SEGUNDA CARTA DEL APÓSTOL SAN PABLO A LOS
TESALONISENSES
Pablo y sus compañeros escriben a la iglesia
1
Yʉ Pablo,
yʉ mena macana mena Silvano,
Timoteo jãa mena ati pũuro Tesalónica macanare mʉjaare jã queti joo,
mani Pacʉ Diore,
mani Ʉpaʉ Jesucristo quenare ca-apiʉjarãre.
2 Caroaro jã ñuu roti mʉjaare.
Mani Pacʉ Dio,
mani Ʉpaʉ Jesucristo quena caroare cʉ̃ joato mʉjaare.
Dios juzgará a los pecadores cuando Cristo venga
3 Jã yarã,
yucʉra Diore mʉja apiʉja nʉcʉbʉgo majuucõa.
Ca-ame mai netorã mʉja ãa.
To bairo mʉja ca-bairijere tʉgooñarã oco bairo Diore jã ĩi wariñuu:
“Dio,
Tesalónica macanare caroaro na mʉ ájupa.
Ñuu majuucõa na ca-anie.”
To bairona Diore jã ĩinucugarã to canacã ni mʉjaare tʉgooñari.
4 To bairo quena to canacã paʉ macana aperã Diore ca-apiʉjarã tʉpʉre aáteñarã,
“Ñuu majuucõama Tesalónica macana,”
na jã ĩinucu.
“Seeto ca-popiye tamuorã anibana quena Diore apiʉjari caroaro anicõama Tesalónica macana,”
na jã ĩi buionucu mʉja ca-bairijere.
5 To bairo apiʉjarã tamuoriquere mʉja ca-nʉca ocabʉtiro,
“Yʉ ca-rotiri paʉpʉ yʉ mena anicõagarãma,”
mʉja ĩimi Dio.
Caroorã macare na cá-átie wapa cariape Dio na cʉ̃ ca-popiyeyepere mani maji tʉga.
6 To bairi mʉjaare ca-popiyeyerãre na popiyeyegʉmi Dio to bairo mʉjaare na cá-átie wapa tunu.
7-9 Mʉja macare yerijãrique mʉja joogʉmi Dio,
popiye tamuorique manona.
Jã quenare to bairona caroare jã joogʉmi.
Mani Ʉpaʉ Jesú jõ buipʉ cá-atácʉ cʉ̃ ca-ejari paʉna to bairona joogʉmi Dio.
Cʉ̃ tʉ macana mena ca-tutuarã mena seeto ca-ʉ̃rije mena ejagʉmi mani Ʉpaʉ Jesú,
cʉ̃ ye quetire ca-apiʉjaquẽnare,
Diore ca-majiquẽnare na popiyeyei acʉ́.
Caroorije na cá-átie wapa na reegʉmi mani Ʉpaʉ Dio.
Nare cʉ̃ tʉpʉ ani rotiquetigʉmi.
To canacã rʉmʉ caroori paʉpʉ anicõa aninucugarãma.
To bairi Diore cá-áti nʉcʉbʉgorã mena,
cʉ̃ ca-tutuarijere ca-tʉjʉ wariñuurã mena aniqueticõagarãma rooro mʉjaare cá-ána maca.
10 To bairona na popiyeyegʉmi Dio cʉ̃re ca-apiʉjaquẽnare.
Dio mena aniqueti majuucõagarãma naa.
Mani Ʉpaʉ Jesú cʉ̃ ca-tunu ejari paʉ cʉ̃re ca-apiʉjarã maca nipetirã,
“Ca-ñuu majuʉ mʉ ãa,”
Jesúre cʉ̃ ĩi nʉcʉbʉgogarãma.
Mʉja quena ti paʉpʉ mʉja anigarã,
Jesú ye queti jã ca-buioriquere ca-apiʉjaricarã aniri.
11 To bairi mʉjaare Diore jenibojarã oco bairo jã ĩi jenibojanucu:
“Dio,
mʉ ca-tutuarijere na mʉ joowa Tesalónica macanare,
ca-ñuurije nipetiro mʉ ca-boori wamere na cá-áti ocabʉtiparore bairo ĩi.
Mʉre ca-apiʉjarã na ca-ano caroare na cá-áti majipere na mʉ joowa,
Dio,”
cʉ̃re jã ĩi jenibojanucu mʉjaare.
To bairi cʉ̃ ca-tutuarije mena caroare mʉja áa.
To bairo caroaro mʉja cá-áto tʉjʉʉ,
“Ca-ñuurã majuu ãma,”
mʉja ĩi wariñuu tʉjʉgʉmi Dio mʉjaare.
12 Aperã quena caroare mʉja cá-áto tʉjʉrã mʉja tʉjʉ nʉcʉbʉgogarãma.
Na quena mani Ʉpaʉ Jesúre áti nʉcʉbʉgogarãma caroarã cʉ̃ yarã mʉja ca-ano tʉjʉrã.
To bairona caroaro mʉja átinemogʉmi Dio,
mani Ʉpaʉ Jesucristo mena.
Mʉja quena cʉ̃ yarã mʉja ca-ano maca caroaro mʉja átinemogʉmi Dio.