6
Apeye mʉ yʉ queti buionemogʉ,
Timoteo:
Dio ye quetire ca-apiʉjarã aperãre ca-paa cotebojarã na ʉparãre caroaro nʉcʉbʉgorique mena na ca-tʉjʉpe ãa.
To bairo caroaro na cá-áto tʉjʉri Diore wada pai majiquetigarãma aperã.
To bairona mani queti buioriquere,
“Ca-ñuuquẽtie ãa,”
ĩi wada pai majiquetigarãma aperã paa cotebojari maja na ʉparãre caroaro na ca-nʉcʉbʉgoata.
2 Jesúre ca-apiʉjarãre ca-ʉparãcʉna maca netobʉjaro caroaro nare ca-nʉcʉbʉgope ãa.
Oco bairo ca-ĩi tʉgooñaqueticõape ãa nare:
“Yʉ ʉpaʉ yʉre bairona Diore ca-apiʉjaʉ ãmi.
Cʉ̃re bairona ca-ãcʉ̃ yʉ ãa.
To bairi yʉ majuuna yʉ ca-booro yʉ paagʉ,
yʉre ca-rotipaʉ me ãmi,”
na ĩi tʉgooñaqueticõato.
Oco bairo maca na ĩi tʉgooñaato:
“Yʉ yaʉre yʉ ca-mairore bairo yʉ ca-maii ãmi yʉ ʉpaʉ,
Diore ca-apiʉjaʉ aniri.
To bairi netobʉjaro cʉ̃ yʉ paabojagʉ,”
na ĩi tʉgooñaato.
To bairo caroa átajere na queti buio netonucuña to macanare Jesúre ca-apiʉjarãre.
La religión y el contentamiento
3 Aperã atie yʉ ca-queti buiorije ca-aniquẽtiere ricati ca-queti buiorã ñuuquẽema.
Mani Ʉpaʉ Jesucristo cʉ̃ ca-queti buio cũuriquere,
caroaro ani majiriquere cariape na ca-apiquẽpata ñuuquẽema.
4 To bairo ricati wamere ca-ĩi buiorã maca,
“Ca-ãni majuurã jã ãa,
caroaro ca-majirã jã ãa,”
ca-ĩi tʉgooñarã ãma.
“Jã jeto ca-majirã jã ãa,”
ca-ĩirã anibana quena ñe uniere majiquẽema.
Na majuuna ame wada netogama.
“Dio Wadarique ti wame ca-ĩiro,
ricati ĩigaro ĩi,”
na majuuna ame ĩi wada canamugama.
To bairo ame ĩirã seeto rooye tuuma camaja na ca-anibatiere.
Camaja maca ame tʉjʉ ʉgoo,
ame tuti,
roorije ca-ame nʉcʉbʉgoya manie to ca-bairo áama,
jocarãna na ca-queti buiorije jʉgori.
5 Rooro ca-tʉgooñacõa aninucurã aniri ame ĩi tutinucuma.
Dio ye queti cariape macaje macare majiquẽema.
“Dio yere mani majuuna mani ca-tʉgooña nʉcʉbʉgori wamere aperãre queti buiorã mani wapatagarã.
To bairi pairo apeye unie caroa jetore mani cʉgogarã,”
ĩi tʉgooñama,
jocarãna.
6 Mani maca caroaro Dio ye quetire ca-apiʉjarã aniri caroa wame majuu mani cʉgo,
mani yeri ca-ani wariñuurijere.
Capee apeye uniere mani ca-ʉgari peaquẽpata mani yeri ca-ani wariñuurijere joomi Dio manire.
7 Ati yepapʉ buiarã apeye uniere mani ca-jee atíquẽpʉ.
To bairona bai yajirãpʉ quena apeye uniere mani jee aáquetigarã tunu.
8 To bairi mani ca-ʉgapere,
jutii uniere mani ca-jañape quenare cʉgorã,
“To cõona yʉ cʉgo tʉga,”
ca-ĩi tʉgooña wariñuupe ãa,
paibʉjaro ʉgari peaquẽnana.
9 Aperã maca cʉgobana quena paibʉjaro booma.
To bairo boo netobana Sataná cʉ̃ ca-wadajãrije macare apiʉjama.
Sataná macare apiʉjari,
camaja catíquẽna jeeñama.
To bairi na majuuna rooye tua,
to bairo ca-rooye tuaricarã popiye tamuogarãma yua.
10 Camaja niyeru,
apeye unie pairo na ca-boo netorije jʉgori to canacã wame caroorije áama.
Aperã Jesucristore ca-nʉcʉbʉgobatana apeye uniere boo netobana cʉ̃re majiriticõari rooro popiye tamuoma yua.
La buena lucha de la fe
11 Timoteo,
mʉ maca Dio yaʉ aniri apeye uniere ca-boo netorãre bairo baiqueticõaña mʉa.
Dio cʉ̃ ca-booro maca ocabʉtirique mena átinucucõaña.
Cariape macajere átinucucõaña.
Diore caroaro tʉgooña nʉcʉbʉgocõa aninucuña.
Aperãre na maiña.
Popiye baibacʉ quena Diore tʉgooña nʉcʉbʉgo janaquẽja.
Caroaro nʉcʉbʉgorique mena ãaña aperã mena.
12 Oco bairo caroaro mʉ yʉ ĩi:
Aperãre na quẽ netogarã seeto ocabʉtirique mena tʉgooñama ca-quẽparã.
Mʉ quena to bairo na ca-ĩi tʉgooña ocabʉtirore bairona Dio yere tʉgooña ocabʉticõa aninucuña.
