3
Jesucristo yarã mani ãa,
manire cʉ̃ ca-bai yajibojarique jʉgori.
Ca-bai yajiricʉ cʉ̃ ca-anibato quena Dio cʉ̃ ca-tunu catíoyupi.
Cʉ̃ tunu catíori jõ buipʉ cʉ̃ mena ca-rotiire cʉ̃ ca-cũuñupi Dio.
To bairi Cristo yarã mʉjaare ca-cũuñupi Dio mʉja quena caroarã ca-aniparãre.
To bairo quena jõ buipʉ Cristo mena to canacã rʉmʉ mʉja anicõa aninucugarã.
To bairi Cristo mena to canacã rʉmʉ ca-anicõa aninucuparã aniri cʉ̃ ye macare tʉgooñaña mʉjaa.
2 Cʉ̃ ye jetore tʉgooñari ati yepa macaje caroorije tʉgooñaquẽja.
3 Cristore cʉ̃ mʉja ca-apiʉjaro maca caroorije mʉja cá-áti anibatajere ca-majirioyupi Dio.
Jicãʉ bai yajiri nipetirije cʉ̃ cá-átibatajere bai yaji weomi reericarore bairona.
To bairona mʉja quena ca-jʉgoye caroorije mʉja cá-átibatajere bai weo reerique ãa.
To bairi mʉja tʉjʉ ʉjanucumi Cristo,
cʉ̃ yarã mʉja ca-anicõa aniparore bairo ĩi.
4 To bairi ape rʉmʉpʉ cʉ̃ ca-aji baterije mena Cristo cʉ̃ ca-tunu ejari paʉpʉ mʉja quena cʉ̃ mena mʉja wariñuu anigarã.
La vida antigua y la vida nueva
5 To bairi Cristo mena Dio tʉpʉ ca-aniparã aniri ati yepa macana cʉ̃re ca-apiʉjaquẽna caroorije na cá-átiere,
ca-jʉgoye mʉja quena mʉja cá-átibataje uniere tʉgooña netoo ocabʉtiya.
Áti epericarã cʉtiqueticõaña.
Caroorije tʉgooñaqueticõaña.
Aperã seeto áti eperique jetore tʉgooñama.
Nare bairo tʉgooñaqueticõaña.
Caroorije na majuuna na ca-boorije nipetiri wame átinucuma Diore cá-áti nʉcʉbʉgoquẽna.
Nare bairo aniqueticõaña.
Apeye unie boo neto tʉjʉ ʉgooqueticõaña.
To bairo apeye uniere ca-tʉgooña nʉcʉbʉgoʉ ucʉ̃ Diore cá-áti nʉcʉbʉgoquẽcʉ ãcʉmi.
Apeye unie jetore cá-áti nʉcʉbʉgoʉ ãcʉmi.
6 To bairi nipetirije atie to canacã wame cá-ána macare na popiyeyegʉmi Dio cʉ̃re ca-apiʉjaquẽnare.
7 Mʉja quena nare bairona ca-bairã mʉja ca-anibajupa,
to canacã wame caroorije cá-átinucurã ãnapʉ.
8 Yucʉra yua,
to bairije bainemoqueticõaña tunu.
Ca-tuti pairã,
ca-ĩi punijinirã bainemoqueticõaña tunu.
Tʉjʉ tuti,
áti punijiniquẽja.
Aperãre buio batequẽja caroorijere.
Ca-ĩi wada pairã baiqueticõaña tunu.
9 Ĩitoqueticõaña.
Cristore mʉja ca-apiʉjaparo jʉgoye to bairona caroorije cá-áti pairã mʉja ca-anibajupa.
Ti wamerire mʉja cá-átibatajere ca-majirioyupi Dio yucʉra,
“Tiere caroorije jã áti janagarã,”
cʉ̃ mʉja ca-ĩiro maca.
10 To bairi ape wame caroa wame macare cá-áti aniparã mʉja ãa.
Ti wame mʉja cá-áti anipere ca-jooyupi Cristo.
To bairi mʉja joomi cʉ̃re mʉja ca-majinemopere,
cʉ̃re bairo caroaro ca-ãna mʉja ca-aniparore bairo.
11 To bairo ca-ãnare jicãrore bairona na tʉjʉmi Dio Cristore ca-nʉcʉbʉgorãre.
To bairi,
“Griego maja,
aperã judío maja yere cá-átiquẽna na netoro ca-ñuurã ãma judío maja maca,”
ĩi tʉjʉquẽemi Dio.
