4 Mʉjaa ca-pacʉa mʉja punaare tutibʉjari na rotiri na ca-punijiniro na ĩiquẽja.

Caroaro maca na buioya,

mʉjaare na ca-bai netoo nʉcaquetiparore bairo ĩirã.

Mani Ʉpaʉ Jesucristo cʉ̃ ca-boorore bairo na rotiya caroaro na ca-tʉgooña nʉcʉbʉgoparore bairo ĩirã.

5 Mʉjaa,

aperãre na paabojari maja mʉja ʉparãre caroaro na api nʉcʉbʉgori na ca-rotirijere ája.

Oco bairo tʉgooñaña mʉja yeripʉre:

“Ani yʉre ca-rotii camajocʉ cʉ̃ ca-anibato quena Cristo yere yʉ ca-tʉgooñarore bairona cʉ̃ tʉgooñari caroaro cʉ̃ yʉ paabojagʉ.”

6-7 “Yʉ ʉpaʉ cʉ̃ ca-tʉjʉro tutuaro yʉ paagʉ,

‘Caroaro ca-paabojaʉ ãcʉmi,’

yʉre cʉ̃ ĩi tʉjʉato ĩi,”

ĩi tʉgooñaqueticõaña mʉjaa.

Mʉjaare ca-rotirã na ca-tʉjʉquetibato quenare to bairona caroaro paaya.

Oco bairo maca ĩi tʉgooñaña:

“Yʉre ca-roti majuʉ ãmi Cristo maca.

To bairi Dio cʉ̃ ca-boorore bairo yʉ paabojagʉ yʉ ʉpaʉre,”

mʉja yeripʉ ĩi tʉgooñari wariñuurique mena na paabojaya.

“Camajocʉ yʉre ca-rotii tutuaro yʉ ca-paarijere yʉre cʉ̃ tʉjʉ wariñuato,”

ĩi tʉgooñaquẽja.

8 Mani Ʉpaʉ Dio caroaro mani cá-áto caroare mani joogʉmi.

Aperãre ca-paabojarãre caroare na joogʉmi Dio caroaro na cá-áto.

Aperã quenare na majuuna ca-paarique cʉnare to bairona caroare na joogʉmi Dio caroaro na cá-áto.

To bairi ti wame tʉgooña majiri caroaro ája,

“Dio maca yʉre ca-rotii ãmi,”

ĩi tʉgooñari.

9 Mʉjaa ca-paabojari maja cʉna to bairona caroaro na ája mʉja quena.

“Mʉjaare yʉ quẽgʉ caroaro mʉja ca-paaquẽpata,”

na ĩi tutiqueticõaña.

Mʉja quena nare bairona ʉmʉrecóopʉ ca-ʉpaʉcʉna mʉja ãa.

Cʉ̃ maca jicãro cõona mani tʉjʉmi Dio paari majare mani nipetirã ati yepa ca-ãnare.

10 Yʉ yarã,

oco bairo mʉjaare yʉ ca-ĩi queti buio tʉjari wame oco bairo mʉjaare yʉ ĩi:

Mani Ʉpaʉ Jesucristo cʉ̃ ca-tutuarije jʉgori tʉgooña ocabʉtiya.

Cʉ̃ yarã mʉja ca-ano maca mʉja átinemogʉmi.

To bairi cʉ̃ ca-tutuarije mena tʉgooña ocabʉtiya.

11 Sataná mani ĩitori mani ĩi rooye tuugami,

caroorije maca na áparo ĩi,

Dio ye macare na apiqueticõato ĩi.

To bairi Dio cʉ̃ ca-tutuarije mena tʉgooña ocabʉtiya.

Oco bairo ãa:

Uwamarã come ajero jañama,

nare ca-quẽgarã nare ca-jĩagaro beju to puaqueticõato ĩirã.

To bairona,

Sataná yʉre cʉ̃ rooye tuuqueticõato ĩirã,

Dio cʉ̃ ca-tutuarije mena,

mʉja cʉ̃ cá-átinemorije mena tʉgooña ocabʉtiya mʉjaa.

12 Mani maca uwamarã camaja caroorã mena na ca-ame átore bairo mani átiquẽe.

Mani macare ca-rooye tuugarã ãma Sataná yarã,

caroorije na áparo ca-ĩirã.

Wãtia maca ca-bauquẽna caroorije ʉparã,

ca-ñuuquẽtiere ca-rotirã ãma manire ca-rooye tuugarã.

Ati yepa bui ca-ãna ãma,

caroorije áti roti teñarã.

Mani camaja netoro ca-tutuarã ãma.

13 To bairi Dio cʉ̃ ca-tutuarije nipetiri wame mena,

yʉre cʉ̃ átinemocõato ĩi tʉgooña ocabʉtiri caroorije Sataná mʉjaare cʉ̃ ca-ĩi wadajãri rʉmʉ uno mʉja nʉca majigarã.

To bairona nipetiri wame caroaro ca-yeri tʉgooña quenooye weoricarã aniri Satanáre cʉ̃ mʉja netoo ocabʉtigarã.

14 Uwamaʉ cʉ̃ wapana cʉ̃re na ca-quẽgari paʉ netoo majimi come ajero jañari.

Ti ajero jiami ca-rupa wẽe mena.

