Apo Sedequíasnin jaki oranti Jeremías yokata
37
Ja Nabucodonosor, Babilonia apo ixonra, Josíasnin bake Sedequías Judá apo imaa iki, ja Joacimman bake Jeconiasnin toan.2 Ikaxbira Sedequíasninbi, jawen joni koshibaonbi, jainoax ja jonibaonbi profeta Jeremías meranxon Ibon jato yoia joi ikonhayamai yoitimakana iki.
3 Apo Sedequíasninra, Selemíasnin bake Jucal betan sacerdote Sofonías, ja Maaseíasnin bake, profeta Jeremíassiba jato raana iki, kaxon neskara yoiti: “Non Ibo Dios noa kopi yokáwe”, akin ati.
4 Jeremíassa yatanxon xepokanamapari ikáx, jonibo xaran jakonbires niti atipana iki.
5 Jaskati iikanaitianra, faraónman sontárobo Egiptonkoniax bekanai ninkatax, Babiloniobo, Jerusalén binoxon kateax iitibi moa jainoax bokana iki.
6 Jatianra profeta Jeremíassiba kaxon jaskara yoiti Ibon yoia iki,
7 ja Judá apon raanabo jawen joi yoitira iká iki: “Jabaon ea yokánon ixon ja Judáinoa apon raanabaon, ja faraónman icha sontárobo mato akinni beaibora moa Egiptonko jakiribi bokanke, akin jato ati.
8 Babiloniobora Jerusalén jema ramiaki beribakanti iki, bexonra bikanti iki, jaskáaxonra menokanti iki.
9 Ea Ibonra, onannon ixon mato yoiai: Matonbinix paranmeeyamakanwe, ja babiloniobora moa boai ixon ikonhayamakanwe, jaskarama riki boyamarakanai.
10 Jan mato akai icha babilonio sontárobo matonharesabira, jawetishoko joni moa isinhametabo jaton peotain banékanti iki, itan ja jonibo benxoax weníxonra ja jema menokanti iki”.
Joni koshibaon Jeremías xepoa
11 Faraónman sontárobo beai ninkataxa, babilonio sontárobo moa Jerusalénhainoax bokana iki,
12 Benjamín jonibaon main kaaira ja jemameax Jeremías pikota iki, jawen papan jawéki biira kaa iki, jawen mainmea jaweti jonibo betan bitira iká iki.
13 Ikaxbi ja Benjamín mainko kaai pikóti xepotiain nokóketianra, westíora joni jawen jane Irías, Selemíassen bake, Hananíassen baban, jato koiranaibaon koshi ixon Jeremías bechitexon yoia iki: —¡Miara jabatax babiloniabaona ikí kakasi iki! —akin aká iki.
14 Jeremíassenra yoia iki: —¡Jara ikonma iki, eara babilonioboiba kayamai! —akin. Ikaxbira Iríasnin ikonhayamaa iki, jaskákinra yatanxon joni koshibo bebon boa iki.
15 Jabora Jeremíaski kikínbiresi sinákana iki, jaskákinra rishkixon, jaskara iká joibo wishai, Jonatánman xobonko xepoti jato yoii kaa iki, joni koshibaonra jain jato xepoti xobonko jikimakana iká iki.
16 Jeremíassa jain jato xepokanainko mai meran akana, basibires jain iká iki.
17 Ja basibires iká pekáora, apo Sedequíasnin jawen xobonko Jeremías boti jato yoia iki, Jeremías apo bebon bokanketianra, jan jonéshoko yokata iki: —¿Ibon ja yoiai joiki ja? —akin. Jeremíassenra yoia iki: Jarake, jara neskara iki: —Miara Babilonia apon yatannai —akin.
18 Jatianribira, Jeremíassen apo Sedequías yokata iki: —¿Mia itan min joni koshibo iamax joniboki jakonmakin en aká iki, ja esé senenhayamakin, jatian maton ea xepoa iki?
19 ¿Ja Babilonia apora mato binoxon mato akí itan maton mai bii jawekeskataxbi joyamai ixon yoia profetaboki jawerano ikanai?
20 Mia nokon apó rama ninkáwe, jaskáaxon nato en mia yokatai ea axonwe: Jonatánman xobonko jakiribi ea jato bomayamawe, jainoaxa ea mawánake —akin.
21 Jatianra apo Sedequíasnin jato yoia iki, jain xepokaati jemanbi Jeremías imati, jainxon ja callen marokanai pan netetiibi pimakanti. Ja jeman pan japariketianra jaskara akana iki. Jaskatax jain sontárobo ikai jemashokonkobi Jeremías baneta iki.