El amor
13
Ape paʉri macana yere majiquetibana mani wada majiborã.
Dio tʉ macana ángel maja ye quenare mani wada majiborã.
Tiere wada majibana quena aperãre mani ca-maiquẽpata apeye unie come pãirore ca-pa patowãcoorãre bairona mani aniborã.
To bairi mani ca-buiorije wapa maniboro aperãre mani ca-maiquẽpata.
2 Espíritu Santo jʉgori Dio ye quetire aperãre buio majibana quena,
apeye ca-jʉgoye camajare Dio cʉ̃ ca-majioquetajere majibana quena,
nipetiri wame ca-majirã anibana quena aperãre na mani ca-maiquẽpata cawatoa macana majuu mani aniborã.
Dio cʉ̃ cá-áti majirijere tʉgooña nʉcʉbʉgo netorã,
ʉ̃taʉ apero maca aá roti majibana quena aperãre na maiquẽna ca-ñuuquẽna mani aniborã.
3 Mani ca-cʉgorije nipetiro ca-bopacoorãre ca-joonucurã anibana quena nare mani ca-maiquẽpata ca-wapa mana majuu mani aniborã.
Aperã maiquetibana quena nare mani ca-bai yajibojaata wapa maniboro.
4 Aperãre ca-mairã una oco bairo maca ãnama:
Aperã rooro nare na cá-átibato quena nʉcarãma.
Nipetirãre caroa jeto na átinucurãma.
Aperã na ca-bairijere tʉjʉ ʉgooquẽnama.
Aperãre,
“Mʉja netoro cá-áti majirã jã ãa,
mʉja netoro caroarã jã ãa,”
ĩi tʉgooñaquẽnama.
5 Aperãre nʉcʉbʉgorique mena jeto na átinucurãma.
Na majuuna na ca-baipe jetore tʉgooñaquẽnana aperã na ca-bairije quenare na átinemonucurãma.
Ca-punijinirique mana ãnama.
Aperã rooro nare na ca-ĩiro yoaro mee majiritinucurãma.
6 Aperã rooro na cá-áto tʉjʉrã wariñuuquẽnama.
Caroaro,
cariape jeto na cá-átinucurije macare tʉjʉ wariñuurãma.
7 Nipetirije aperã rooro na cá-átibato quena na mai janaquẽnama.
“Cabero na quena caroaro cá-ána anigarãma,”
ĩi tʉgooña ocabʉtirãma,
nare maibana.
“Caroorije cá-ána anibana quena cabero na quena caroaro cá-ána anigarãma,”
ĩi tʉgooña ocabʉtirãma.
Nare maibana yoaro na coterãma caroa macare na cá-átipere yuurã.
8 Mani ca-ame mairije ca-petiquẽtie ãa.
To bairona anicõa aninucugaro.
Apeye unie Dio manire cʉ̃ cá-áti majiorije maca ca-petirije unie ãa.
Caberopʉre Dio ye quetire Espíritu Santo cʉ̃ ca-buio rotibatajere buio roti janagʉmi.
Camaja nipetirã cʉ̃ ye quetire maji peticoagarãma.
Aperã aperã yere wada majiquetibana quena na ca-wada majiro na áti janagʉmi Espíritu Santo.
Aperã netoro na ca-majibataje quena peticoagaro.
Jicãro cõo majigarãma.
9 Yucʉacãre mani maji peoquẽe.
Dio ye quenare jicã wameriacã jetore mani buio maji.
10 Caberopʉre Jesucristo cʉ̃ ca-tunu ejaro nipetirore mani majigarã.
Ti paʉ ca-ano mani ca-maji petiro bero mani ca-majibataje cawatoa macajere bairo anigaro yua.
11 Cawimarã ãnapʉ cawimarã na cá-átinucurore bairona tʉgooñari nare bairona mani ca-wadanucuwʉ.
Na ca-tʉgooñarijere bairona mani ca-tʉgooñarije cʉtinucuwʉ.
Bʉcʉ aána,
cawimarã na cá-átinucurije uniere mani ca-janawʉ yua.
12 To bairi yucʉacã caroaro Dio yere mani majiquẽe.
Eñoro cabʉcʉ yeje tʉjʉricarore bairo mani bai.
Caroaro mani baujaquetibʉja.
Cabero ca-bauja majuuropʉ Diore mani tʉjʉgarã.
Yucʉacã õcoacã mani maji cʉ̃ ca-aniere.
Cabero mani maji peocõagarã yua.
Manire cʉ̃ ca-majirore bairona caroaro cʉ̃ ca-aniere mani maji petigarã.
13 Atie itia wamena petiquetigaro.
To bairije anicõa aninucugaro.
Oco bairo ãa ca-petiqueti wameri:
Diore mani ca-tʉgooña nʉcʉbʉgorije;
“Dio caroaro mani átinemogʉmi,”
mani ca-ĩi tʉgooña wariñuurije;
mani ca-ame mairije.
To bairi wame itia wame ca-petiquẽtie to ca-anibato quena mani ca-ame mairije maca ca-ñuuri wame majuu ãa apeye netoro.