2 Jatianra Ibon jatíbiain en nimaa iki; ja mai teshanpara xaon bochoa, kikínbires icha itan moa ikonbiresi tanoabo iká iki.

3 Jatianra ea yoia iki: “¿Minki ikonhai nato xaobo, jakiribi jiriax joniti?” akin. Enra yoia iki: “Ibó, minresa onanke akin”.

4 Jatianra ea Ibon yoia iki: “Nokon janenko nato xaobo yoyo awe, jainxon yoiwe: ‘Xao tanobó, Ibon joibo ninkakanwe akin.

5 Ibonra mato yoiai: Mato jakiribi janon ixonra, jiwéti join enbi mato meran jikimai akin.

6 Ja xao rexkebo tekímaxonra, namimaxon en bichín rakoai, jainxonra ja jiwéti join en meniai jakiribi jatiakin. Jatianra maton ea Ibo onanti iki ixon yoiwe’ ”, akinra ea aká iki.

7 Ea, jan jaskati yoia keskákinra, en jato yoyo aka iki. Jato yoyo akinbira, kerox ikaibo en ninkata iki: jatianra niwanna iki, jaskatainra xaobo jainbicho biananani peokoota iki.

8 Jatianra, ja xao rexkebo moa namiketian bichín rapoaibo en oinna iki. Ikaxbira, jan jiwémati joínhomabo iká iki.

9 Jatianra ea Ibon yoia iki: “Nokon janenko, jiwémamis join yoyo awe, itan yoiwe neskáakin: ‘Neskárai Ibo: Jiwémamis join, jowé, jawen chosko pasenenaorikeax, nato mawá yorabo janon ixon jiwémai’, akin yoiwe”, akin.

10 Enra, Ibon janenko jato yoyo aka iki, jan ati yoia keská akin, jiwémamis join joáxa, jabo meran jikia iki, jatianra jakiribi jiriax moa weníkana iki. Jabora ikonbires icha, westíora tsamá sontárobo iká iki.

11 Jatianra ea Ibon yoia iki: “Israel jonibora nato xao keskábo iki. Jabaonra yoiboresai: ‘Non xaora tanobo iki, noara jawen manátiomabi ikax; manotabo iki’, akin.

12 Jaskara iken, nokon janenko jato yoiwe: ‘Neskárai Ibo akin: Nokon jonibo, enbira mato nokon jonibaon kinibo kepenai; jainoara en mato pikoai, jaskáxonra jakiribi en mato Israelhain jomai.

13 Nokon jonibó, jawetianki maton kinibo kepenxon, en jainoa mato pikoai, jatianra ea maton Ibo maton onanti iki.

14 Enra, mato meran nokon jiwémamis join imati iki, jatianra mato jakiribi jiriti iki; jaskáaxonra en maton main imati iki. Jatianra, ea Ibo ixon yoiabo itan en akábo maton onanti iki. Ea, Ibonra ponté yoiai, akin jato yoiwe’ ”, akinra aká iki.

15 Ibonra ea yoia iki:

16 “Ezequiel, westíora jiwi pakex bixon jain wishawe: ‘Judá betan Israel rabeta’, Japekáo wetsa jiwi pakex bixon wishawe, Efraínra Josekan toan iká iki, itan jatíbi Israel texeabo betan rabeta iki.

17 Jatianbi, rabé jiwi pakex bixon kataxkin yatanwe, westíorabicho itiakin.

18 Jawetianki min kaibaon noa yoiwe akin mia akai: ‘Noa yoiwe, jawe yoii ikarin, nato akin’,

19 jatian jato yoiwe: ‘Neskárai, Ibo akin: Enra, Josekan jiwi biai, ja Efraínman mekenman iká, jainoax jabé rabeta ja Israel joniboribi, jaskáxonra westíora jiwibicho itiakin enbi Judakan jiwi betan kataxai, westíorabicho nokon mekenman itiakin’, akin jato yoiwe,

20 Jaton jishnonbira ja min jain wishaa jiwi rabé, min mekenman iti iki.

21 Japekáo jato yoiwe: ‘neskárai, Ibo akin: Ja israelitabo wetsa maibaon bokanabora, enbi jato biai; jatíbiainoara en jato tsinkiai, jaskáxonra jaton mainbiribi en jato imaribiai.

22 Nato Israelbaon mainra ja manánbo ikain, en westíora joni tsamáres imati iki, westíora apoyares. Moara rabé tsamá jonibo itima iki, itan rabé koshiaribi iwetsatima iki.

23 Matonra jakonmabo jakiribi atimaribi iki, ja en omisai jatonbi ja rabiti aká jawékibo moa rabikantima iki, meskó ochaboribi moa akantima iki. Jatíbi ja senenhayamai ochakanabora en jato xabáati iki, itan jaton ochabo kopí en jato jaweatima iki, jabora nokon joni iti iki, itan eara jaton Dios iti iki.

24 Nokon yonoti Davidkan chiní bakera apo iti iki, itan jatíbi jabaon westíora pastor jabicho iti iki, jatianra jabaon nokon esébo betan nokon koshi joibo ninkáxon ea senenhaxonkanti iki.

25 Ja nokon yonoti Jacob en mai meniniainra jakanti iki, jaton yosibo jakátikanainkoribi. Jabora jatíbitian jain janoxiki, jainoax jaton bakebo, itan jatíbi jaton chiní bakebo; jatian nokon yonoti Davidkan westíora chiní bakera jatíbitian jaton koshi iti iki.

26 Jainoax jabo betanra, jaskara senenhabekonti joi en ati iki, jawe iamai ikoni jakonshaman jakanon ixon. Ja senenhabekonti joira jatibitianbires iti iki. Enra jato kaimati iki, itan nokon jakon xobora jatíbitian jato betan en imati iki.

27 Eara, jato betan jati iki, jatianra ea jaton Dios iti iki, itan jabora nokon jonibo iti iki.

28 Ja nokon jakon xobo jatíbitian jato betan iketianra, wetsa mainmea jonibaon, ja Israel jonibo nokona itiakin, en jato katota onankanti iki’ ”, akinra ea aká iki.