Dios Israelbo betan join ika
6
Maton rama ninkakanwe,jakonma akára Ibon mato yoixonai:
“Mato Israelitabo ¡Weníkanwe,
jakonma aká joni yoixonkana juez bebon wenitai keskati,
maton akábo onantiakin maton manánbo yoinon,
jabora maton aká onanabo iki!”
2 Ja chichokea mai tewanabo betan
keyá mananbaon ninkakanwe,
Ibon jawen jonibaon jakonma akábo jato yoixonai,
ja Israelbo betan join ika.
3 Neskárai Ibo:
“Ea yoikanwe nokon jonibó,
¿Enki mato jawe aka iki, iamax jawenki en mato ramia iki?
4 Mato yanka yonokin Egiptonko ináakana ikenbira, en mato pikoxon xabaa iki;
maton koshibo inon ixonra,
Moisés, Aarón jainoax María jabo en raana iki.
5 Jainxonribi shinankanwe nokon jonibó,
ja Moab mainmea apo Balacninra, mato ramiati shinanna ixon,
Beornin bake Balaamman, mato israelbaon rekenbo ramianon ixon,
amakasainbi, ea Ibon nokon janenko en mato jakonhamaresa iki.
Jainoaxibi shinan benóyamakanwe,
ja Sitim peotainkoniax Gilgal peotainko kanontianki mato jawekeska winota iki ixon;
onankanwe jan mato xabakaamaira ea iká iki”, akin aká iki.
Jonín jakon atin Ibo manata
6 Jawekeska ixon maton ea yokati iki ¿Jatíbinin Ibo Dios rabiimein
noa jaweya kati iki?
¿Ja westíora baritiaya waka bake benebo,
menixon jatiobi keyokin menoxoniki noa já bebon kati iki?
7 ¿Waranka carnero betan chonka
waranka litro xeni non Ibo meniamein noki raroti iki? Ikama.
¿Iamax ja noa yoitimaa kopí,
itan ja noa ochaa kopímein, non reken baken non kopíati iki? Akáma.
8 Ibonra moa mia yoia iki, joní,
jan jakon inon ixon imaiki jawe iki,
itan jánki mina jawe manai;
ja atikeskabiakin min jakon ati, mia akonkin senenhai iti,
itan naman shinanmeexon min Dios yoiti ixonai mia iti.