Los que se apartarán de la fe
4
Espíritu Santo,
caroaro manire majiomi oco bairi wamere:
Ati ʉmʉrecóo ca-petiparo jʉgoye jicãarã Jesucristo ye quetire na ca-apigabatajere booquetigarãma.
To cõona api janagarãma.
Cariape ca-anie Jesú yere api janari ricati ca-buiorã,
ca-ĩitorã na ca-ĩi buiorije macare apiʉjagarãma.
Wãtia Sataná yarã na ca-ĩitorijere na ca-queti buio joo rotirã macare apiʉjanucugarãma.
2 To bairo ricati ca-ĩi buiorã maca,
“Ĩitoriquere buiorã jã áa,”
ĩi tʉgooña jʉtiriti majiquẽema,
yoaro ca-ĩito jeeyarã majuu anibana.
3 Camajare wamo jia rotiquẽema.
Jicã wamerire ʉga rotiquẽema.
Dio maca ʉgarique to canacã wame ca-cũuñupi cariape macajere ca-majirã na ca-ʉgapere,
Jesúre ca-apiʉjarã na ca-ʉgapere.
Tiere ʉgari,
“Caroaro jãare mʉ jooyupa,”
yʉre na ĩato ĩi ca-cũuñupi Dio to canacã wame ʉgariquere.
4 Tie ʉgarique nipetirije Dio cʉ̃ ca-cũrique caroa jeto ãa.
To bairi Dio cʉ̃ ca-cũriquere,
“Atie cʉ̃ ca-ʉga rotiquẽtie ãa,”
ĩi majiña maa.
To bairi tie ʉgariquere bʉgarã,
“Caroare jãare mʉ jooyupa,”
Diore ĩricarona ñuu.
5 To bairi ʉgarique,
mani ca-ʉgape maca to bairo Diore mani ca-jeniro jʉgori ñuubʉja.
Dio manire cʉ̃ ca-ĩricarore bairona ñuubʉja.
Un buen siervo de Jesucristo
6 To bairijere mani yarãre na buionucuʉ caroaro nare ca-jʉgo ãcʉ̃ mʉ anigʉ Timoteo.
Jesucristo cʉ̃ ca-boorore bairo caroaro cariape cá-ácʉ mʉ anigʉ.
To bairi Jesucristo ye queti cariape macaje apiʉjanucucõari Jesúre cʉ̃ ca-boorore bairo cʉ̃ mʉ áti ʉja nutuagʉ.
7 Aperã ati yepa macana Diore ca-apiʉjaquẽna maca caroorije,
na ca-buio macarijere apiqueticõaña.
Na ca-queti buiorije ñe unie átiya mano.
Wapa maa tie.
Dio cʉ̃ ca-boorije ca-ñuurije macare ocabʉtirique mena átinucucõaña.
8 Tutuaro mani ca-paaro ñuubʉja.
To bairo tutuaro mani ca-paaro mani rupaʉ caroaro ocabʉti.
To bairo to ca-anibato quena Dio cʉ̃ ca-boorije ca-ñuurije maca ocabʉtirique mena mani cá-átie netoro ca-ñuurije ãa.
Ati yepa ãnaa tiere mani cá-áto caroaro mani joogʉmi Dio.
Cabero ape ʉmʉrecóopʉ jõ buipʉ mani ca-ano quena caroaro wariñuuriquere mani joogʉmi Dio.
9 Atie mʉre yʉ ca-queti buiorije caroaro cariapena ãa.
To bairi camaja nipetirã na ca-apiʉjape boo.
10 Tiere na apiʉjaato ĩirã mani maca popiye mani bai.
To bairo popiye baibana quena,
mani paa janaqueticõagarã.
Dio cʉ̃ ca-queti buio cũuriquere mani queti buiocõa aninucugarã.
Mani Ʉpaʉ Dio ca-catícõa aninucuʉ manire cʉ̃ ca-ĩricarore bairona manire átigʉmi.
Manire netoogʉmi.
Nipetirãre ca-netoo majii ãmi Dio.
To bairo nipetirãre na netoo majibacʉ quena cʉ̃ ye quetire cariape ca-api nʉcʉbʉgorã jetore na netoogʉmi yua.
11 To bairo mʉre yʉ ca-queti buiorijere aperãre na ĩi buiori caroaro na áti ʉja rotiya.
12 Cawamaʉ mʉ ãa,
Timoteo.
To bairo cawamaʉ mʉ ca-anibato quena,
mʉre ca-nʉcʉbʉgoparã ãma.
“Cawamaʉ anibacʉ majiquẽcʉmi,”
mʉre na ĩi tʉjʉ rocaqueticõato to macana.
Nare ca-jʉgo anipaʉ mʉ ãa cabʉcʉ aniquetibacʉ quena.
To bairi caroaro nare buiocõa aninucuña.
Caroaro ãnajecʉja.
Aperãre na mairi nare átinemoña.
Popiye baibacʉ quena,
Jesucristore caroaro tʉgooña nʉcʉbʉgo ocabʉtiya.
Caroorije átiquẽja.
To bairo mʉ cá-áti aniere tʉjʉri to macana Jesúre ca-apiʉjarã mʉre bairona anigarãma na quena caroaro.
13 To bairi topʉ yʉ ca-ejaparo jʉgoye mʉja ca-neñaponucuri paʉ Dio ye queti tirʉmʉpʉ macana na ca-ucariquere na bue iñoonucuña.
Dio ye quetire caroaro na buionucuña.
14 Yʉ yaʉ,
nemoona Jesúre ca-apiʉjarãre ca-jʉgo ãna Dio yere mʉ cá-áti majipere ca-queti buio jʉgoyeyewã.
Diore mʉ jenibojari,
mʉ ñu peori mʉ cá-áti majipere ca-queti buio jʉgoyeyewã.
To bairo na cá-áto Dio cʉ̃ yere mʉ cá-áti majipere ca-jooyupi.
To bairi Dio yere mʉ cá-áti majiri wame cõona Dio mʉre cʉ̃ ca-majiori wame átinucucõaña.
15 Atiere mʉ yʉ ca-ĩi uca joorijere caroaro áti ocabʉti aninucuña.
To bairo mʉ cá-áto camaja,
“Caroaro manire ca-jʉgo ãcʉ̃ ãmi Timoteo,”
mʉ ĩigarãma yua.
Caroaro mʉ cá-áti nutuatiere tʉjʉgarãma.
16 To bairi mʉ cá-átie,
aperãre Dio yere na mʉ ca-buiorije quenare caroaro tʉgooña maja catíya,
¿cariape jeto to ãtí?
ĩi.
To bairo ácʉ,
mʉ yajiquetigʉ.
Mʉ ca-buiorijere ca-apirã quena yajiquetigarãma.