To bairo átiri cʉ̃ cotiapʉ come ajero wamoa ajero unie jañami,

cʉ̃ wapana cʉ̃re na ca-jarero to puaqueticõato ĩi.

To bairona mʉja quena Sataná yarã wãtia na ca-ĩitorijere mʉja netoo majigarã,

Dio ye queti macare cariape macajere api majiri.

Caroorije mʉjaare cʉ̃ ca-wadajãro mʉja netoogarã,

Dio cʉ̃ ca-boorore bairo caroare ca-tʉgooñarã aniri.

15 To bairo quena uwamaʉ aágʉ quenoo weori rʉpo jutii cʉtami.

To bairona mʉja quena caroa quetire Dio ye quetire buiora aágarã caroaro ca-tʉgooña jʉgoyeyerã ãña.

Caroa ãnajere camajare Dio cʉ̃ ca-joogarijere buiora aágarã caroaro tʉgooña quenoo jʉgoyeyeya mʉjaa.

16 Ape wame quena neemi uwamaʉ pairi joroa come joroare.

Temurica yucʉre ca-ʉ̃ri yucʉre ca-punirije cʉti yucʉ quenare cʉ̃re na ca-temʉro ti joroa mena boca pa camotami.

To bairona mʉja quena Sataná mʉjaare cʉ̃ ca-rooye tuugarijere netoogarã Cristo mʉjaare cʉ̃ cá-átinemorije mena tʉgooña ocabʉtiya.

17 Cʉ̃ rʉpoa quenare pejami uwamaʉ come coro cʉ̃ rʉpoa na ca-paro ca-puaquetiparore bairo ĩi.

To bairona Sataná mʉja ca-tʉgooñarijere cʉ̃ ca-rooye tuuquetiparore bairo oco bairo tʉgooñaña:

“Caroorije yʉ cá-átaje wapa yʉ ca-popiye tamuobopere yʉ ca-netoowĩ Dio,”

ĩi tʉgooñaña.

Ape wame quena neemi uwamaʉ jarerica pãire cʉ̃ wapanare na quẽ netoo nʉcagʉ.

To bairona Satanáre netoo nʉcagarã caroaro tʉgooñaña Dio Wadariquere,

cʉ̃ Espíritu Santo manire cʉ̃ ca-cũriquere.

18 To canacã wame ána Diore jeni nʉcʉbʉgori,

“Yʉ átinemoña,”

cʉ̃ ĩiña.

Dio Espíritu Santo mʉjaare cʉ̃ ca-jeni rotirore bairona Diore cʉ̃ jeniya.

To bairi caroaro tʉgooña maja catíri Dio yarã nipetirãre na jenibojaya Diore,

“Yʉ apiquẽcʉmi Dio,”

ĩi tʉgooñaquẽnana.

19-20 Yʉ quenare Diore yʉ ĩi jenibojaya cʉ̃ ye quetire camajare yʉ ca-buiopere.

Cʉ̃ ye quetire yʉ ca-buio teñarije wapa atopʉ presopʉ yʉ ca-jõowã.

To bairo presopʉ tamuobacʉ quena uwiquẽcʉna cʉ̃ ye quetire yʉ ca-buioparore bairo Diore yʉ ĩi jenibojaya.

To bairo Diore yʉre ĩi jenibojari oco bairo cʉ̃ ĩiña:

“Dio,

Pablo mʉ ye quetire cʉ̃ ca-buiori paʉ cʉ̃ átinemoña.

Ca-jʉgoyepʉna tie queti judío maja ca-aniquẽnare nare mʉ ca-netoo catíopere camajare mʉ ca-majioquẽjupa.

To bairi tie quetire Pablo nare cʉ̃ ca-buiopa wamere cʉ̃ ĩi majioña.

Cʉ̃ uwiqueticõato ĩi cʉ̃ átinemoña mʉ ye quetire nare cʉ̃ ca-buioro,”

Diore cʉ̃ ĩiña,

yʉre ĩi jenibojarã.

21 Yʉ ye quetire,

yʉ ca-bairije nipetiro mʉja ĩi buiogʉmi Tíquico ca-wamecʉcʉ.

Mani yaʉ,

mani ca-maii ãmi.

Caroaro yʉ átinemonucumi,

mani Ʉpaʉ Jesucristo yere buio teñanemoʉ.

22 To bairona jã ca-bairije Tíquico nare cʉ̃ buioato ĩi mʉja tʉpʉ cʉ̃ yʉ joo,

caroaro na tʉgooñaato na quena,

mʉjaare ĩi.

23 Mani Pacʉ Dio,

mani Ʉpaʉ Jesucristo quena caroaro apiʉja nʉcʉbʉgoriquere mʉjaare cʉ̃ joato cʉ̃ yarã,

cʉ̃ yere ca-tʉgooñarãre.

Caroa ca-ani wariñuurã,

ca-ame mairã mʉja ca-aniparore bairo mʉjaare cʉ̃ áparo Dio.

24 Caroare mʉjaare cʉ̃ joato,

mani Ʉpaʉ Jesucristore tʉgooña ajuquẽnana cʉ̃re ca-mairã mʉja ca-ano maca.

To cõona ãa.