Compañeros de trabajo sirviendo a Dios
3
Yʉ yarã,
Espíritu Santore ca-cʉgorã ãma ca-ĩire bairo mʉjaare yʉ ca-buio majiquẽpʉ.
Diore ca-apiʉjaquẽnare ca-ĩi buioʉre bairo mʉjaare yʉ ca-ĩi buiowʉ.
Cawimarãre bairo õcoacã Jesucristo yere ca-majirãre bairo maca mʉjaare yʉ ca-ĩi buiowʉ.
2-3 To bairi ca-majirioquẽtiere mʉjaare yʉ ca-ĩi buionucuwʉ.
Apeye ca-majiriorije macare mʉjaare yʉ ca-buioata mʉja api majiquetiboricarã.
Yucʉ quenare ca-majiriorijere mʉja api majiquetiborã,
mai ati yepa macana Jesucristore ca-apiʉjaquẽnare bairo tʉgooñabana.
Mʉja ame wada netonucu.
Mʉja ame tʉjʉ ʉgoonucu.
To bairo baibana ati yepa macana Jesúre ca-apiʉjaquẽnare bairona mʉja bai.
4 Jicãarã,
“Pablo cʉ̃ ca-buiorijere cá-ána jã ãa,”
mʉja ĩi.
Aperã,
“Apolo cʉ̃ ca-buiorijere cá-ána jã ãa,”
ĩima mʉja mena macana.
To bairo ame ĩi wada netobana ati yepa macana Jesúre ca-apiʉjaquẽnare bairona mʉja bai.
5 Yʉ,
Apolo quena cawatoa macanare bairona jã ãa.
Diore cʉ̃ ca-paabojari maja jã ãa,
cʉ̃ ye quetire buiorã.
Jã ca-buiorije jʉgori mani Ʉpaʉ Jesúre mʉja ca-apiʉja jʉgowʉ.
Dio yere cʉ̃ cá-áti rotiriquere yʉ cá-áticõawʉ.
Apolo quena cʉ̃ ye paariquere Dio ape wame cʉ̃re cʉ̃ cá-áti rotirica wamere cá-áticõañupi.
6 Nemoona Jesú ye quetire mʉjaare yʉ ca-buio jʉgowʉ.
Jesucristo ye quetire mʉjaare buio jʉgoʉ jicãʉ cʉ̃ ca-oterore bairo mʉjaare yʉ cá-ápʉ́.
Yʉ bero Apolo mʉjaare ca-buionemoñupi Jesú ye quetire.
Cʉ̃ maca oteriquere to jiniqueticõato ĩi oco piori majocʉre bairona mʉjaare cá-ájupi.
Dio maca tiere to ca-bʉcʉaro cá-ájupi.
To bairo ácʉ cʉ̃re mʉja ca-api nʉcʉbʉgonemoro cá-ájupi Dio.
7 To bairi oteriquere ca-otei,
ca-oco pioʉ na maca cawatoa ca-ãna ãma.
Dio maca ãmi ca-ani majuʉ,
tiere ca-bʉcʉaro cá-ácʉ aniri.
8 Jesú ye quetire ca-buio jʉgoʉ,
cabero ca-buionemoʉ quena jicã wamerena ca-buiorã ãma.
Na pʉgarãre caroa wariñuuriquere na joogʉmi Dio cʉ̃ yere na ca-buiorique wapa.
9 To bairi yʉ,
Apolo mena jicãro mena Diore cʉ̃ ca-paabojarã jã ãa,
cʉ̃ ye quetire buiorã.
Mʉja maca Dio ye quetire ca-apirã aniri jicã yepa,
oterica yepare bairo mʉja bai,
tie oterique ca-putipa yepare bairona.
To bairo ca-bairã aniri Dio wejepʉ na ca-oteriquere ca-putinemoro cʉ̃ cá-átore bairona mʉja quenare cʉ̃ yere mʉja ca-majinemoro átigʉmi Dio.
Ape wame tunu.
Cʉ̃re ca-apiʉjarã mʉja ca-ano cʉ̃ ya poa,
caroa poa macana mʉja áti nutuacʉ áami Dio.
Cʉ̃ ya poa,
caroa poa macana aniri jicã wii ʉ̃ta mena na cá-áti wiire bairona mʉja ãa.
10 To bairi Dio yʉre cʉ̃ ca-buio rotirore bairona mʉjaare yʉ ca-buio jʉgowʉ Jesú ye quetire.
Wii nʉcori majocʉ ʉ̃ta rupaa ca-peo jʉgoʉre bairona mʉjaare yʉ ca-buio jʉgowʉ.
Aperã ti wiire átinemo paa turo wamʉ nutuana na cá-átore bairona aperã Dio ye quetire yʉ ca-buioriquepʉ buionemogarãma.
To bairi caroaro,
cariape jeto na buioato.
11 To bairi mʉjaare yʉ ca-buio jʉgorique ca-ãmʉ Jesucristo ye queti majuu.
Jesucristo ye queti jetore ca-buio jʉgope ãa,
Dio ye paarique átigarã.
To bairi ʉ̃ta mena turica wiire cá-ána na ca-cũu jʉgorica pãirire bairona ãa,
Jesucristo ye quetire yʉ ca-buio jʉgorique.
