MIQUEAS
Jakonma akábo Diossen jato yoixonti iketian moa ochatima, Miqueasnin yoia
Samaria jonibo Diossen jaton akábo yoixonti
1
Judáinoa Moréset jemameara westíora joni jawen jane Miqueas iká iki, jatianra Jotam, Acaz itan Ezequías apo iketian Samaria itan Jerusalén jema jaskara winoti kaai, onannon ixon Ibon, oxakemabi namá keska meranxon joi yoia iki.2 Jatíbi jonibó, neskara ninkakanwe;
jatíbi nato mainmeabaon ninkakanwe:
Jawen jakon xobonkoxonbira, Ibon maton jakonma akábo mato yoixonti iki.
3 Ibora jawen itinkoniax pikóti iki,
manan masenenbo iikiranira joti iki.
4 Yomoxo chiikan aká ikai keskáakinra,
jawen tae xananbi mananbo charámati iki,
jainxonribira jene koshi baikin mai pixtea keská,
mai teshanpabo rabé kaxke banémati iki.
5 Israel jonibo yoitimata kopí itan,
jaton ochabo aká kopíra jatíbi jaskarabo iti iki.
¿Jaweranoaxki Israel jonibo yoitimaa iki?
¡Samaria jemankoniaxa ikana iki!
¿Jatian jaweranoxonki, Israel jonibaon ikonma diosbo rabikana iki?
¡Jaweranonxoma Jerusalénhainxonbi!
6 Jaskara iketianra Ibon yoiai: “Ja Samaria
jema xobo ras iká pakéxbora, en westíora tsamáres banémati iki,
tsoa jonibi jain jaama mainko, jain uva banakanai keskáres itiakinra en ati iki.
Jainxon ja jemamea makánbora, mai teshanpain en janbísati iki,
jan xobo peyaka mai meranoa jan tewana makánbora en jishtimati iki.
7 Jatíbi jaton ja rabiti aká jawékibora plata koríki, en beshéati iki,
jainxonra jatíbi jaton iresama jiwi xate nichinabo en jato menonaanti iki.
Jabora jan tsini ainbobo kopíakin aká iká iki”.
Onisi Miqueas winia
8 Jaskara iketianra ikonbiresi onisi yoyo iananbi ea winiti iki;
jaskatira zapatooma itan chopaoma ea niti iki,
chacala ikai keskatira ea winiti iki,
jainoaxa avestruzb bake ikai keskati ea sion iti iki.
9 Ibon Samaria jonibo masá tenemaara, benxotima xaté keska iki:
jara Judáin nokotax,
itan Jerusalénhain kamanbi nokóke,
ja jemanra nokon jonibo jake.
10 Nato noa jaskara ikai Gathain jaa jonibo, non rawibo jawebi yoiamakanwe;
jainoax winiamakanwe.
Bet-le-afrá jemamea mai poton akonbireskin maton masá shinanai,
onanti inon ikax, chexakaati taranmeekanwe.
11 ¡Safir jemamea jonibora, yononoxon yatanxon wetsanko bokanti iki,
chopa jopemaxon itan kikin rabintiayonxonra bokanti iki!
¡Zaanán jeman jaa jonibora jaton rawibaon katea ikax,
tsoabi mato akini pikókantima iki!
¡Ja Bet-ésel jemamea jonibora masá shinanni winikanti iki,
jaton jemara ras akana iká iki,
jaskákinra tsonbi mato akintima iki!
12 Marot jeman jaa jonibora, akinkanti keeni
manákankenbira, tsonbi jato akinyamaa
iki. Jakon shinantinin kennira yoshoyonkana iki,
ikaxbi Ibonbi raanara Jerusalén xepotiain
kamánbi, jakonma jawéki nokota iki.
13 Mato Laquis jemamea Israel jonibora,
matopari Iboki ochai peokoota iki,
jaskákinra ja Jerusalénhainoa jonibo maton jato ikinna iki,
jakopí maton carretabo kabayoki nexax, ishton jabati botankanwe.
14 Moréset-gat jemamea jonibora, jaton rawibaon jowetsatimaakin bokanti iki.
Ja Aczib jemamea jonibaonra, Israelhain iká apobo, jato akinyamakin parankanti iki.
15 Neskárai Ibo:
“Matoki ramíkinra, ja Meresáin jaa joniboiba, en westíora joni raanai jan mato nokoti,
ikaxbi ja Israelhainxon jakon iketian koshi shinanya katókana,
jonibira Adulam kini meran joneti jabáti iki.
16 Mato Jerusalén jeman jaa jonibora, maton noia bakeranonbo,
nenoa ochóbires bokanti iketian,
masá shinanai onanti inon ikax,
westíora xete keskati,
mato maxtani maxkorokanti iki”, ikira iká iki.