Oi beyamaitian kikinni choshia
14
Jawékibo choshiaitianra, Ibon Jeremías, yoia iki:2 “Judá jonibora onisi winiai,
ja jemamea jonibora onitsapikin meskó shinanni ikanai,
jonibora main tipiabo ikanai.
Shinan meran chexakaatira Jerusalén jonibo saí ikanai.
3 Icha jawékia jonibaonra jaton yonotibo onpax biti jato raanke;
jabora jain onpax atinko bokanke, ixonbira nokoyamakanke,
jaweomara jaton chomo bekanai,
ja bikasaira biamakanke,
itan kikinni rabinnaxa,
mapota ikanai.
4 Wain teetaibaonra ja bikasai biamakanke,
itan rabini mapotara ikanai,
oi yamaax
mai chorish iketian,
5 nii meranoa chaxobaonra pikó benabi,
jaton bakebo jeneke,
jaskara ikenra ja piti xobi yamake.
6 Tsoa jonibi jain jaama mai matokanra,
inaatima asnobo chankáke;
jainxonra chacal yoinabaon akai keskáakin koshin niwe joinnai;
jaskara ikenra ja piti pasto yamaketian
jawen bero koinnai”, ikira iká iki.
Jonibo kopí profetanin Ibo orana
7 ¡Ibó, non ochabo akátoninbi noa jakonmaakin yoiainbi,
min jane jakon ninkakaamawe!
Ichabiresira noa miibetan senenma iká iki,
noara miki ochaa iki.
8 Israelbora mion manata iki,
atikoma nete nokoketianra min noa xabaai,
¿Jawekeskatiki wetsankonia joni joax ikai
keskatires nato main mia ikai, westíora joni ochó kaai yamébichores ikai keskati?
9 ¿Jawekopíki joni moa shinan ramita keska ikáx,
westiora reteananti onan jonin jato akinti atipanyamaa keská mia ikai?
Ikaxbi, Ibó, miara noo xaran iki,
jatíxonbira onankanke noara min jonibo iki;
¡Noa jeneyamawe!
10 Ibora Israel jonibo yoii neskata iki: “Nato jonibora eki yoiti ititianbi jaton keena keskáres akanai, jatíbitian wetsankobo boantantinin keenra ikana iki. Jakopíra jakonshamanhakin en jato oinyamai. Ramara jaton ocha akábo shinanxon en jato shinanmai, itan jaweati maton jaskarabo akárin ixon en mato yokáti iki”, akinra aká iki.
11 Ibonra ea yoia iki: “Nato jonibo jakonti kopí, yokákin ea teayamawe.
12 Ichabiresakin ayunanxon maton ea yokákenbira, en mato ninkáxonyamai; ichabiresakin yoinabo jatiobi keyokin maton ea menoxonkenbi itan baná berobo maton ea bexonkenbira, jakonhaxon en mato oinyamai. Reteanantinin, itan pitin imaxon, jakonma isin en mato keyomati iki”, akin.
13 Jatianra en kenwina iki: “Ikaxbi, oinwe, Ibó; profetabaonra jonibo yoiai moa reteananti yamati, pitin itimaribi, itan jawe iamai jakonshamanres basibires nato neno min jato imati”, akinra en aká iki.
14 Jatianra Ibon ea yoia iki: “Profetabora nokon janenko jaskara yoii jansokanai. Enra jato raanama iki, enra jato jaskáti yoiama iki, jabo betanra ea yoyo ikama iki. Ja yoikanaibora ikonma iki, namákeska meran oinnara ikonma iki, jaton janso shinanbira yoikanai. Jaskara ikonma jawekira profetabaon yoia iki.
15 Jaskara ikenra, ea Ibo ja profetabo yoii ikai, en jato raanamabira nokon janenko yoyo ikasi ikana iki, jatianra yoikanai, reteanantibi, itan pitin itibira nato main yamai ixon: ja profetabora reteanantinin, itan pitin jato reteti iki.
16 Jato jaskáakin yoiai joniboribira, reteanantiain itan jawékiatinin mawati iki, jaton awinbo jaton benbo bakebo itan bake ainboboribi. Ja mawá yorabora Jerusalén jema callebaon potakanti iki, jatianra tsoabi jan jato miinti yamati iki. Jaskáaxonra jaton jakonma aká en kopíamati iki.
17 Jonibo jato neskara yoiwe:
‘Yaméyabi, neténra winii,
jatíbitian jenekantima iki,
nokon jonibo kikin rabintibires winota kopí,
ja xatekan imaara yosmashoko ikanti iki.
18 Xabain pikóxonra, reteanantiainoax
mawátabaon yorabo kikin icha en oinna iki;
jeman jikixon en oinnara,
jonibo pitin mawataibo kikin icha iká iki.
Profetabo, itan sacerdotebobira jaton onanama mainko bokanai’ ”, ikira iká iki.
Profeta Jeremíassen Ibo yoia
19 Ibó, ¿Judáki ikoni moa mia jaon keenyamaa iki?
¿Jerusalén jemamea joniboki moa min omisa iki?
¿Jaweatiki raontimaakin min noa xatea iki?
Jawékia itin noa manatabira,
jawe jakon jawékibi noki nokoyamaa iki.
Benxotininra noa manata iki.
Ikaxbira onsá jawékibores jake.
20 Non jakonma akára non onanke, Ibó,
itan ja non rekénbaon ocha aká iboa kopíra;
noa miki ocha iki.
21 ¡Min jakon jane kopí, noa omisshamawe;
jain min pené yakati iketian
ja jemamea jonibo iresabires imayamawe!
¡Ja senenhabekonti joi min noobetan aní shinanwe, ja senenhakashamai iamawe!
22 ¿Jakia ja ikon Dios onanmabaon jatonbi aká ja
ikonma diossen ja rabikanaiton oi bemai?
¿Akiai naikan janbi oi bemakin?
¡Ikáma, non Ibo Diossé!
¡Jan bemaira mia iki,
Mia riki jatíbi neskarabo akai;
jakopíra mion noa manatai!