4
Mʉjaa,
paabojari majare ca-cʉgorã caroaro na rotiya.
Cariape na jooya.
Caroaro na ája,
oco bairo ĩi tʉgooñari:
“Ʉmʉrecoopʉ ca-ʉpaʉcʉcʉ yʉ ãa yʉ quena.
To bairi caroaro Dio yʉre cʉ̃ cá-áto maca caroaro yʉ átigʉ yʉ paabojari majare,”
ĩi tʉgooñaña.
2 Caroaro tʉgooña majiri Diore jenicõa aninucuña.
“Caroaro yʉ átibojami Dio,”
ĩi tʉgooñari cʉ̃ jeniya.
3-4 Diore mʉja ca-jeniro to canacã ni jã quenare oco bairo Diore jã ĩi jenibojanucuña:
“Dio,
mʉ ca-tutuarije mena na átinemoña,
Cristo ye quetire aperãre na ca-buio majiparore bairo.
Pablore cʉ̃ átinemoña aperãre api majirica wamere na cʉ̃ ca-buio majiparore bairo,”
Diore jã ĩi jenibojaya.
Api majirica wame jeto na yʉ ca-buiope ãa.
Yucʉacã presopʉ yʉ ãa atie quetire ca-jʉgoyepʉ camaja na ca-majiquẽtiere yʉ ca-buiorique wapa.
5 Cristore ca-apiʉjaquẽnare caroaro tʉgooña majirique mena na ája.
Cristo ye quetire na mʉja ca-ĩi buiori paʉ to canacã ni caroaro na ĩi buioya.
6 Caroaro tʉgooñari nare ĩi buioya.
Caroaro wariñuurique mena na wadapeniña api tʉjoorica wame jeto.
Mʉjaare na ca-jeniñari paʉ caroaro na mʉja ca-boca ĩi pa wamere majiña.
Saludos finales
7 Yʉ ca-bairije nipetiro Tíquico mʉja ĩi buiogʉmi.
Mani yaʉ ãmi,
mani ca-maii ãmi Tíquico.
Jã mena Cristo yere caroaro ca-buionemoʉ ãmi.
8 To bairi mʉja tʉpʉ cʉ̃ yʉ joo,
jã ca-bairije na ĩi buiori na yeri ocabʉtioya ĩi.
9 Cʉ̃ mena apeĩ cʉ̃ yʉ joo Onésimore.
Cʉ̃ quena Cristore ca-apiʉjaʉ ãmi.
Mani yaʉ,
mani ca-maii ãmi.
Mʉja mena macacʉ ãmi.
Ato ca-bairijere nipetiro mʉja ĩi queti buiogarãma na pʉgarã.
10 Ñuu rotimi Aristarco,
yʉ mena presopʉ ca-ãcʉ̃.
Marco quena,
Bernabé bai ñuu rotimi.
Marco mʉja tʉpʉ cʉ̃ ca-ejaata caroaro cʉ̃ boca tʉjʉya.
Meere to bairo cʉ̃re mʉja ca-boca tʉjʉpere mʉjaare yʉ ca-queti joowʉ.
11 Jesú Justo,
cʉ̃ quena ñuu rotimi.
Na jeto ãma na itiarãna judío maja yʉ mena Dio ye macajere cá-ána.
To bairona caroaro na cá-áto yʉ yeri tʉgooña ocabʉtinucu.
12 Épafra,
mʉja yaʉ,
cʉ̃ quena ñuu rotimi.
Cʉ̃ quena Cristo ye macajere cá-ácʉ ãmi.
To canacã rʉmʉ tutuaro Diore mʉja jenibojanucumi,
Dio cʉ̃ ca-boori wame mʉja cá-áti peti maji ocabʉti wariñuuparore bairo.
13 Yʉ maji to cõo Diore mʉjaare cʉ̃ ca-jeniboja nucurijere.
Aperã quenare Laodisea na ca-ĩri maca,
Hierápolis na ca-ĩri maca,
ti macari macanare Cristore ca-apiʉjarã na quenare jenibojanucumi Épafra Diore.
14 Lucas,
mani ca-maii,
ʉcoyeri majocʉ mʉja ñuu rotimi.
Demas quena ñuu rotimi.
15 Laodisea macana Cristore ca-apiʉjarã na ñuato.
Ninfa quena cõ ñuato.
Jesucristore ca-apiʉjarã cõ ya wiipʉ ca-neñaponucurã na quena na ñuato.
16 Ati pũuro mʉjaare yʉ ca-queti joori pũuro tʉjʉ bue yaparorã Laodisea macana quenare na bue rotiya.
Cristore ca-apiʉjarã na ca-neñaporopʉ na bue rotiya.
Mʉja quena Laodisea macanare na yʉ ca-queti joorica pũurore neri tiere bueya mʉjaa.
17 Oco bairo cʉ̃ ĩiña Arquipore:
“Mani Ʉpaʉ Cristo mʉre cʉ̃ cá-áti rotirica wamere caroaro áti peocõaña.”
18 Yʉ Pablo atie ñuu rotirique yʉ majuuna yʉ uca.
Diore yʉ jenibojaya atopʉ presopʉ yʉ ca-aniere.
Caroa yeri wariñuuriquere cʉ̃ joato Dio mʉjaare.
To cõona ãa.