Popiye mena caroare átibacʉ quena cabero Dio mena mʉ ca-anicõa aninucupere tʉgooñari nʉcaña.
Cʉ̃ ye quetire ca-buiopaʉre mʉ ca-cũuñupi Dio.
To bairo ca-buiopaʉ cʉ̃ ca-cũricʉ aniri capaarã na ca-apijoropʉ mʉ ca-buioyupa Jesúre mʉ ca-nʉcʉbʉgorijere.
13 Yucʉacã ca-ani tʉjarijere mʉre yʉ buio.
Dio,
nipetirãre catírique ca-joʉ cʉ̃ ca-apiropʉ,
Jesucristo quena cʉ̃ ca-apiro caroaro cariape mʉ yʉ buio.
Jesucristo quena cʉ̃ ca-aniere caroaro ca-buioyupi Ponsio Pilatore.
14 To bairi cariapena mʉre yʉ ĩi:
Mʉre yʉ ca-rotirore bairo caroaro cariape apiʉjaya atie mʉre yʉ ca-uca joorijere.
Ricati maca tʉgooñaqueticõaña.
Noa una,
“Ñuuquẽe Timoteo cʉ̃ cá-áti anie,”
na ĩiqueticõato ĩi,
caroaro cariape mʉ yʉ ca-ĩrijere bairona ája.
Mani Ʉpaʉ Jesucristo ati yepapʉ cʉ̃ ca-tunu atíparo jʉgoye to bairo jeto áticõa aninucuña.
15 Dio,
“To bairo yʉ átigʉ,”
cʉ̃ ca-ĩrica paʉ ca-ejaro to cõona cʉ̃ joogʉmi Dio cʉ̃ Macʉre ati yepapʉre tunu.
Jicãʉna ãmi Dio ca-ñuu netoʉ,
ca-tutuaʉ majuu.
Jicãʉna ãmi nipetirãre ca-rotii.
Aperã ca-rotinucurã netoro ca-rotii ãmi.
Caʉparã quenare na ca-rotii ãmi.
16 Jicãʉna ãmi Dio ca-catícõa aninucuʉ.
Noo jicãʉ ucʉ̃ ati yepa ca-ãcʉ̃ maca Dio tʉacãpʉ,
seeto cʉ̃ majuuna cʉ̃ ca-aji bateropʉ ca-ãcʉ̃ tʉacãpʉ,
aá majiquẽemi.
To bairi ni ucʉ̃ maca Diore ca-tʉjʉricʉ maami ati yepapʉ ca-ãcʉ̃.
Dope bairo cʉ̃re na ca-tʉjʉpe maa.
To bairi camaja nipetirã cʉ̃re na nʉcʉbʉgoato.
Cʉ̃ ca-rotinucurije to petiqueticõato.
To bairona to ãmaro.
17 Apeye tunu,
mʉ yʉ ca-queti buio tʉjari wame.
Capee apeye uniere ca-cʉgorãre oco bairo na ĩi buioya:
“ ‘Aperã netoro ca-ani majuurã mani ãa,
ñe unie mani rʉjaquẽe,’
ĩi tʉgooñaqueticõaña mʉjaa,”
na ĩi buioya.
“ ‘Capee caroare ca-cʉgorã aniri caroaro majuu mani baicõagarã,’
ĩi wariñuu tʉgooñaqueticõaña mʉjaa,”
na ĩi buioya.
Tie na ca-cʉgobatie yoaro aniquetigaro.
“Yoaro mee peticoagaro.
To bairi Dio maca mani ca-boorije nipetirore ca-joʉ ãmi.
Mani ca-ani wariñuuro boʉ,
caroaro manire joo netomi Dio nipetiro mani ca-cʉgopere,”
na ĩi tʉgooñacõato capee ca-cʉgonucurã.
18 Oco bairo na ĩi buionemoña ca-apeye unie pairãre:
“Aperãre na átinemoña mʉja ca-cʉgorije mena.
To bairi aperã na ca-bopacoorijere tʉjʉrã,
capee na átinemoña.
Wariñuuri mʉja ca-cʉgorijere na nuniña.
19 To bairo mʉja cá-áto tʉjʉri Dio maca mʉja tʉjʉ wariñuugʉmi.
Capee caroa majuu mʉja joogʉmi Dio caberopʉ.
To bairo cʉ̃ ca-jooro mʉja ani wariñuucõa anigarã Dio tʉpʉ.
Tie maca caroa ca-anie majuu anigaro,”
na ĩi buioya capee ca-cʉgorãre yua.
Encargo final a Timoteo
20 Timoteo yʉ yaʉ,
Dio mʉre cʉ̃ ca-queti buio cũuriquere caroaro queti buiocõa aninucuña.
Aperã maca,
“Jocʉna ĩmi Timoteo,”
mʉre na ca-ĩibato quena to bairona cariape macaje jetore buio janaqueticõaña.
Aperã ricati na ca-queti buiorijere apiquẽja.
“Majirique ca-ani wame majuu jã ĩi,”
ĩibana quena ĩitorique jetore ĩi buionucuma.
Diore ca-apiʉjaquẽna na ca-tʉgooñarije ãa na ca-ĩi buiori wame.
21 Aperã jicãarã cariape ca-anie Dio ye quetire ca-apibatana maca ca-ĩito pairije macare bueri,
Dio ye quetire apigaquẽema yucʉra.
To bairi na apiqueticõaña mʉa,
Timoteo,
ricati ca-ĩi buiorãre.
Mani Pacʉ Dio caroaro wariñuu netorique mʉre cʉ̃ joato.
To cõona yʉ Pablo mʉre yʉ queti joo.