Cómo deben ser los obispos
3
Cariape macá wame ãa atie:
Noa una Jesucristore ca-apiʉjarãre ca-jʉgo ãna anigarã caroa wamere cá-ána anigarã baima.
2 To bairi Jesúre ca-apiʉjarãre ca-jʉgo aniparãre oco bairo ca-bairãre na bejeya.
Camaja,
“Caroorije cá-ána ãma,”
na ca-ĩiquẽnare ca-bejepe ãa.
Jicão jeto ca-nʉmoa cʉnare,
cá-áti epericarã cʉtiquẽnare boo.
Na cá-átipere caroaro ca-tʉgooña maja catírãre boo.
Na ca-ãnaje cʉtiere Dio cʉ̃ ca-boorore bairo ca-tʉjʉ beje majirãre boo.
Aperã na ca-nʉcʉbʉgorã unare boo.
cá-aáteñarã ejarãre caroaro,
“Jã tʉpʉ ãña,”
ca-ĩi wariñuurã unare boo.
Aperãre caroaro Dio yere ca-buio majirãre boo.
3 To bairi Jesucristore ca-apiʉjarãre ca-jʉgo aniparã ca-eti cumu pairã,
ca-tuti maca pairã quenare booquẽe.
Aperã mena caroaro ca-ani majirãre boo.
Aperãre ca-punijinirãre booquẽe.
Apeye uniere ca-boo netorã,
ca-niyeru boo netorã ca-aniquetipe ãa.
4 To bairi Jesúre ca-apiʉjarãre ca-jʉgo ãna na ya wii macanare caroaro ca-roti majirã na ãmaro.
Na punaa maja catírique menare caroaro na ca-buiorijere na ca-apiʉjaro cá-ánare ca-bejepaʉ mʉ ãa,
Timoteo.
5 Na ya wii macanare na ca-jʉgo ani majiquẽpata,
dope bairo Jesúre ca-apiʉjarã quenare na jʉgo ani majiquetiborãma.
To bairi na ya wii macanare caroaro ca-jʉgo ani majirã jetore boo.
6 Nemoona Jesúre ca-api nʉcʉbʉgo jʉgoricarã unare ca-bejepe ãa ca-apiʉjarãre na ca-jʉgo aniparãre.
Na bero,
cawama apiʉjaricarãre bejequẽja.
Cawama apiʉjaricarãre mʉ ca-bejeata,
“Aperã netoro ca-roti majirã jã ãa,”
ĩi tʉgooñaborãma.
To bairo ĩi tʉgooñabana tirʉmʉpʉ Sataná,
“Aperã netoro ca-roti majii yʉ ãa,”
cʉ̃ ca-ĩi tʉgooñaricarore bairona bai bui cʉtiborãma.
To bairo rooro na ca-bairo Satanáre cʉ̃ cá-átatore bairona na popiyeyeboʉmi Dio,
na quenare.
To bairi nemoona Jesúre ca-apiʉja jʉgoricarã una macare boo,
ca-jʉgo aniparãre.
7 To bairi caroa jeto cá-átiparã ãma.
Caroaro cá-ána na ca-aniquẽpata aperã maca na nʉcʉbʉgoquetiborãma,
Dio ye quetire ca-apiʉjaquẽna maca.
Caroorije quetire na ĩi buio bateborãma.
Sataná maca to bairo na cá-áto boʉmi.
To bairi caroaro cariape cá-áti ani majirã jetore boo,
Jesúre ca-apiʉjarãre ca-jʉgo aniparãre.
Cómo deben ser los diáconos
8 Jesúre ca-apiʉjarãre ca-jʉgo ãnare cá-átinemorã Dio yere ca-paa cotebojarã na ca-anipe quenare mʉ yʉ buiogʉ.
Na quena,
“Caroarã ãma,”
aperã na ca-ĩi nʉcʉbʉgorãre boo.
Caĩitoquetiparã ãma.
Ca-eti cumu pairã unare booquẽe.
Caroorije átiri ca-wapatarã quenare booquẽe.
Caroa macaje paari ca-wapatarã macare boo.
9 To bairi Jesú ye queti cariape macajere ca-api nʉcʉbʉgorãre boo.
To bairi,
“Ca-buicʉcʉ mee yʉ ãa,”
cariape ca-ĩi majirãre boo.
10 To bairi Dio yere ca-paa cotebojarãre na cũugarã jʉgoye yoaro na ca-tʉjʉ majipe ãa,
¿to bairona caroaro cá-ána na ãtí?
ĩi majigarã.
To bairi caroarã,
ca-bui cʉtiquẽna na ca-ano tʉjʉrã to cõona na ca-cũupe ãa.
11 To bairi na nʉmoa quena,
“Caroaro cá-ána ãma,”
aperã na ca-ĩi nʉcʉbʉgorã romirire boo.
Aperãre,
“Rooro áama,”
nare ca-ĩi buio baterã ca-aniquetiparã ãma.
Na cá-átipere caroaro ca-tʉgooña maja catírã ca-aniparã ãma Dio yere ca-paa coterã na nʉmoa quena.
Cariape,
na ca-ĩirore bairona cá-áti ocabʉtirãre boo,
ca-ĩitoquẽnare.
12 To bairi Dio yere ca-paa cotebojarã tunu to canacãʉna jicão jeto ca-nʉmoa cʉnare boo.
Na punaa,
na ya wiiri macanare caroaro ca-roti majirãre boo.
13 To bairi Dio yere ca-paa cotebojarã caroaro na cá-áto tʉjʉrã nare nʉcʉbʉgogarãma camaja.
To bairo quena Jesucristore na ca-nʉcʉbʉgorijere uwiquẽnana,
boboquẽnana aperãre na queti buio ocabʉtigarãma.
El secreto de nuestra religión
14-15 Yoaro mee mʉ tʉpʉ yʉ aágʉ,
yʉ tʉgooña.
To bairo aágabacʉ quena yoaro mee yʉ aá majiquetiboʉ ĩi ati pũuro mʉre yʉ uca joo.
Dio yarã oco bairo ca-aniparã ãma ĩi mʉ yʉ uca joo.
Dio ca-anicõa aninucuʉ cʉ̃ ye quetire ca-apiʉjari poa macana mani ãa.
To bairi cʉ̃ yarã aniri cariape cʉ̃ ca-queti buioriquere mani queti buio netocõa anigarã.
16 Atie queti buiorique mani ca-api nʉcʉbʉgori wame,
caroa wame ca-ani majuuri wame ãa.
Oco bairo ãa ti wame queti buiorica wame:
Jesú ati yepapʉ buiaʉ mani camajare bairona rupaʉ cʉtiri caroa jetore cá-ájupi.
Espíritu Santo,
“Jesucristo caroaʉ majuu ãmi,”
cʉ̃ ca-ĩi buioyupi.
Ángel maja Dio tʉ macana quena cʉ̃ ca-tʉjʉyupa.
To bairi ati yepa nipetiropʉ ca-jejayupa Jesú ye quetire.
To bairi tie quetire apirã ati yepa nipetiri paʉ macana jicãarã ca-apiʉjayupa.
To bairi mani Pacʉ Dio maca Jesúre cʉ̃ ca-ne aájupi tunu jõ buipʉ yua.a
Atie ãa caroa queti buiorique mani ca-api nʉcʉbʉgori wame.