩ jicãʉna cʉ̃ ca-wadajãata cariape apiquẽja.
Pʉgarã o itiarã maca caroorije cʉ̃ cá-áto ca-tʉjʉricarã jicãro cõo cʉ̃re na ca-ĩi wadajãro,
“Cariape ĩi wadajãrãma,”
mʉja ĩi majigarã.
20 To bairi ca-jʉgo ãcʉ̃ caroorije cʉ̃ cá-átiere cʉ̃ ca-janaquẽpata aperã Jesúre ca-apiʉjarã na ca-apiropʉ cʉ̃ tutiya.
To bairo cʉ̃ mʉja cá-áto aperã maca caroa jetore áticõa anigarãma,
“Mani tutirema mani quenare,”
ĩirã.
21 Timoteo,
nʉcʉbʉgorique mena mʉ yʉ queti buio.
Mani Pacʉ Dio,
to bairi cʉ̃ Macʉ Jesucristo mena,
to bairi ángel maja cʉ̃ ca-bejericarã mena quena nipetirã na ca-apijoro mʉ yʉ queti buio.
Atie mʉre yʉ ca-ĩi queti uca joorijere cariape ája Jesúre ca-apiʉjarãre,
ca-jʉgo ãcʉ̃ aniri.
To bairo mʉ yʉ ca-ĩi buioricarore bairona na ája jicãro cõona.
Jicãarãre ricatiri átiquẽja.
22 Jĩacã mʉ ca-majirã unare Jesúre ca-apiʉjarãre ca-jʉgo aniparãre na cũuquẽja.
Caroaro mʉ ca-majiquẽnare ca-jʉgo aniparãre na mʉ ca-cũuro ñuuquetiboro.
Cabero na maca caroorije na cá-ápata mʉ quena caroorije na cá-átiere mʉ bai bui cʉtinemoboʉ.
Mʉ maca caroorije átiquẽcʉna anicõaña.
23 Apeye tunu.
Nairoacã mʉ riayupʉ.
To bairi to canacã nina mʉ paro ca-puniro,
mʉ ca-riaro oco jetore ca-etii anibacʉ quena ʉje oco quenare õcoacã etiya mʉ paro ca-puniro.
24 Ape wame tunu.
Jicãarã caroorije na cá-átiere majirãma aperã nipetirã,
baujaro na cá-áto maca.
Aperã maca ca-yajioroacãpʉ caroorije ánama.
To bairi nemoona caroorije na cá-átiere majiquẽnama aperã.
To bairo nemoona na ca-majiquẽtie to ca-anibato quena,
cabero na cá-átiere Dio cʉ̃ ca-bejeri paʉ ca-ano camaja nipetirã majicoagarãma yua.
To bairi yoaro,
caroaro mʉ ca-tʉjʉ majirã jetore ca-cũupe ãa ca-jʉgo aniparãre.
25 To bairona ãa ca-ñuurije quenare.
Jicãarã caroaro na cá-átiere nemoona majirãma aperã nipetirã.
Aperã macare caroaro na cá-átiere nemoona majiquẽnama aperã.
To bairo nemoona caroa na cá-átiere tʉjʉ majiquetibana quena,
cabero camaja nipetirã caroaro majicoagarãma,
yajioroacã áti majiña mano camaja na cá-áti aninucurije yua.