2
To bairona mʉjaare,
Laodisea macana quenare,
yʉre ca-tʉjʉñaquetana nipetirã mʉja ca-baipere seeto yʉ tʉgooña,
Diore mʉja jenibojaʉ.
2 Oco bairo Diore jã jenibojanucu,
mʉjaare tʉgooñari:
“Dio,
yeri tʉgooña ocabʉtiriquere na jooya.
Caroaro na ame maiato.
Caroaro mʉ yere,
mʉ Macʉ Cristo cʉ̃ ca-anie quenare na ca-tʉgooña maji peticõapere na mʉ joowa.
To bairo na mʉ ca-jooro caroaro mʉ Macʉre cʉ̃ majigarãma,”
Diore jã ĩi jeninucu.
Yucʉra Cristo yere mani majiomi Dio mani jʉgoye macanare nare cʉ̃ ca-majioqueta wamere.
3 Cristore majirã,
mani maji nipetirije Dio manire cʉ̃ ca-majiogari wamere.
4 Atie mʉjaare yʉ ĩi buio,
aperã caroare ca-ĩirãre bairona ca-ĩitorã macare na apiʉjaqueticõato ĩi.
5 Mʉja tʉpʉ aniquetibacʉ quena seeto majuu mʉjaare yʉ tʉgooñanucu.
Yʉ wariñuu caroaro mʉja cá-áti aniere,
Cristore mʉja ca-apiʉjarije queti apiri yua.
6 To bairi,
“Jesucristo,
yʉ Ʉpaʉ mʉ anigʉ,”
cʉ̃ ca-ĩricarã aniri cʉ̃ ca-boorije áti anicõa aninucuña.
7 Cʉ̃re ca-majirã aniri caroaro cʉ̃ majinemoña.
Cristo ye queti ca-jocaquẽtiere aperã nemoona mʉjaare na ca-majio jʉgoricarore bairona apiʉjacõa aninucuña,
wariñuurique mena Diore,
“Caroaro jãare mʉ átibojanucu,”
cʉ̃ ĩri.
La nueva vida en Cristo
8 Aperã,
“Ca-majirã jã ãa,
to bairi jã ya wame macare apiya,”
mʉjaare na ca-ĩitorijere apiʉjaqueticõaña.
Caroorije jetore buioma naa.
Camaja na majuuna na ca-tʉgooñari wame ãa na cá-áti rotiri wame.
Cristo ye me ãa tiea.
9 Cristo jeto ãmi Dio cʉ̃ ca-aniere ca-cʉgoʉ,
cʉ̃ ca-tutuarijere ca-cʉgoʉ,
cʉ̃ ca-majirije nipetirijere ca-cʉgo majuucõaʉ ãmi Cristo.
Dio cʉ̃ ca-aniere ca-cʉgoʉ ãmi Cristo mani camajare bairona ca-rupaʉcʉcʉ.
10 Nipetirã ca-rotirã netoro ca-rotii ãmi Cristo.
To bairo ca-ãcʉ̃ cʉ̃ ca-ano maca mʉja quena ñe unie mʉjaare rʉjaquẽe.
Caroaro ca-ani yeri ocabʉtiparã mʉja ãa,
cʉ̃ yarã aniri.
11 Judío maja,
“Circuncisión cá-ána aniri Dio yarã jã ãa,”
ĩima.
Mʉjaa ti wame na cá-átinucurore bairo cá-átiquẽna mʉja ca-anibato quena Dio yarã,
caroarã ca-aniparãre ca-cũuñupi Dio mʉjaare.
Jesucristo maca caroorije mʉja cá-áti aniere ca-reeyupi,
mʉjaare bai yajibojari.
12 “Caroorije yʉ cá-átibataje to cõona yʉ áti janagʉ,”
ĩri mʉja ca-bautisa rotiyupa.
To bairi Diore apiʉjari ca-ñuurã,
ca-yeri wajoarã mʉja ani maji,
tʉgooña ocabʉtirique mʉjaare cʉ̃ ca-joorije jʉgori.
Cristo ca-bai yajiricʉ cʉ̃ ca-anibato quena cʉ̃ ca-tunu catíoyupi Dio.
“To bairo cá-áti tutuaʉ aniri yʉ quenare yʉ wajoa majiimi Dio,
ca-ñuʉ yʉ ca-aniparore bairo,”
mʉja ĩi maji.
13 Ca-jʉgoye caroaro mʉja ca-ani majiquetibajupa.
Judío maja na cá-áti rotirije quenare cá-átiquẽna mʉja ca-anibajupa.
To bairo ca-ãna mʉja ca-anibato quena Cristo mʉja ca-netooñupi mʉja quenare.
