Ibon jato ikinna jakonshaman iti
4
Ja senentiainbi iká netebo senenaitianra,jain non Ibon xobo iká mananra,
iresama itan bebon keyá jatíbi
wetsa mananbo winoa,
kikínra iti iki.
Jatíbiainoa jonibora jain bekanti iki;
2 ja joni icha nokotaxa, neskákanti iki:
“Ibon mananman mapénon bokanwe,
Israelbaon Diossen ani xobonko,
janbi noa jabé jaskatax jati axeanon,
jatianra jawen keena keskati noa jati iki”, ikibo.
Ja Jerusalénhainoaxa Ibon axeamisti shinanbo jokonti iki,
ja Jerusalénhainoaxa jawen joibo beti iki.
3 Ibonra, jatíbiainoa jonibaon ikabo
itan kikin ochokeax icha joni join ikanabo jato yoixonti iki.
Jaton espadabora jan mai karanbeti yamibo banéti iki,
jainxon jaton chachimisti kenshobora, machito banéti iki.
Tsoa inonbira, moa wetsa mainmea jonibo betan reteananyamai itan
reteananox moa axekantima iki.
4 Jatianra jatikaxbi rakéyamai jakonbires jakanti iki,
itan westíorabora jaton uva ota naman jainoax
jaton higuera ota namanbo jakonbires tantikanti iki.
¡Nato joibora jatíbi atipana Ibon joi iki!
5 Wetsa jonibaonra jaton ikonma diosbo yoiti ixonkanai,
ikaxbi nonra jatíbitian non Ibo Dios yoiti ixonti iki.
Ibon jawen jonibo xabakaamati
6 Neskárai Ibo:
“Ja netera nokon carnerobo en tsinkiti iki,
ja en masá tenemaabo;
chanké iki niaibo, paxkinabo,
itan janbisabo.
7 Jatianra ea Ibo moa koshi ixon,
Jerusalén Sión manáinxon rama itan jatíbitian,
nokon jonibo en jato ikinti iki.
8 Mato, Jerusalénhain jaa jonibaon,
jemara torre koshi koiramis keská iki, jara Sión manan iki.
Jakiribira apon jema iti iki,
ani itan iresama moa ikátiai keskáribira iti iki”, ikira iká iki.
9 Jaskara ikenbiki rama:
¿Jawekopí westíora ainbo baken chexai keskati mato saí ikai?
¿Maton jisáki mato apooma iki?
¿Iamax mato jan eseaibokayaki mawata?
10 Jerusalén jema, ainbo baken chexaa ikai keskati,
oken yoshobekoni sion iwe,
min jonibora miibakeax pikókanti iki,
jaskataxa wetsanko xabáinbires jakanti iki,
Babiloniain kamanra nokókanti iki.
Ikaxbira Ibon jawen jonibo iketian jainoa jato pikoxon;
maton rawiboibakea en mato xabakaamati iki.
11 Matoki jakonmaira wetsa mainmea
jonibo, ichabires tsinkitax, neskati yoyo ikanti iki:
“¡Moa Jerusalén jema ras ayonkana ointininra noa keenti iki!” ikibo.
12 Ikaxbi ja wetsa mainmea jatíbiainoa jonibaonra,
ja Diossen shinan itan ja akai jawékibo onanyamake;
jabaonra janmein noa keyonoxon tsinkiai ixon onanyamakanke.
13 ¡Jerusalén jonibó, benxokaatax boxon maton rawibo keyotankanwe!
Neskárai Ibo:
“Waka benen koshi keskara en mia imati iki,
min machanra yami keska iti iki, jainxon min taera bronce keska iti iki,
jaskáxonra maibotiibiain iká jonibo maton jato keyoti iki.
Matonra ramiayonxon mato bichinkana jawékibo, moa jato bichinribixon,
ja jawékibo maton ea meniti iki,
jatíbiainoa mai Ibo ea iketian”, ikira ikai.