3
1-2 To bairi mʉja ye quetire apigarã jã ca-nʉca majiquẽpʉ.
To bairi Timoteore mʉja tʉpʉ jã cá-aá roti joowʉ,
Jesúre mʉja ca-api nʉcʉbʉgorijere,
tʉgooña ocabʉti tutuanemoriquere mʉjaare cʉ̃ buioato ĩirã.
Jã mena Jesucristo ye quetire ca-buio teñanemoʉ ãmi,
Dio yere ca-paabojaʉ aniri.
To bairi cʉ̃ joori yʉ maca yʉ ca-tuacõawʉ Silvano mena Atena na ca-ĩri macapʉre.
3 Aperã maca Jesúre mʉja ca-apiʉjaro tʉjʉrã mʉjaare popiyeyeyuparã.
To bairo mʉjaare na ca-popiyeyerije queti apirã Timoteore jã ca-joowʉ mʉja tʉpʉ.
Aperã nare na ca-popiyeyebato quena to bairona Jesúre na apiʉja janaqueticõato ĩirã cʉ̃re jã ca-joowʉ.
Aperã Jesucristore mani ca-apiʉjaro booquẽna popiye tamuoriquere mani átinucugarãma.
Meere tiere mʉja majirã.
4 Ca-jʉgoyepʉna mʉja mena anapʉna mʉja ca-tamuopere mʉjaare jã ca-ĩi buionucuwʉ.
Meere,
tie jã ca-ĩi buioeparore bairona bai.
5 To bairi mʉja ca-api nʉcʉbʉgorijere seeto majigarã jã ca-queti joo jeniñawʉ,
Sataná,
“Jesúre apiʉja janacõaña,”
na ĩi wadajãremi ĩirã.
To bairo mʉjaare cʉ̃ ca-ĩi wadajãrijere mʉja ca-apiata jocarãna Jesú ye quetire mʉjaare jã buioboricarã.
6 Yucʉacã Timoteo mʉja tʉpʉ ca-tʉjʉ ejaricʉ jã tʉpʉ tunu ejami,
meere.
Caroa quetire jã buiomi mʉja ca-aniere.
“Jesucristore caroaro apiʉja nʉcʉbʉgoma,”
jã ĩimi.
“Caroaro ame maima Tesalónica macana.
Caroaro mani tʉgooñama.
Na quena nare mani ca-tʉjʉgarije cõona caroaro mani tʉjʉgama,”
jã ĩmi Timoteo.
7 To bairi caroaro mʉja ca-apiʉja nʉcʉbʉgorijere jã cʉ̃ ca-buioro apirã jã yeri tʉgooña ocabʉti ca-tʉgooñarique paibatana.
8 To bairi mani Ʉpaʉ Jesucristore mʉja ca-apiʉja nʉcʉbʉgocõamata yeri wariñuurã jã anigarã.
9 Seeto jã wariñuu mʉja ca-bairijere queti apiri.
To bairi mʉja ca-bairijere tʉgooñari Diore jã ĩi wariñuu peo majiquẽna.
10 Ñami,
ʉmʉreco quena nairoacã Diore jã ĩi jeninucu,
mʉjaare tʉjʉnemorã aágabana.
To bairi,
“Na tʉpʉ jã cá-aápere jã átibojaya,”
cʉ̃ jã ĩi jeninucu Diore.
“Cristore mʉja ca-apiʉja nʉcʉbʉgorijere jã buio yaparogacʉpʉ,”
cʉ̃ jã ĩi jeninucu Diore.
11 Oco bairo mani Pacʉ Diore,
mani Ʉpaʉ Jesucristo quenare jã ĩi jeninucu:
“Tesalónica macana tʉpʉre jã cá-aá majipere jã átibojaya.
12 Na majuuna na ca-ame mainemoparore bairo na ája.
Aperã camaja quenare nipetirãre na ca-maiparore bairo na ája,
nare jã ca-mairore bairona.
13 Nare yeri ocabʉtiriquere na jooya,
mʉ ca-rotiqueti wamere na cá-átiquetiparore bairo ĩi.
Mʉ ca-tʉjoorije jetore na áparo.
To bairi mani Ʉpaʉ Jesú cʉ̃ yarã mena cʉ̃ ca-tunu ejaro,
‘Caroarã ãma.
Na yeripʉre caroorije maa,’
na mʉ ĩi tʉjʉgʉ,”
mʉjaare jã ĩi jeniboja mani Pacʉ Diore.