2 “Jain wishati bichi xei biwé, Judáinoa Israel yoii ea ikábo jatíbi jain wishawe, wetsa maibotiibi ikábo yoii ea ikáribi awé, Josías janontianbi yoikin peoxon rama kamanbi en mia yoiabo awé.

3 Ja Judáinoabaon jatíbi jakonma jawékibo en jatoki raanti onanxonra, jaton jakonma ikábobira jenekanti iki, jatianra jaton jakonmabo itan jaton ochabo en moa jato shinanxontima iki”, ikira iká iki.

4 Jatianra Neríasnin bake, Baruc Jeremíassen kenaa iki, jatianra jatíbi Ibon yoiabo wishati yoia iki, jatianra bichi xeikan Barucnin wishaa iki, jatíbi Jeremíassen yoiara wishaa iki.

5 Jaskáa pekáora Jeremíasnin jaskara atibo Baruc yoia iki: “Oinwe, xepokana ikaxa Ibo rabiti xobonko ea katikoma iki.

6 Jaskara iketian, ja wetsa nete ayunani ikanaitian kaxon, ja en yoia min wishaa xeikamea yoyo anonxiwe, abákanon ja Judáin iká jeman jaa jonibaon, itan ja neno beabaon jatíxonbi ja Ibon joi ninkákin.

7 Jaskáa akantibetin Ibo yokákin, itan jatíbi jaton jakonmabo jenekin, jan jato ati Ibon bebonbires siná shinanra, jaki rakétibires onsá iki”, ikira iká iki.

8 Jatíbi ja ati Jeremíasnin yoiara Barucnin aká iki: Ibon xobonko kaxonra ja bichi xeikan wishaa Ibon joi jato yoyo axona iki.

9 Ja Josíasnin bake Joacim, moa pichika baritia Judáin apo iká iketian, jawen iskon oxe itinra, Jerusalénhain jabaon, itan Judáinoax Jerusalénhain beabaon, Ibo bebonxon ayunankanti iki.

10 Jatianra Baruc, ja jan jikiti bená xepoti iká patax, ja Ibon xobo chicho iká jema ikain kaa iki, jainxonra, ja jan jato wishaxonai Safáman bake Gemarías jain iká chitéainxon, ja bichi xeikan iká Jeremíasnin yoia joibo, jatíbi jonibo jato yoyo axona iki.

11 Gemaríassen bake Micaías, ja Safánman babanra, ja xeiainoa Barucnin Ibon joi yoyo akaitian jatíbi ninkata iki,

12 jatianra apo jain iká xobonko kaa iki, jaskara winota joi wishaiton chité ikain, jain iká jatíbi joni koshibo tsinkikana: Elisama, jan joi wishai; Delaías, Semaíassen bake; Elnatán, Acbornin bake; Gemarías, Safánman bake; Sedequías, Hananíasnin bake; jainoax wetsa joni koshiboribi.

13 Jonibo bebonxon Barucnin ja xeiain wishaa yoyo akai ninkatara jatíbi joi Micaíassen jato yoia iki.

14 Jehudí, Netaníassen bake, Seleníassen baba, Cusín baban baken bakera, joni koshibaon Baruc yoiti raana iki, ja jatíbi jonibo bebonxon jato yoyo axona xeí jato boxontira iká iki. Jatianra Barucnin xeí bixon jato bebon boá iki,

15 jatianra jabaon westíoranin yoia iki: —Yakáxon ja xeikamea wishá noa yoyo axonwe —akin. Barucninra jato yoyo axona iki,

16 jatianra ja ninkatatianbi, kikinni raketi yoianani neskákana iki: —Jatíbi nato jawékira ninkánon ixon apo non yoiti iki —ikibo.

17 Japekáora Baruc yokákana iki: —Noa yoiwe jawe keskáaxonki nato jatíbi min wishaa iki —akin.

18 Barucninra yoia iki: —Jeremíassenbira jatíbi ea yoia iki, jaskáketianra ja bichi xei tintan en wishaa iki —akin.

19 Jatianra Baruc yokákana iki: —¡Jeremías betan jonétanwe, jatianra jain mato iká tsonbi onantima iki! —akin.

20 Kikin joni koshibaonra ja xei wishá, Elisamanin chité meran abainkana iki, jainoaxa jatíbi jaskara ikábo apo yoii jawen xobonko bokana iki.

21 Elisamakan chitéainoa ja xei wishá bitira apon Jehudí raana iki, Jehudíkan beketianra, apo bebonxon itan jatíbi ja kateaketana joni koshibo bebonxon yoyo aka iki.

22 Iskon oxe iketianra, matsitian iti jawen chité meran ikax, chii kete patax apo iká iki.

23 Jehudíkan moa kimisha iamax chosko namanni joyota wishá yoyo akin keyoketianra, chichikanin xatepakexon apon chii kete tiritainko bepota iki. Jatíbi ja xei wishá keyotai kamanra aká iki.

24 Apobi, jawen xobon iká jawen yonotibobira ja yoyo akai ninkatax, rakéyamaribinonbi chexakaakanaibobi onantima ikana iki.

25 Elnatán, Delaías itan Gemaríassenra, ja xeí wishá menoyamanon ixon apo yokákin teaa iki, ikaxbira jan jato ninkáxonyamaa iki,

26 jaskáyamakinra Jerahmeel, ja apon kikin rarebo, Seraías, Azrielnin bake itan Selemías, Abdeelnin bake, jabo jato yoia iki, Jeremías itan jawen secretario Baruc yatanxon nexati. Ikaxbira Ibon jato moa jonea iká iki.

27 Jeremíasnin yoia joi Barucnin wishá xeí apon menoa pekáora, Jeremíassiba kaxon Ibon yoia iki:

28 “Wetsa xei bixon jakiribi wishawe, ja reken xeikan min aká iibata joiboribi, ja mia Judáinoa apo Joacimman menonanhibata.

29 Itan neskara yoia awé: ‘Neskarara Ibon yoia iki: Ja xeira min menoa iki, Babilonia apon nato mai ras axon jawe jonioma itan jawe yoinaomabi itiakin akí joai winóyamai iketian, Jeremíassen ja xeiain wishaketianra min notsina iki.

30 Jaskara ikenra, ea, Ibo ixon mia yoiai, mia Joacim, Judáinoa apon chiní bakera, Davidkan ani yakátinin iti yamake. Mia mawáketianra min yora neten xanan ati iki, itan yaméra kikinhakin matsin ati iki,

31 jatianra mia itan min chiní bakebo, akai keskáribiakin, min xobon iká min yonotibo, jaton ocha kopi en jato masá tenemati iki. Jerusalénhain jaabo, itan Judáin jaa jonibokira jan mato ati en yoia, jatíbi jakonma jawékibo en matoki paketi iki, jabora maton ikonhayamaa iki’ ”.

32 Jatianra Jeremíassen wetsa xei biribaxon Baruc menia iki, jatian janra jatíbi ja Jeremíassen yoiai joibo wishaa iki, ja joibora iká iki ja apo Joacimman moa menoibata xei meran ikábo. Wetsa jaskara icha joiribira Jeremíasnin tekikin yoia iki.