El hablar en lenguas
14
To bairi caroaro ame mainucucõaña.
Dio Espíritu Santo mʉjaare cʉ̃ cá-áti majiorije quenare booya.
Dio ye quetire Espíritu Santo mʉjaare cʉ̃ ca-buio majiorije macare seeto majuu booya.
2 Ni ucʉ̃ aperã ye mena ca-jʉgoye wada majiquetibacʉ quena cʉ̃ ca-wadaro Dio jeto cʉ̃ ca-api majiro wadaʉmi.
Camaja maca cʉ̃ ca-wadarijere cʉ̃ api majiquẽnama.
Cʉ̃ yeripʉ aperã na ca-api majiquẽtiere ĩimi,
na ca-api majiqueti wamere ĩibacʉ.
3 Apeĩ Dio Espíritu Santo jʉgori Dio ye quetire ca-buioʉ ucʉ̃ maca camaja na ca-api majiparore bairo buioʉmi.
Aperã cʉ̃ ca-ĩi buiorijere apirã netobʉjaro Diore tʉgooña nʉcʉbʉgorãma.
Caroaro tʉgooña ocabʉti nutuanama.
4 Aperã ye mena ca-jʉgoye wada majiquetibacʉ quena ca-ĩi wadaʉ ucʉ̃ cʉ̃ jetore Diore netoro cʉ̃ ca-tʉgooña ocabʉtiro ácʉmi.
Espíritu Santo jʉgori Dio ye quetire ca-ĩi buioʉ ucʉ̃ maca Jesúre ca-nʉcʉbʉgori poa macana nipetirã netobʉjaro Diore na tʉgooña nʉcʉbʉgoato ĩi buioʉmi.
5 Mʉja nipetirã aperã yere majiquetibana quena mʉja ca-wada majiro yʉ boobapa.
Tie netoro Dio ye quetire mʉja ca-buio majiro yʉ boobapa.
Atie maca tie netobʉjaro ca-wapacʉtie ãa.
Aperã ye mena ca-wadaʉ cʉ̃ ca-wadarijere apeĩ cʉ̃ ca-buio netoata ñuubʉjaro.
To bairo ca-buio netoʉ ucʉ̃ cʉ̃ ca-ãmata nipetirã Jesucristore ca-api nʉcʉbʉgori poa macana netobʉjaro na ca-apiʉja nʉcʉbʉgoro ácʉmi.
6 Oco bairo ãa:
Mʉja tʉpʉ aácʉ aperã ye mena mʉjaare yʉ ca-ĩi buioata mʉja átinemoʉ mee yʉ átiboʉ.
Dio ye quetire yʉre cʉ̃ ca-buio rotiriquere buioʉ maca mʉjaare átinemoʉ yʉ átiboʉ.
Cʉ̃ yere mʉjaare buionemoʉ caroaro mʉja ca-majiro yʉ átinemoboʉ.
7 Jicã wame bajarica wame cõorique yʉ buiogʉ.
Wewo ca-puti jʉgoʉ wame manona cʉ̃ ca-putiro puti ʉja majiquẽnama.
Caroaro cʉ̃ ca-puti wameyero nipetiro caroaro puti ʉja majirãma.
Ca-bʉga pʉtẽ bajaʉ cawatoana cʉ̃ ca-bʉga pʉtẽ bajaata,
“Ti wamere bʉga pʉtẽ bajami,”
ĩi majiña maa.
8 Uwamarã na wapana mena amequẽrã aána na ʉpaʉ cʉ̃ ca-puti apio majiorore ricati cʉ̃ ca-putiata amequẽrã aá majiquẽnama.
Cariape cʉ̃ ca-puti apioro api majirã na wapana mena amequẽrã aánama.
9 Mani quena to bairona mani bai.
Mani ca-wadarije cariape ca-api majiri wame mani ca-ĩi wadaquẽto dope bairo ĩimi ĩi majiquẽnama aperã.
Jocarã majuu mani wada macacõaborã.
10 Ati yepapʉre capee majuu ricati wadarica wameri anicõa.
Camaja ca-ano cõo na ca-wadarijere api majirãma.
11 Jicãʉ aperã ye yʉ ca-apiquẽtie mena cʉ̃ ca-wadaro apii,
“Apero macacʉ ãmi,”
yʉ ĩi tʉjʉboʉ.
Yʉ quena cʉ̃ ca-apiquẽtie mena yʉ ca-wadaata,
“Apero macacʉ ãmi,”
yʉre ĩi tʉjʉboʉmi.
12 To bairona bai mʉja quenare.
Mʉja ca-api majiquetaje macare seeto majuu mʉja wadaganucu.
Apeye quena Espíritu Santo mʉjaare cʉ̃ cá-áti majioro seeto mʉja boonucu.