12 To bairi wiire cá-ána ʉ̃ta pãiri na ca-cũu jʉgorica pãiri bui ape rupaare peo turorique ãa.
Oro na ca-ĩri rupaa,
o plata na ca-ĩri rupaa o apeye caroa pairo ca-wapacʉti rupaa peo turorique ãa.
Tiere bairona ãa caroa majuure jicãʉ mʉjaare cʉ̃ ca-buiorije.
Apeye maca ãa yucʉ pãiri,
o ta unie,
o wʉ unie wii átaje.
Atiere bairo maca cawatoa macaje jicãʉ mʉja cʉ̃ ca-buiorije nemoona ca-yajirije.
13 To bairi ati ʉmʉrecóo ca-petiropʉ camaja na ca-ano cõona na cá-átajere,
“Ca-ñuurije ãa,”
o “Ca-ñuuquẽtie ãa,”
ĩi tʉjʉ bejegʉmi Dio.
Ca-ñuurije,
o ca-ñuuquẽtie macare na ca-buioyuparí ĩi,
apeye uniere ca-ñuurije jeto to tuaato ĩi ca-joe bejeñaʉre bairona átigʉmi Dio.
14 To bairi ca-ʉ̃ʉquẽtie unie ʉ̃ta rupaa mena wii cá-átacʉ ti wii ca-ʉ̃ʉquẽto tʉjʉri caroaro cʉ̃ wapayeboʉmi cʉ̃ ʉpaʉ.
To bairo cʉ̃ cá-átore bairona caroaro Dio yere ca-buioʉre caroaro wariñuuriquere cʉ̃ joogʉmi Dio cʉ̃ ucʉ̃re.
15 Apeĩ caroaro ca-buioquetacʉ ucʉ̃ maca cʉ̃ ca-buiobatajere reegʉmi Dio.
Ta mena áta wii ca-ʉ̃rore bairona yajigaro cʉ̃ ca-buiobataje.
To bairo to ca-ʉ̃ʉ yajibato quena cʉ̃ maca catígʉmi.
Wii ca-ʉ̃ri paʉ ca-ano ca-atʉ ruti butiire bairona catígʉmi cʉ̃ apeye unie ca-ʉ̃ʉ ree peo ecooricʉ anibacʉ quena.
16 Mʉjaa Dio wiire bairona mʉja ãa,
cʉ̃ Espíritu Santo mʉjaapʉre cʉ̃ ca-ano maca.
¿Tiere mʉja majiquẽetí?
17 To bairi Dio wiire bairona ca-ãnare ricati wame mʉjaare ca-buio rooye tuʉ ucʉ̃re cʉ̃ popiyeyegʉmi Dio.
18 “Yʉ maji majuucõa ati yepa macana na ca-majirijere,”
ĩi tʉgooñaqueticõaña mʉjaa.
Jocarãna to bairo mʉja ĩi tʉgooñaborã.
Ati yepa macana Diore ca-majiquẽna Dio ye macare,
“To bairona ĩicõaro ĩi,”
ĩima.
To bairo na ca-ĩrije to ca-anibato quena mʉja maca Dio yere tʉgooñaña,
Dio mena ca-majirã majuu anigarã.
19 Ati yepa macana Diore ca-majiquẽna na ca-maji majuurije ñee wapa manie ãa Dio cʉ̃ ca-tʉjʉata.
Dio ye queti ucarica pũuripʉ oco bairo ĩi ucarique ãa:
“Ati yepa macajere ca-majirã,
‘Jã majuuna jã cá-áti majirije menana ape wame jã cá-áti majiri wame jã átigarã,’
na ca-ĩiro Dio maca ricati to ca-bairo na átigʉmi.”
20 Ape wame tunu oco bairo ĩi ucarique ãa:
“Ati yepa macana,
‘Ca-majirã jã ãa,’
ca-ĩirã na ca-tʉgooñabatie wapa maa,
ĩmi mani Ʉpaʉ Dio.”
21-22 To bairi mʉjaa,
camajocʉ ucʉ̃re,
“Aperã netoro ca-majii ãmi.
To bairi cʉ̃re ca-apiʉjaʉ yʉ ãa,”
ĩiqueticõaña.
“Pablo cʉ̃ ca-buiorijere ca-apiʉjaʉ yʉ ãa,”
o “Apolo cʉ̃ ca-buiorijere ca-apiʉjaʉ yʉ ãa,”
ĩiqueticõaña.
Yʉre,
Apolore,
Pedro quenare mʉja tʉpʉ jã ca-buio roti jooyupi Dio,
yʉ yere caroaro na majiato ĩi.
To bairi nipetiro ati yepa macajere ca-cũuñupi Dio mʉjaare,
ca-ani majuurijere mʉja ca-majiparore bairo ĩi.
Catíriquere,
bai yajiriquere,
yucʉacã ca-anie,
cabero ca-anipe,
nipetiro ca-cũuñupi Dio mʉjaare,
ca-ani majuurijere mʉja ca-majiparore bairo ĩi.
23 To bairi Cristo cʉ̃ ca-boorije cá-átiparã mʉja ãa,
mʉja quena.
Cristo maca Dio cʉ̃ ca-boorijere cá-ácʉ ãmi.