Apero macana,
jõ boeri macana,
paabojari maja,
na majuuna ca-paariquecʉna quena jicãrore bairona na tʉjʉmi Dio,
Cristo mena macana na ca-ãmata.
12-13 To bairi cʉ̃ yarã,
cʉ̃ ca-mairã,
ca-ñuurã ca-aniparãre mʉja ca-cũuñupi Dio mʉja quenare.
To bairo cʉ̃ ca-cũricarã aniri aperãre na mai tʉjʉya.
Caroaro na átinemoña.
“Aperã netoro ca-ñuʉ yʉ ãa,”
ĩi tʉgooña ocabʉti netoquẽja.
Aperã rooro mʉjaare na cá-átie to ca-anibato quena na ame ĩi tutiquẽja.
Caroorije mʉjaare na cá-átiere na majirioya.
Cristo caroorije mʉja cá-átajere mʉjaare cʉ̃ ca-majiriobojaricarore bairona na majirioya.
14 Ape wame netoro ca-ñuu netori wame ãa ame mairique.
Mʉjaa ame mairã ape wame yʉ ca-rotirijere caroa wame nipetiri wame mʉja átigarã.
15 Mʉjaare ca-cũuñupi Dio cʉ̃ yarã,
cʉ̃ ya poa macanare ca-yeri wariñuuparãre.
To bairo cʉ̃ ca-cũricarã aniri Diore wariñuuña mʉja yeri mena,
“Seeto ñuubʉja jãare mʉ cá-átibojarije,”
cʉ̃ ĩi tʉgooñari.
16 Cristo ye quetire mʉja yeripʉ tʉgooña api majiri apiʉjaya.
Ame ĩi buio majioña Dio yere mʉja ca-majiri wamere.
To bairo átiri Diore ĩi wariñuu bajaya,
mʉjaare cʉ̃ cá-átibojarije tʉgooñari.
17 To canacã wame mʉja ca-ame ĩi buiorije,
mʉja cá-átie nipetiro,
“Cristo yarã,
cʉ̃re cá-átibojarã aniri caroaro jã átigarã,”
ĩi tʉgooñaña,
mani Pacʉ Diore,
“Ca-ñuu majuʉ mʉ ãa,”
cʉ̃ ĩri yua.
Deberes sociales del cristiano
18 Cãromia mʉja manapʉare na áti nʉcʉbʉgoya.
To bairona mʉja cá-áto boomi mani Ʉpaʉ Cristo cʉ̃re ca-apiʉjarã mʉja cá-átipere.
19 Mʉjaa,
na manapʉa,
mʉja nʉmoare na maiña.
Na ĩi punijiniquẽja.
20 Mʉjaa,
caniñaa,
cawamarã,
mʉja pacʉare nipetiro na ca-ĩri wamere na apiʉjaya,
to bairo yʉ cá-áto yʉ tʉjʉ wariñuugʉmi yʉ Ʉpaʉ Cristo ĩirã.
21 Mʉjaa,
na pacʉa maca mʉja punaare cariape na ĩri na cʉgoya.
Seeto tuti netoquẽnana na buioya,
mʉjaare na ca-punijini tʉgooñarique paiquetiparore bairo ĩirã.
22-24 Paabojari maja,
mʉja ʉparãre nipetiro mʉja na cá-áti rotirijere na apiʉjaya.
Mʉjaare na ca-tʉjʉro caroaro mʉja ca-paarore bairona na ca-tʉjʉquẽto quena caroaro na paabojari na nʉcʉbʉgoya,
“Yʉ Ʉpaʉ majuu Cristo tʉjʉʉmi,”
ĩi tʉgooñari.
Cristo maca mani Ʉpaʉ majuu ãmi.
Cʉ̃ maca caroa majuu ãnajere mʉja joogʉmi to bairo caroaro mʉja cá-átie wapa.
Ti wamere tʉgooña wariñuurique mena yeri ocabʉti nʉcʉbʉgori na paabojaya.
“Yʉ Ʉpaʉ Cristopʉre cʉ̃ áti nʉcʉbʉgoʉ yʉ áa,”
ĩi tʉgooñari na paabojaya.
“Camajocʉ yʉ ʉpaʉ ati yepa macacʉ tutuaro yʉ ca-paarijere yʉre cʉ̃ tʉjʉ wariñuato,”
ĩi tʉgooñaquẽja.
25 Caroorije cá-ána macare na popiyeyegʉmi Dio caroorije na cá-átaje cõona,
camaja na cá-átajere cariape tʉjʉ cõoñari.