5
Di rʉmʉ ca-ano,
noo ca-paʉ majuu mani Ʉpaʉ Jesú tunu atígʉmi majiña maa.
To bairi jã buioquẽe.
2 Jee rutiri majocʉ ñamipʉre ca-naitĩaro mani ca-tʉgooñaquẽtopʉ jee rutigʉ ejaʉmi.
Cʉ̃ cá-atípere mani ca-majiquẽtore bairona Jesú quena atígʉmi mani ca-tʉgooña majiqueti paʉpʉ.
“Camaja na ca-tʉgooña majiqueti paʉpʉ atígʉmi mani Ʉpaʉ,”
mʉja ĩi maji tʉga,
meere.
3 Na ca-maji jʉgoyeyequẽtopʉ nemoo na reegʉmi Dio cʉ̃re ca-apiʉjaquẽnare.
Oco bairo ĩi tʉgooñagarãma:
“Caroaro mani ãa.
Ñee unie mani uwiquẽe.”
To bairo na ca-ĩibato quena nemoona nare reegʉmi Dio.
Nare cʉ̃ ca-reeparo jʉgoye dope bairo bai ruti majiquetigarãma.
Cãromio,
“To cõopʉ majuu macʉ cʉtigo yʉ wijio jʉgogo,”
cõ ca-ĩi majiquetore bairona,
“To cõopʉ majuu Ʉpaʉ Jesú atígʉmi,”
ĩi majiquetigarãma na quena.
4 Yʉ yarã,
mʉja maca,
“Ti rʉmʉna ejagʉmi,”
ĩi majiquetibana quena,
“Jesucristo tunu atígʉmi,”
mʉja ĩi maji.
Cʉ̃ ca-tunu atípere ca-majiquẽnare bairo mʉja aniquẽe.
To bairi Jesucristo cʉ̃ ca-tunu atí paʉ ca-ano mʉja acʉaquetigarã.
Jee rutiri majocʉ cʉ̃ ca-ejaro camaja na ca-acʉarore bairo mʉja acʉaquetigarã cʉ̃ ca-tunu atí rʉmʉ ca-anopʉ.
5 Jesucristore ca-majirã mʉja ãa mʉja quena.
Cʉ̃re ca-majiquẽna mee mani ãa.
6 To bairi aperã Jesucristo cʉ̃ ca-tunu atípere ca-tʉgooñaquẽnare bairo ca-baiquetiparã mani ãa.
Caroaro ca-tʉgooña maja catí yuuparã mani ãa.
7 Ca-naitĩaropʉ caninucuma camaja.
Ca-eti cumurã ñamipʉre eti mecʉma.
8 To bairi ʉmʉrecopʉ,
muipu cʉ̃ ca-bujuro caroaro ca-tʉgooña maja catírãre bairo ca-anipe ãa,
Jesucristo cʉ̃ ca-tunu atípere tʉgooña yuurã.
Polisía come cori pejama na rʉpoaripʉre,
come ajeri jañama,
nare ca-quẽgarã beju na to ca-puaquetiparore bairo ĩirã.
Na ca-cʉgorijere bairo mani maca mani yeripʉ mani cʉgogarã Jesucristore api nʉcʉbʉgori ame mairi,
Jesucristo cʉ̃ ca-tunu atópʉ cʉ̃ mena mani ca-anicõa aninucupere tʉgooñari.
To bairo mani ca-ãmata Sataná mani rooye tuu majiquetigʉmi.
9 Dio caroorãre punijiniri na cʉ̃ ca-popiyeyeparã meere,
manire ca-cũuñupi Dio.
Mani ye wapa manire cʉ̃ ca-popiyeyebopere mani Ʉpaʉ Jesucristo manire cʉ̃ ca-bai yajibojaro cʉ̃ ca-netoobojaparã macare manire ca-cũuñupi Dio.
10 To bairi Cristo cʉ̃ ca-tunu atí paʉpʉre mani ca-catíata cʉ̃ mena mani anigarã.
Cʉ̃ ca-tunu atíparo jʉgoye mani ca-bai yajiata quena mani catí tunugarã.
Catí tunu,
cʉ̃ tʉpʉ cʉ̃ mena mani anigarã.