Tiere boorã Jesucristore ca-apiʉjari poa macanare mʉja cá-átinemope macare seeto boo netoña.
13 To bairi noo aperã yere majiquetibacʉ quena ca-wadaʉ ucʉ̃ Diore cʉ̃ jeniato,
“Oco bairo ĩigaro ĩi yʉ ca-wadarije,”
ĩi buio neto majigʉ.
14 Ca-api majiña mani wame mena Diore yʉ jeni nʉcʉbʉgoboʉ.
To bairo ácʉ yʉ yeripʉ Diore cariape yʉ ca-jeni nʉcʉbʉgorije to ca-anibato quena yʉ ca-tʉgooña majirije maca maniboro.
15 To bairi oco bairo cá-átipaʉ yʉ ãa:
Diore jeni nʉcʉbʉgori yʉ yeri mena,
yʉ ca-tʉgooña majirije mena quena cʉ̃re ca-jeni nʉcʉbʉgopaʉ yʉ ãa,
aperã yʉre na api majiato ĩi.
Diore ĩi wariñuu bajaʉ yʉ yeri mena,
yʉ ca-tʉgooña majirije mena quena ca-ĩi wariñuu bajapaʉ yʉ ãa,
aperã yʉre na ca-api majiparore bairo.
16 To bairi mʉja yeri mena jeto Diore mʉja ca-ĩi wariñuuro aperã,
“Cariape mʉja ĩi,
to bairona ãa,”
ĩinemo majiquẽnama,
mʉja ca-ĩrijere api majiquetibana.
17 To bairi mʉja yeri mena jeto na ca-apiquẽtie mena Diore caroaro mʉja ca-ĩi wariñuubato quena aperã netobʉjaro Diore na cá-áti nʉcʉbʉgoro mʉja átinemoquetiborã.
18 Mʉja nipetirã netoro aperã ye mena yʉ wadanucu.
Ca-jʉgoyepʉre yʉ ca-wada majiquetaje to ca-anibato quena Espíritu Santo yʉre cʉ̃ ca-jʉgo wada majioro to bairo yʉ wadanucu.
To bairi Diore cʉ̃ yʉ ĩi wariñuu nʉcʉbʉgo.
19 To bairo aperã ye mena wadanucubacʉ quena Jesucristore ca-api nʉcʉbʉgorã na ca-neñaporopʉ na apiato ĩi petoacãna na ca-api majirije macare yʉ ca-ĩi wadaro ñuu neto.
Capee majuu diez mil wameri mena aperã yere na ca-api majiquẽtie macare yʉ ca-ĩi wadaro wapa maniboro.
20 Yʉ yarã,
cawimarãre bairo tʉgooñaqueticõaña.
Cabʉcʉrãre bairo caroaro tʉgooña majirique cʉja.
To bairo cabʉcʉrãre bairo caroaro ca-tʉgooña majirã anibana quena caroorije átaje macare tʉgooña majiquẽja.
Caroorije macare cawimarã na ca-tʉgooña maji jeyaquẽtore bairona mʉja quena nare bairona baiya.
21 Dio ye quetire tirʉmʉpʉ macana na ca-ucarique oco bairo ĩrica wame ãa:
Ati majare apero macana ricati wadarãre na yʉ buio joo rotigʉ.
To bairi apero macana ye mena yʉ ye quetire na ca-buiorije to ca-anibato quena yʉre apiʉjaquetigarãma ĩmi Dio,
ĩi ucarica wame ãa.a
22 To bairi Jesucristore ca-apiʉjaquẽna aperã ye mena aperã Dio ye quetire na ca-ĩi wadaro apiʉjaquetiri ca-bui pacoorã anicõagarãma.
Aperã Dio ye queti Espíritu Santo jʉgori na ca-ĩi buioro maca Jesucristore ca-apiʉjarã macare na ĩi buio rotiimi Dio.
Cʉ̃re ca-apiʉjaquẽna macare na ĩi buio rotiquẽcʉmi.
23 Mʉja nipetirã Jesucristore ca-api nʉcʉbʉgorã mʉja ca-neñaporopʉ,
aperã yere apiquetibana quena mʉja ca-wadaro aperã Jesúre ca-nʉcʉbʉgoquẽna maca tiere ca-majiquẽna jãa ejarã,
“Mecʉrã áama,”
ĩigarãma.
24 Mʉja ca-neñaporopʉ Dio ye quetire Espíritu Santo jʉgori mʉja ca-ĩi buioro maca Jesúre ca-nʉcʉbʉgoquẽcʉ,
tie quetire ca-majiquẽcʉ jãa ejaʉ,
“Caroorije cá-ácʉ yʉ ãa,”
ĩi majigʉmi.