Cʉ̃ mena,
cʉ̃ yarã mʉja ca-ani wariñuuparore bairo ĩi mʉjaare cá-átibojayupi Cristo.
Caroaro catíriquere mʉja ca-jooyupi Cristo mʉja caroorijere majirioʉ.
14 Dio cʉ̃ ca-rotirijere mani cá-átiquẽtie wapa mani ca-popiye tamuope ca-aniboyupa.
To bairo to ca-anibato quena mani caroorije ca-majirioyupi Dio,
cʉ̃ Macʉ yucʉ tẽorica pãipʉ manire cʉ̃ ca-bai yaji wapayebojarique jʉgori.
15 To bairo mani átibojari Sataná cʉ̃ yarã menare wãtiare na ca-netocõañupi Dio,
camaja na ca-tʉjʉ majiro.
To bairi mani jʉgo aá majiquẽema wãtia.
Mani áti neto majiquẽema.
Busquen las cosas que son del cielo
16 Aperã oco bairo mʉja ĩirãma:
“Jã judío maja jã ca-ʉga rotiquẽtie,
jã ca-eti rotiquẽtiere jã api nʉcʉbʉgoya.
Jã boje rʉmʉri macaje áti nʉcʉbʉgoya.
Mʉja cá-átiquẽpata mʉja ñuuquẽe.”
To bairo mʉja na ca-ĩrijere apiʉjaqueticõaña.
17 Nemoopʉre tiere ca-rotiyupi Dio judío majare,
yʉ Macʉ Cristo cʉ̃ ca-baipere na majiato ĩi.
Meere Cristo manire cʉ̃ ca-bai yajibojaro bero judío maja na cá-átibatajere ca-tʉgooñaquetiparã mani ãa yua.
18 Jocarã ĩima,
“Ca-bopacoorãre bairo jã bainucu,
caroaro Dio jãare cʉ̃ tʉgooña wariñuato ĩirã.
Dio tʉ macanare ángel maja quenare na jeni nʉcʉbʉgoya,
Dio tʉpʉ aágarã,”
ĩitoma.
“Apeye uniere jã iñoonucumi Dio quẽgueriquere bairije.
To bairi Dio yere caroaro ca-majirã jã ãa,
Dio cʉ̃ ca-iñooricarã aniri,”
ĩima.
To bairo mʉjaare ca-ĩirã Dio mena mʉja ca-ani wariñuubopere ca-ĩi matarã ãma.
To bairi na apiʉjaqueticõaña.
19 Na maca mani Ʉpaʉ Jesucristore apiʉjaquẽnana to bairona jocarã ĩima.
Mani macare ca-rotii ãmi Cristo,
cʉ̃re ca-apiʉjarãre jicãʉ punaa na jʉgocʉre bairo manire ca-jʉgo ãcʉ̃.
To bairo manire ca-jʉgo ãcʉ̃ aniri mani átinemonucumi.
To bairi Dio cʉ̃ ca-boorijere mani cá-áti majipere mani joomi.
To bairo cʉ̃ ca-jooro to canacã rʉmʉ netobʉjaro mani ame mai maji,
mani átinemo nutua maji.
20 Cristo manire cʉ̃ ca-bai yajibojaro maca camaja na majuuna na ca-ĩi tʉgooñari wamere,
mʉjaare na cá-áti rotirijere ca-tʉgooñaqueti majuucõape ãa.
To bairi ati yepa macana Cristore ca-apiʉjaquẽna na ca-tʉgooñarore bairo tʉgooñaquẽja.
21 “Ati wame pañaqueticõaña,
ape wame ʉgaqueticõaña,”
ĩima Cristore ca-apiʉjaquẽna maca.
“To bairo mʉja ca-bairo caroaro mʉja tʉjʉ wariñuugʉmi Dio,”
ĩi tʉgooñama.
To bairo ca-ĩi tʉgooñarãre bairo ĩi tʉgooñaqueticõaña mʉja maca.
22 Camaja na majuuna tʉgooñari to bairona rotima.
To bairo na ca-ĩrije Dio tʉpʉ mani yeri ca-anicõa aninucupe me ãa.
Ati yepa macaje ca-petirije unie maca ãa na ca-ĩri wame.
23 “Jã ca-ĩri wame áti nʉcʉbʉgoya,”
ĩima.
“Ca-bopacoorãre bairo baiya.
Mʉja rupaʉrire popiyeyeya,
Dio caroaro jãare cʉ̃ tʉgooña tʉjʉato ĩirã,”
ĩima.
Na ca-ĩri wame,
“Ñuubʉjaro,
ca-majirã ãnama,”
ĩi tʉgooñarique ãno bairo pʉa.
To bairo na ca-ĩri wame to ca-anibato quena caroorijere átiga jana majiña mano paro.