11 To bairi,
meere,
mʉja ca-ame ĩirore bairona ati wame ame buio majiorã ame tʉgooña ocabʉtioya mʉjaa,
netobʉjaro mʉja ca-apiʉjaparore bairo ĩirã.
Pablo aconseja a los hermanos
12 Yʉ yarã,
mʉja mena macana Dio ye quetire ca-buiorãre Dio cʉ̃ ca-cũricarãre na tʉjʉ nʉcʉbʉgoya.
Dio yere mʉjaare ca-majiorã ãma.
Dio cʉ̃ ca-cũricarã ãma.
Caroaro átinemoma mʉjaare,
Jesú ye quetire buiorã.
Mani Ʉpaʉ Jesú cʉ̃ ca-rotiro mena dope bairo mʉja ca-anipere buiorã seeto paama.
13 To bairo caroaro mʉja na cá-átibojarijere tʉgooñari na maiña.
Na nʉcʉbʉgoya.
Mʉja majuuna caroaro anicõaña.
Caroaro ame ája,
ame wada canamurique manona.
14 Jã yarã,
ati wame quenare seeto mʉjaare jã buiogacʉpʉ:
Ca-teeye pairãre,
“Netoo nʉcaqueticõaña,”
na ĩiña.
Ca-tʉgooñarique pai yericʉnare tʉgooña tutuarique na ĩi buioya.
Aperã popiye cʉtajere ca-nʉca majiquẽnare na átinemoña.
To bairo ca-bairãre nipetirã patowãcaricaro mano caroaro mena na buioya.
15 Jicãʉ rooro mʉjaare cʉ̃ cá-ápata caroorije cʉ̃ áti amequeticõaña.
Caroa macare cʉ̃ ája.
Aperã nipetirãre caroa jeto na ája.
16 Yeri wariñuucõa aninucuña.
17 Diore jenicõa aninucuña.
Cʉ̃re jeni janaquẽja.
18 Nipetirije mʉja ca-bairije to canacã wame Diore wariñuuriquere cʉ̃ ĩiña.
To bairona mʉja ca-ĩipere boomi Dio Jesucristo yarã mʉja ca-ano maca.
19 Dio Espíritu Santo mʉja yeripʉ caroaro mʉjaare cʉ̃ cá-átigarijere mataquẽja.
Caroaro cʉ̃ apiʉjaya.
20 Dio ye quetire ca-buiorã na ca-buiorijere bai botioquẽja.
21 Na ca-buiorijere caroaro api cõoña peocõaña,
¿cariape na ĩití?
ĩirã.
Api cõoña peori cariape na ca-ĩata to bairona na ca-ĩri wame ája.
22 Ca-ñuuquẽtie macare nipetiri wame bai netooña.
23 Dio maca caroaro ani yeri ñuuriquere ca-joʉ ãmi.
To bairi ʉgueri coje reericarore bairona mʉja yerire caroorije nipetirijere caroaro cʉ̃ reato,
cʉ̃ yarã jeto mʉja ca-aniparore bairo ĩi.
Mʉja yerire,
mʉja tʉgooñariquere,
mʉja rupaʉri quenare to canacã rʉmʉ caroaro cʉ̃ coteato,
mani Ʉpaʉ Jesucristo cʉ̃ ca-tunu ejaparo jʉgoye caroorije átiquẽnana mʉja ca-aniparore bairo ĩi.
24 Cʉ̃ yarã ca-aniparã mʉjaare ca-cũricʉ aniri to bairona caroaro mʉja átibojagʉmi Dio.
Cʉ̃ ca-ĩri wame cõo cariape átiboja majuucõagʉmi Dio.
Saludos y bendición final
25 Jã yarã,
Diore jãare jenibojacõa aninucuña.
26 Cristore ca-api nʉcʉbʉgorã nipetirã caroaro na ñuato.
27 Ati pũuro mʉjaare yʉ ca-queti joorije Cristore ca-api nʉcʉbʉgorã nipetirãre na bue iñooña mʉjaa.
Mani Ʉpaʉ Jesú to bairo cʉ̃ ca-rotiro mena mʉjaare yʉ ĩi.
28 Mani Ʉpaʉ Jesucristo caroa ani wariñuu netorique mʉjaare cʉ̃ joato.
To cõona ãa.