Dio ye quetire na ca-ĩi buioro api majiri,
“Carooʉ yʉ ãa,”
ĩi tʉgooña majigʉmi.
25 Cʉ̃ yeripʉ rooro cʉ̃ ca-tʉgooñarije quenare tʉgooña majigʉmi.
To bairo tʉgooña majiri ejacumu,
Diore áti nʉcʉbʉgogʉmi.
“Cariapena Dio na mena ãmi,”
ĩi tʉgooña majigʉmi cʉ̃ quena yua.
Háganlo todo decentemente y con orden
26 To bairi oco bairo cá-átiparã mʉja ãa:
Neñaporã nipetiro mʉja cá-átie Jesucristore ca-apiʉjarã netobʉjaro cʉ̃re mʉja ca-tʉgooña nʉcʉbʉgoro ája.
Jicãarã Diore ĩi wariñuu bajagarãma.
Aperã Dio yere jicã wameri aperãre na buegarãma.
Aperã Dio nare cʉ̃ ca-buio rotiriquere buiogarãma.
Aperã ca-jʉgoye aperã yere majiquetibana quena Espíritu Santo na cʉ̃ ca-wada majioro wadagarãma.
Aperã na ca-wadarijere buio netogarãma.
To bairo neñaporã nipetirije mʉja cá-átie Jesúre netobʉjaro mʉja ca-tʉgooña nʉcʉbʉgoro ca-ame átinemoparã mʉja ãa.
27 Aperã yere wada majiquetibana quena Espíritu Santo na cʉ̃ ca-wada majioro ca-wadarã pʉgarã o itiarãna na wadaato.
Jicãʉ cʉ̃ ca-wadaro bero jeto na wadaato.
To bairo na ca-ĩi wadarijere apeĩ cʉ̃ buio netoato.
28 Na ca-wadarijere ca-buio neto majii cʉ̃ ca-manicõaata na ca-neñapori paʉ na wadaqueticõato.
Na yeri mena na majuuna Diore na jeni nʉcʉbʉgoato.
29 Dio cʉ̃ ca-buio rotirijere ca-buiorã quena pʉgarã o itiarãna na buioato.
Aperã na ca-buiorijere ca-apirã,
“¿Cariapena na ĩibautí?”
na ĩi tʉjʉ bejeato.
30 Jicãʉ cʉ̃ ca-buiotoye apeĩ ca-ruii macare jicã wame Dio cʉ̃ ca-buio rotiata to cõo ca-buio jʉgoricʉ maca cʉ̃ janaato.
31 Nipetirã Dio cʉ̃ ca-buio rotiro mʉja buio majirã.
Jicãʉ cʉ̃ ca-buioro bero jeto ca-buiope ãa.
To bairo mʉja ca-ĩi buioro nipetirã api majigarãma.
Nipetirã api majiri tʉgooña ocabʉtigarãma.
32 Dio cʉ̃ ca-buio rotirije ca-buiorã ricati wame ca-buioquetipe ãa aperãre.
33 Dio cariape jeto buiorique boʉmi.
Noo booro mani ca-buiorijere booquẽcʉmi.
Nipetirã Jesucristore ca-apiʉjarã na ca-neñaporopʉre to bairo jeto na cá-átipere boʉmi Dio.
34 Mʉja ca-neñapori paʉpʉre cãromia na wadaqueticõato.
Nare wada rotirique maa.
Ca-jʉgo buiorã macare caroaro na apiʉjaato.
Judío majare Dio cʉ̃ ca-ĩi cũurique oco bairo ãa:
“Cãromia Dio Wadariquere ca-jʉgo buiorã me anigarãma,”
ĩi ucarique ãa.
“Caʉmʉa maca ca-jʉgo buiorã anigarãma,”
ĩi ucarique ãa.
35 Cãromia ca-api puoquetajere majigarã na ye wiiripʉ ejarã na manapʉare na jeniñaato.
Cãromia Jesucristore ca-apiʉjarã na ca-neñaporopʉ na ca-wadaro tʉjooquẽe.
36 Dio ye queti nemoo ca-maji jʉgoricarã mʉja aniquẽe.
Mʉja jeto tiere ca-api nʉcʉbʉgorã mʉja aniquẽe.
To bairi,
“Mani majuuna noo mani ca-booro mani áti rotigarã,”
ĩi tʉgooñaquẽja mʉjaa.
37 Noo,
“Dio yere cʉ̃ ca-buio rotiricʉ yʉ ãa,
Espíritu Santo majiriquere yʉ joomi,”
ca-ĩirã una,
“Pablo manire uca joomi Dio cʉ̃ ca-rotirije jʉgori,”
na ĩi majiato.
38 Yʉ ca-uca joorije,
“Dio cʉ̃ ca-rotirije me ãa,”
ca-ĩirã macare apiʉjaqueticõaña.