Instrucciones sobre la oración
2
Oco bairo mʉ yʉ ĩi buio jʉgogʉ:
Aperã Diore na jenibojaya,
nare cʉ̃ átinemoato ĩirã.
Camaja nipetirãre na jenibojaya Diore.
Mʉja ye ca-anipe quenare Diore cʉ̃ jeniya.
Cʉ̃ jeniya,
“Caroaro jãare mʉ átibojanucu,
ñuubʉja,”
Diore cʉ̃ ĩiña.
2 Ʉparãre nipetirã ca-rotirãre Diore na jenibojaya.
Camajare ca-rotirã caroaro na ca-jʉgo aniparore bairo Diore na jenibojaya.
To bairo caroaro camajare na ca-jʉgo ãmata ame tutirique mano caroaro mani anigarã.
To bairo ãnaa Dio cʉ̃ ca-boorore bairo mani ani majigarã.
3 Aperãre Diore na mani ca-jenibojaro ñuubʉja.
Dio manire ca-netooʉ caroaro manire tʉjʉ wariñuugʉmi to bairo mani cá-áto.
4 Camaja nipetirã caroorije na cá-átiere na netoobojagabapi Dio.
To bairona cariape queti buioriquere na ca-majiro boobapi.
5 Jicãʉna ãmi Dio.
Apeĩ maami.
To bairo quena jicãʉna ãmi Jesú mani camaja caroaro Dio mena mani ca-anipere cá-áti majii.
Jicãʉna ãmi cʉ̃ Pacʉ Diore manire ca-jenibojaʉ.
Jesucristo jetona ãmi camajocʉ,
manire bairona ca-rupaʉcʉcʉ caroaro Dio mena mani ca-anipere cá-áti majii.
6 Jesucristo ca-bai yajiyupi caroorije mani cá-átie wapa,
camaja nipetirã caroaro Dio mena na ãmaro ĩi.
To bairo manire cʉ̃ ca-bai yajibojaro Dio cʉ̃ ca-booricarore bairo ca-baiyupi Jesú.
To bairi,
“Camaja nipetirãre netoogami Dio,”
mani ĩi maji,
“Manire ca-bai yajibojayupi,”
ĩi tʉgooñari.
7 Tie caroa quetire yʉre ca-buio rotiwĩ Jesú.
Judío maja ca-aniquẽna cʉ̃re na ca-nʉcʉbʉgoro boʉ,
cariape macajere nare ca-buiopaʉre yʉ ca-cũuwĩ.
Jesucristore ca-apiʉjaʉ aniri cariape mʉ yʉ ĩi,
Timoteo.
Ĩitorique me ãa.
8 To bairi nipetiropʉ Jesúre ca-nʉcʉbʉgorã na ca-neñaporopʉ caʉmʉa Diore ca-jeni nʉcʉbʉgorã na ca-ano yʉ boo.
Roorije cá-átiquẽna,
ñu mʉgori Diore ca-jenirã na ca-ano yʉ boo.
Ca-ame punijinirique mana,
ca-ame tutiquẽna na ca-ano yʉ boo.
9 To bairi cãromia maca ca-nʉcʉbʉgorã romiri na ca-jañanucurijere bairije ca-jañape ãa jutiire.
Caʉmʉa jãare na tʉjʉ ʉgari peato ĩirã mee to bairije ca-jañape ãa.
“Aperã netoro caroarã jã ãa,”
ĩi tʉgooñari ricati wame ca-wʉga peoquetipe ãa.
Apeye ca-ajiyarije,
ca-wapa paca netorije wamagariquere ca-jaña netoquetipe ãa.
Aperã,
“Caroarã romiri ãma,”
na ĩato ĩirã caroaro jeto cá-átinucupe ãa.
10 Diore cá-áti nʉcʉbʉgorã romiri na cá-átinucurore bairona cá-átipe ãa.
Caroaro aperãre cá-átinemonucurã ca-anipe ãa.
To bairona na ãmaro cãromia,
aperãre na tʉjoo rotirã.
11-12 Cãromia caʉmʉa macare na ca-rotipere,
nare na ca-jʉgo buiope quenare yʉ booquẽe.
To bairi mʉja ca-neñapo bueri paʉ cãromia maca ca-jʉgo buioʉ cʉ̃ ca-ĩrijere wadaquẽnana caroaro na apiʉjaato.
13-14 Oco bairo ãa:
Dio Adán're cá-áti jʉgoyupi.
Cʉ̃ bero Evare cá-ájupi.
To bairo nare cʉ̃ cá-áti yaparoro bero,
caʉmʉ maca meere;
cãromio macare cõ ca-ĩito jʉgoyupʉ Sataná.
To bairo cʉ̃ ca-wadajã ecoorico aniri Diore ca-netoo nʉca jʉgoyupo.
To bairi caʉmʉare ca-rotiparã me ãma cãromia maca.
15 To bairo Eva cõ ca-netoo nʉcarique to ca-anibato quena caroorã ya paʉpʉ na ca-yajibopere netogarãma cãromia,
Diore apiʉjari.
Cʉ̃re na ca-apiʉjaro,
caroaro na ca-punaacʉto,
aperãre na ca-mairo,
tʉgooña majirique mena caroare na cá-átinucuro,
to bairo caroaro cʉ̃re na ca-apiʉjaro na netoogʉmi Dio cãromia quenare.