Jawebiomabo ramiakin masá tenemaibo Diossen masá tenemati
2
¡Jawe ireskiaipanon ja oxaamatianbi,jakonma jawékibo anoxon shinankin jeneyamaibo,
jatian moa nete nokóketianra,
jaskara jawéki ati koshiabo ixon moa akanai!
2 Maibaon keenkinra, moa jabo iboakanai iki;
xobobaon kennira, moa yometsokanai.
Jonibora jaton rareboyabi, jaton
jawékiboyabi, ramiakin masá tenemakanai.
3 Jakopíra Ibo neskatai:
“Enribira mato ramiati shinanai.
Matokira en westíora jawéki rabintibires raanai,
jainoax mato xabakaati jisámabobi,
jatianra maton rabí shinanbobi yamati iki,
kikínbires jakonma nete iketian.
4 Ja netebaonra matoki shirokin,
onis bewabaon yoyo ianan maton rawibaon neskáakinbo mato bewaxonkanti iki:
‘Akonbireskinra noa keyokin ras akana iki;
non jemakaya Ibona ikenbi,
ja noa iboabora tsonbi raanti senenma iki;
itan ja noa bixon iboabaonra
non wai pakexbo noa bianankana iki’ ”, ikira iká iki.
5 Ea ninkakanwe israelitabo. Matora nokon jonibo iká iki,
ikaxbira en mato mai moa jakiribi meniwetsatima iki.
Jakonma profetabo
6 “¡Bexon, ja ikamatianbi jaskara itibo noa yoiamakanwe!
¡Ja rabinti jawékininra noa nokotima iki!” ikira israelitabo ikai.
7 ¿Jaskara ikaxki maton shinanna Israel jonibo Ibon jakonmakin shinanxonama iki?
¿Maton shinanaki Dios jawen joniboki sinata iki? Iraa iki.
¿Diossen akaiki jaskara iki? Jaskara riki,
¿Maton shinanaki jawen join imaa ponté iamakani? Irakana iki.
8 Ibonra yoia iki: Mato nokon jonibora eki ramita iki.
Moa reteanantiainoax baneti bekanainbira,
moa xabakaata shinankin,
jaton kopí chopabo maton jato bichina iki.
9 Nokon jemamea ainbobora jaton noia xobonko jakon jakana ikenbi,
jainoa maton jato pikoa iki,
jato jakonhakin, jaton bakebo en jawéki meniabora,
jatíbitian jayaoma itiakin, maton jato bichina iki.
10 Wenitax botankanwe,
nenora mato jain tantitima iki;
jainra ichaira jakonma jake,
jakopíra en mato kikinhakin keyoti iki.
11 Maton keen riki ja janso profeta jansoi yoyo ikai:
“Mato jan paentira pae jati iki itan wetsa jan paentiboribira jati iki”, ikaibo.
Diossen jawen jonibo xabáati yoia
12 Ibonra yoia iki: “Jatíbi nokon Israel jonibora en jato tsinkiai;
ja ichama texea israelitabora en jato biai.
Chité meran carnerobo akai keskáakinra en jato tsinkiai,
xobi pii carnerobo tsinkita keskáakinra en akai,
jatianra joni icha ikai keskati saa ikanti iki”, ikira iká iki.
13 Diossen jato bai kepenxonara,
ja chibani boax, jema xepotiain jokonkanti iki.
Jaton apo, ja Ibora jatíbi jato bebon kati iki.