Westiora Davidkan chiní bake apo iti
5
Ea Miqueasninra mato yoiai:“Jerusalén jonibó, mato jaki chipóti moa benxoakanwe.
Maton rawibo meranxonra, Ibon,
Israelhainoa apo akonbireskin ramiakin bemanainbo jiwi taxon rishkikin, masá tenemati iki.
2 Ibonra yoia iki: Ikaxbi mia Belén Efrata jemara,
ja Judá main iká jemabo xaranmea, maxko jema ikaxbi,
kikin jema banéti iki.
Miibakeaxa, maton moatian rareboibakeax,
Judáin joni koshi iti pikóti iki”, ikira iká iki.
3 Ikaxbi ramara Ibon jawen jonibo jeneai,
ja westíora ainbaon tooxon ja manaa benbo bake,
pikoai kamánres.
Jatianra maton mainbi baneta ikátiai
israelitabo betan ja kikin ochó bokana ikátiaibo,
moa jaton rarebo betan tsinkíkanti iki.
4 Jawen Ibo Diossen ani apo koshín, akinnara
jawen jonibo akini ja apo weníti iki,
jatianra jabo jakonbires jakanti iki,
jainxonra Ibo iresama iketian,
nato mai senenain kamanxon rabikanti iki.
5 Janra noa jakon jamati iki.
Jatian Asiriobo non main weitax
itan non apobaon xobo meranbobi jikikanaitianra,
jabo anon ixon, kanchis joni koshi
itan posaka iresama jonibo, jaton sontároboyabi raankanti iki.
6 Jabora, apo Nimrod ikátiai mainko Asiriain, jonibaon koshi jikikanti iki,
jaskati non main weixon iboataanan,
itan noa yatanxon bokanabo ikenbira,
reteanankin jatoaresxon noa xabáakanti iki.
7 Ja reteanankana pekáora,
ja texea israelitabo wetsa maibaon jakanti iki,
itan jemabo xarán ixonra,
jato jakon banémati iki, nibí betan oi bexon xobibo mechai keskára iti iki,
jara tsoa joninbi chitetima iki.
8 Ikaxbi ja texea israelitabora,
ja wetsa mainmea jonibo xarán,
jawen rawibo xarán westíora león keska iti iki,
winókinra jato beshéakin jaxkayonti iki,
jato jaskaara westiora jaton rawibi jiria jabátima iki.
9 Ibó, jaskáakinra min rawibo
jatíbi min jato keyoti iki.
10 Neskárai Ibo:
Ikaxbi maton rawibaon, mato wetsanko
boamabira en mato masá tenamati iki.
Ja netera janmeax reteananti carro niniai maton
kabayobo en jato retemati iki itan carro en jato ras amati iki iki.
11 Ja maton jemabora ja ikátiaibicho itiakin en jato ras amati iki,
itan jan koshiaboribira en jato ras amati iki;
12 ja yobébo betanbi, shinanmanres onanmis maton jonibora,
en jato keyómati iki;
13 ja maton diosbo itan ja maton iresama makánbora en jato ras amati iki,
ja matónbi ja rabiti aká jawékibora
jawetianbi moa maton rabiwetsatima iki.
14 Maton iresama jiwibora en jato mexamati iki,
jaskáribiakinra maton jemabo en jato kikinhakin ras amati iki.
15 Kikinni sináxonra,
wetsa mainmea jonibo, ea ninkáxonyamai yoitimakana iketian, en jato kopíti iki.