Jato ikinnai Israel jakonma joni koshiboki ramíkin yoia joi
3
Jato ikinnai koshibo itan israelita joni koshibo ninkakanwe,¿Matonkayaki nokon jonibo, ja itikeskabiakin jato jakonhati onanyamaa?
2 Ikaxbi matonra jatíbi jakonmares noixon,
ja jatíbi jakonbo maton omisai;
nokon jonibora maton masá tenemaxon
jawebioma banémai.
3 Matonra jato akonbireskin masá tenemai;
nokon jonibora maton jiriabi piai keskákin akai,
jaton bichibora maton xokai itan jaton xaobora maton sekeai,
kentíain nami anoxon akai keskáakinra maton jato akai.
4 Wetsa netera maton Ibo yokáti iki,
ikaxbira mato jan akintima iki.
Maton ichaira jakonma aká iketianra,
ja netebo mato ninkáxonyamakin jeneti iki.
Paranmis profetaboki ramíkin yoia joi
5 Jato paranai profetabora Ibon yoia iki:
Nokon jonibora bain benotaxbi bobóresai keskábo iki,
mato janso profetabaon paranai kopí,
jaskáakinra jan mato pimaibo, jakon jatikiriakinres maton yoiai,
ikaxbi jan mato pimayamaibora,
wetsabo betan mato reteanankanti iki,
ixonres maton jato yoiai akin jato aká iki.
6 “Jaskara ixonra, rama maton namá meran keskainxon,
moa yamébo oinwetsatima iki,
ramakaya itibora maton yamé yoitima iki”.
Jakopíra mato janso profetabo, en moa mato akintima iki,
moa yaméain keskáres iketianra, ramakaya itibo en moa mato onanmatima iki.
7 Ja oinxon onanmisbo itan shinanman onanmisbora,
kikínbires rabín banékanti iki.
Diossen moa jawebi yoiamaara,
jatíbi jabo netéreskanti iki.
8 Jaskákenbira ea Miqueas, Ibon shinanman,
ea ichabires koshi menia iki, atikeskabiakin jakon ati itan rakétima shinanra ea menia iki,
Israelbo yoitimakanaitian jato notsinon ixonra ea aká iki.
Jerusalén jonibo jatoareskanti
9 Jato ikinnai koshibo itan Israel joni koshibo, en mato yoinon ninkakanwe,
ja atikeskabiakin jakon atira maton omisai,
ja esekan ponté yoiainbira maton wetsai,
10 ja Jerusalénhain nokon ani xobonkoniaxa, eséki ramíkanai
itan jaskara atima jakonma jawéki akanai.
11 Jerusalén jemamea jato joi benxoaxonai joni koshibaonra,
jato akinti kopí bebonbires koríki yokata iki,
ja sacerdotebora jato axeaibo ixon,
koriki biti kopíbichores jato axeakana iki,
itan ja profetabaonra kopíakanares,
ikamatianbi jaskara ikí kaai jato yoikana iki.
Noara jawe jakonmabi winóyamai
“Ibora nobé iki”. Noara jawen katota jonibo iki, ikires ikanai.
12 Jaskara ikenra maton jakonma aká kopí,
Jerusalén jema betan nokon ani xobo ras ika tsamábores banéti iki,
jatianra ja Sión manan xobin mapoti iki.