23 Wetsa maibo ikainoa jonibo bebonra, ea iki kikin itan jakonshaman ixon en jato oinmati iki, jabo xaranxon maton ea ramia iketian; en jaskáara jabaon, eara Ibo iki ixon onankanti iki. Ea, Ibonra, ponté yoiai.

24 Enra, mato jatíbi ja wetsa jonibaon mainmeabo pikoti iki; itan jaskáxon tsinkixonra, en jakiribi maton mainko beti iki.

25 Kerás neoma onpaxen akai keskaakinra en mato chokati iki, itan jatíbi maton kerásainoara en mato xabaati iki, ja rabiti matonbi aká jawékibo axon rabiainoara en mato jawe kerás neomabi imati iki;

26 enra mato meran bená jointi itan bená shinan imati iki. Ja mato meran iká makan keska chorish shinan bichinxonra, taamabires shinan en mato meran ati iki.

27 Ja nokon shinanra en mato meran imati iki, nokon eséboyabi nokon koshi joibo maton senenhanon ixon;

28 jatianra en maton anibo menini mainko mato jamati iki, jatian nokon jonibo mato iti iki, itan ea maton Dios iti iki.

29 Ja maton jatíbi jakonmainoara, en mato xabáati iki. Trigora en kaimati iki, jatianra en mato jawékiatinin imatima iki.

30 Jainxonribira, yobín jiwibo betan wainkonia banábo en ichabires bimimati iki, jatianra wetsa mainmea jonibo bebon, ja pitin ikai kopí, mato rabintima iki.

31 Jawetianki, maton jakonma ikábo itan maton jakonma akábo shinanai, jatianra matonbinix mato rabínti iki, itan maton icha ochabo aká kopí.

32 Ea, Ibonra, ponté yoiai: Onankanwe israelitabó, natora maton jakon aká kopí en akaima iki; natora maton ikainkobo jakonma aká ikax mato rabínkanon ixon en akai iki.

33 Ea, Ibonra yoiai: Jawetianki jatíbi ochankonia en mato jakon imai, ja ras ionna jemabora maton benáaribati iki, jaskáxonra en mato jain jamati iki.

34 Ja mai jain jawebi xoxoyamai baneta ikenbira, jaskara jawebioma iititianbi; jatíbi jain winotaibaon oinna moa orokana iti iki.

35 Jainxonra yoikanti iki: nato mai jain jawebi xoxoyamai baneta iitibira, rama jain jakon jati Edénhain keská iki; ja jemabo keyokin, ishtonbires jakonmakin ras ayonxon jenekanibora, rama koshiakin jakonhayonaxbo jain jakana iki.

36 Ja patax iká wetsa main jabaonra, ja ras akana jemabo en benáaitian, itan jamákin baná keyokanabo en banaribiaitian oinxon, ea Ibo onankanti iki. Ibo ixonra en yoiai, enra akí kaai ixon.

37 Ibo ixonra en yoiai: Wetsa jawékiboribira en akí kaai ixon. Ja Israel jonibaon yokata keskákinra; carnerobo kaitai keskáakin, en jawen jonibo kaimaxonti iki.

38 Ja jemabo ras ayonkana jawebioma ikátiibira, ikonbiresi jonibo kaiti iki, jaskatira ja fiestatian Jerusalénhainxon, menonoxon carnerobo bokanai keská ikanti iki. Jatianra nokon jonibaon, ea Ibo onankanti iki’ ”, akinra ea aká iki.