15
Ibonra ea yoia iki: “Moisés betan Samuel neno ebebon jokebira, nato jonibo en noibatima iki. Jato yoiwe ebebomeax botankanon ixon.2 Jatian jaweranoki noa kati iki ixon mia yokákanara, neskáakin en mia yoia min jato yoiti iki:
‘Ja keyomis isinman mawátibora,
ja isinman reteti iki;
ja reteanantiainoax mawátibora,
reteanantiainoax mawáti iki;
ja pitin mawátibora,
jato pitin reteti iki;
ja yatanxon wetsanko bokantibora,
yatanxon wetsanko jato bokanti iki’.
3 Ea Ibonra, onantiakin yoiai: Enra chosko keská jan masá teneti matoki raanai: Matora reteanantiainxon retekanti iki, ochítibaonra maton yora niniti iki, tetébaonra mato piti iki, siná yoinabaonra mato keyokin piti iki.
4 Jatíbi maibotiibi iká jonibora, en jato aká oinnax kikinni rakékanti iki. Ja Ezequíassen bake Manasés, Judáinoa apo ixon, Jerusalénhainxon aká jawekibo kopíra en jato jaskaati iki.
5 ¿Jerusalén jonibó, tsonmein mato noibaxon onísati iki?
¿Tsoaki mato kopi winiti iki?
¿Tsonki isinyamanon ixon mato akinti iki?
6 Matonra ea jenexon, jakonmakin yoia iki.
Ea Ibonra, onantiakin yoike.
Jaskara ikenra en moa manati paxkinxon,
mato masá tenemanoxon nokon meken en sanana iki,
jatianra en mato keyokin ras aka iki.
7 Maton jonibora xobi choshi atin en janbisaa iki,
ja mainmeara, jemabotiibi ikanainoa en jato pikoa iki;
nokon jonibora jawe bakeomabi en jato banea iki,
enra jato keyoa iki, jaton
jakonma akaibo jenekashamakanai kopí.
8 En imaara jato xaran icha ainbo benomatabo iká iki,
aniparonkonia mashi pototi bebon ichara ikana iki.
Bariapanshamanra titabo jaton bake ranonbo
betan en jato mawámaa iki;
ratereskinra jan masá teneti itan onsá jawéki rakéti ja ainboboki en pakea iki.
9 Icha bakea titabora beyosi,
join keyokana iki;
rabinna itan namanbiresa
shinanmeekana iki,
netén tenaa ikenbi jatoki yameta iki.
Jaweti mawatamabora,
jaton rawibaon en amaa jato retekantiki.
Ea, Ibonra, jaskara en ati joi yoike”, akin.
10 ¡Jawe ireskiai nokon titá, ea pikoira mia bakena iki,
jatíbi nato netemeabo betan join iti, itan
reteanantiresa ea min pikoa iki!
Tsoabira jaribi banenoxon en koríki bichinama iki,
itan tsonribira jaribi baneti ea koríki bichinama iki,
jaskara ikenbira jatíxonbi ea jakonma inon ixon yoikanai.
11 Ibó, ja jakonma iti ea yoikanabo senenbanon,
jakonhakin en mia teexonama iketian,
ja rabintiain itan masá tenetiain ikanaitian
nokon rawibo akinnon ixon en mia yokatama iketian.
Israel masá tenemati Diossen yoia
12 Ibonra yoia iki: “¿Tsonki ati iki
norteorikea jaton rawí beaibaon jan amisti hierro betan bronce ras akin?
13 Israelbo, jatíbi maton ochabo kopíra,
maton icha jakon jawéki itan maton kopí
jawékibo maton rawibo en meniai,
jatíbi ja maton main mato jayatabo,
en meniara kopímabi bokanti iki.
14 Maton onanama mainkora,
maton rawibaon yankabires yonoti en mato imati iki,
keyomis tirí ikai keskatira nokon kikinbires siná ketéke”, ikira iká iki.
15 Ibó, jatíbira min onanke,
¡Ea shinanwe itan ea akinni jowé!
¡Jakónmaanoxon ea chibanaibo ea kopíxonwe!
Jabaon ea akaitian jaweayamakin, ea retekanai kaman jato oinresshamawe;
oinwe, mia kopi eki jakonmai yoyo ikankenbira en teneresai.
16 Ea min yoyo anontianra, min joi en akonkin ninkata iki;
janra ea jakonshaman, itan nokon shinan meran raroshaman ea imaa iki,
jaskatira ea mina iki,
miara Ibo itan jatíbi atipana Dios iki.
17 Jawe ayamai rarotibichores shinannaibo betanra ea tsinkitama iki;
min ea iboanontian peokootaxa,
eabichobiribi jaa iki,
jaskara ikenra jaki mia sinatai ochakiribi ea sinata iki.
18 ¿Jawekopíki nokon chexá jawetianbi keyóyamai?
¿Jawekopíki nokon xaté moa raontima iki,
jatíbiakin raonnabiki moa benxotima iki?
Nokonara mia jain onpax baitai tae keska iki,
wetsatian onpax jaax itan wetsatian yamai iki.
Ibon yoishokoa
19 Jatianra Ibon ea yoia iki:
“Mia eki joribaketianra en mia biribati iki,
jatianra min ea tee axonti iki.
Moa iresbiresi yoyo iamakin,
ikon jawékibores yoiai ikaxa,
ea yoyo ixonai mia iti iki.
Jabaonra min yoia ninkáti iki,
jabaon yoiaira min ninkátima iki.
20 Nato jonibaonara, bronce chiké keská en mia imati iki,
tsonbi jatoarestima.
Miibetanra reteanankanra,
miaareskantima iki,
míibetan ixonra mia akinhanan,
en mia xabaati iki.
Ea, Ibonra, jaskara anoxon yoike.
21 Jakonmabaon koshinkoniara en mia xabaati iki,
¡Sináxon ishton jakonma akaiboibakeara en mia píkoti iki!” akinra aká iki.