La vida que agrada a Dios
4
Yucʉacã ape wamere mʉjaare jã buio tʉjagarã,
mani Ʉpaʉ Jesucristo cʉ̃ ca-buio rotirijere.
Dio cʉ̃ ca-tʉjoorije jetore átajecʉja,
mʉja tʉpʉ ãnapʉ jã ca-ĩi buioeparore bairo.
Yucʉacãre Dio cʉ̃ ca-boorijere mʉja átinucu.
Seetobʉja áticõaña.
2 Mani Ʉpaʉ Jesú cʉ̃ ca-rotiro mena mʉjaare jã cá-áti rotiepere mʉja tʉgooña majirã.
3 Dio cʉ̃ ca-tʉjoorije jetore,
caroaro mani cá-áto boomi,
cʉ̃ yarã mani ca-ano maca.
Áti epericarã cʉtaje,
caroorije átajere booquẽemi Dio.
4 To canacãʉna ani nʉcʉbʉgorique mena cʉ̃ nʉmo majuu mena jetore mani ca-anipere boomi Dio.
Aperã mena caroorije átajere booquẽemi Dio.
5 Aperã Diore ca-majiquẽna seeto áti epe paima.
Nare bairo aniqueticõaña mʉjaa,
6 Dio maca caroorije tʉjʉ majiri tie wapa seeto mani popiyeyeboʉmi ĩirã.
To bairi apeĩ nʉmo mena caroorije átiqueticõaña.
Apeĩ nʉmo mena mʉja cá-ápata cõ manapʉre áti rooye tuurã mʉja átiborã.
To bairi rooro cá-áti eperã aniqueticõaña.
Dio maca to bairo cá-ánare tʉjʉ majiri seeto na popiyeyegʉmi.
Meere ca-jʉgoyepʉna cariapena tiere mʉjaare jã ca-ĩi buiowʉ.
7 Caroare mani cá-áti anipe jetore mani ca-cũuñupi Dio.
Caroorijere mani cá-áti epe anipe macare mani ca-cũquẽjupi.
8 To bairi atie jã ca-buiorijere apigateerã Diore apigateerã mʉja baiborã.
Jã meere apigateerã mʉja baiborã.
Diopʉre cʉ̃ apigateerã mʉja baiborã.
Dio cʉ̃ Espíritu Santore ca-jooyupi mʉjaare,
cʉ̃ ca-boorijere mʉja áti rotii.
To bairi Dio cʉ̃ ca-booquẽtie mʉja cá-ápata,
“Dio,
mʉre jã booquẽe,”
ĩirã mʉja átiborã.
9 “Jesucristore ca-apiʉjarã aniri ame maiña mʉjaa,”
mʉjaare jã ca-ĩinemope maa.
Dio manire cʉ̃ ca-mai rotiriquere mʉja maji tʉga,
meere.
10 Nipetirã mʉja ya yepa Macedonia yepa ca-ãnare na mʉja mai Jesucristore ca-apiʉjarãre.
Atiere mʉjaare jã ĩi buio.
Netobʉjaro ame mainemocõa aninucuña.
11 Rooro ame ĩiquẽnana caroaro anicõaña.
Aperã na cá-áti aniere wada pai batequeticõaña.
Mʉja ye macaje macare tʉgooñari caroaro paariquecʉja mʉjaare jã cá-áti rotieparore bairona.
12 To bairo ána aperã yere ca-jenirã mʉja aniquetigarã.
To bairo caroaro mʉja majuuna mʉja ca-paariquecʉto tʉjʉrã Jesúre ca-apiʉjaquẽna quena mʉjaare tʉjʉ nʉcʉbʉgogarãma yua.
La venida del Señor
13 Jesucristore ca-apiʉjaricarã ca-bai yajiricarã na ca-baipere mʉjaare yʉ ĩi buiopa.
Tiere majirã seeto mʉja tʉgooñarique paiquetigarã mʉja yarã Jesúre ca-apiʉjarã na ca-bai yajiro.
Na quena cʉ̃ mena to canacã rʉmʉ anicõa anigarãma.
Jesúre ca-apiʉjaquẽna maca,
“Cʉ̃ mena jã anicõa aninucugarã,”
ĩi majiquẽema.
To bairi seeto tʉgooñarique paima na yarã na ca-bai yajiro.
14 Jesucristo manire cʉ̃ ca-bai yajibojaro bero tunu,
cʉ̃ ca-catí tunuriquere mani api nʉcʉbʉgo maji.
To bairo quena oco bairi wamere mani api nʉcʉbʉgo maji:
Cristo cʉ̃ ca-tunu atí paʉ cʉ̃re ca-apiʉjaricarã,
meere ca-bai yajiricarãre tunu catíogʉmi Dio,
Cristore cʉ̃ ca-tunu catíoricarore bairona.
15 To bairi mani Ʉpaʉ Jesú cʉ̃ ca-buiorica wamerena buiorã jã áa mʉjaare:
Mani Ʉpaʉ Jesú cʉ̃ ca-tunu atí paʉ ca-ano mani ca-catírã aperã cʉ̃re ca-apiʉjaricarã,
meere ca-bai yajiricarã Cristo tʉpʉ na jʉgoye mani aáquetigarã.
16 Oco bairo maca baigaro:
Mani Ʉpaʉ majuu jõ bui cá-acʉ́ rui atígʉmi pii awajarique mena.
Cʉ̃ tʉ macacʉ ángel rotibojari majocʉ quena pii awajagʉmi.
Dio putiricaro cʉ̃ ca-putirije báugaro.
To bairo ca-bairi paʉna Jesúre ca-apiʉjaricarã ãnana cawama rupaʉri mena tunu catí,
wamʉ nʉcagarãma.
17 Na ca-wamʉ nʉcarona mani ca-catírã Jesúre ca-apiʉjarã na mena mani wamʉ aágarã.
Wamʉ aá,
jõ bui oco ajeripʉ na mena mani Ʉpaʉ Jesúre mani boca tʉjʉgarã.
To bairo bairã mani Ʉpaʉ mena mani anicõa aninucugarã to canacã rʉmʉ yua.
18 To bairi ati wamere ame buiorã ame tʉgooña ocabʉtioya mʉjaa yua.