2 “Nokon xobo xepikotinko chankáxon jato joi yoiwe: jatíbi Judá jonibo, jatíbi nato xepikotinko ea rabii weitaibo, nato joi ninkakanwe,

3 ninkákanwe, jara jatíbi atipana Ibo, Israelnin Dios iki: ‘Maton tee akaibo itan maton ikábo benxoaboreskanwe, jatianra nato main en mato jamaboresti iki.

4 Parankin mato yoii neskataibo ikonhayamakanwe: ¡Neno riki Ibon xobo, neno riki Ibon xobo! iki ikaibo.

5 Itiki maton ikábo, itan maton tee akaibo mato jakoni, itan itikeskatibi jakon wetsabo betan mato ikí;

6 jainoax wetsankoniax joa jonibo, kachianabo, benomaatabo moa jato ramiayamakin, itan jakonma akáma ikenbi nenonxon moa jato reteyamakin, jainxon matonbinix jan ramíti wetsa diosbo moa rabikin jenekin,

7 jatianra ja maton reken papabo jatíbitian nato main janon ixon en jato meniainko, en mato jamaboresti iki.

8 Ninkakanwe. Matora janso joiboki koshiai mato jawebi akinyamainbi.

9 Matora yometsoai, retemisai, wanoyanixbi teamisai, ikonma ikenbira jansoi mato ikon riki ikai, matonra Baal incienso ininti menoxonai, mato onannama diosbora maton rabiai,

10 jaskara ikaxbira ea iboamakana xobonko mato ebebon joai. Jainoaxa ea jawebi winóyamai ixonra mato shinannai; ja en teneyamai jakonma jawékibo aborestira maton shinanai.

11 ¿Jabaonkayaki shinanai ea iboamakana nokon xobo yometsobaon kini keskáakin ati? Jatíbi nato jawékibora en oinke. Ea, Ibonbira, onantiakin yoike.

12 Nokon xobonko Siló ikain katanwe, jara jain iti reken japari en katota iki, itan oinkanwe nokon joni Israelbo jaton jakonma aká kopí en aká.

13 Aribaxonbi aríbakin akinra en maton ikábo yoia iki, eki yoiti itinra mato keenyamaa iki, itan jawebira maton ea yoiamaa iki. Ea, Ibonra, onantiakin en yoike.

14 Jakopíra, ja Silonkonia xobo aká keskaribiakin, ja ea iboamakana xobo en akai, jara en mato menia iká iki, jainoax maton rekenboribira en menia iká iki, jakira mato ikoni koshiai iki.

15 Ebebonmeara moa en mato potati iki, ja Efraínman chiní bakebo maton wetsabo, moatian en aní keskáribiakin’.

16 Mia, Jeremíassen, nato jonibo kopí oranyamawe, jato kopi yokákin ea teayamawe, enra mia ninkáxontima iki.

17 ¿Minki oinyamai Judá jemanko itan Jerusalén callenko neskara jawékibo akanai?

18 Bakebaonra karo tsinkiai, papabaon chii keteara tiritai, jainxon ainbobaonra harina torta ati meinnai jaskáxonra diossa menikanai jawen jane naikanmea reina. Jaskáribiaxonbira wetsa diosbores uva xeati menikin ea sinámakanai.

19 Ikaxbi ea jakonma shinanmakaskinbira jatonbinix jakonmakanai, jaskatira jatonbinix rabinkanai. Ea, Ibonra onantiakin yoike.

20 Jakopíra ea Ibon, ikonshaman yoiai, nato neno iká jonibokira nokon siná en jatoki pakeai, yoinaboki, niiboki, waiboki itan baná bero tsekatiboki. Chii tiri keská ikaxa nokatima iki”, ikira iká iki.

21 Jatíbi atipana Ibo, Israelbaon Diossa, jonibo akí neskata iki: “Jatíbi yoinabo menikin jatiobi keyokin menokanwe jainxon yoinabo menokin jatíribi bixon ja nami pikanwe.

22 Ikaxbira maton rekenbo Egiptonkonia en pikonontian, jaskáakin keyokin yoinabo menoti itan jaskáakin yoina keyokin menotimabo jawebi en jato yoiamaa iki.

23 Ikaxbira neskarares en mato yoia iki, nokon joi ea ninkáxonkanon ixon; jaskara ikenra Dios ea iti iki, jaskataxa nokon jonibo mato iti iki. Itan en jato jaskara iti yoia keskati ikanti, jaskatax jakon ikantira iká iki.

24 Ikaxbi eki yoitimakin jawebi ea ninkáxonkashamakana iki, jaskáyamakinra ikonbires yoitima ikax jaton shinan jakonma ixon jakonmaori jato boá iki. Ea rabititianbira eki jakonmai yoyo ikana iki.

25 Reken papabo Egiptonkoniax pikonontianbira ramakamanbi en mato chibanmakin en mato raana iki jatíbi mato nokon yonoti profetabo.

26 Ikaxbira mato eki yoitimakin jawebi maton ea ninkáxonkashamaa iki, jaskara ikaxa maton reken papabo iní winobainbires ikax mato kikinbires chorishbo iká iki.

27 Jeremías, mia ninkáyamakanabi, jatíbi jawéki jato yoiwe, mia jen ayamakanabi saí iwe.

28 Jato yoiwe: ‘Nato mainmeabora jaton Ibo Dioski yoitimaibo iki, jaton jakonmabo yoixontinra keenyamakanai. Matonra akonbireskin jenea iki, mato betan jaskara ati en shinanna joira maton senenhayama iki’ ”, ikira iká iki.

29 ¡Jerusalén jonibó, maton masá shinanai onanti inon ixon maxkoroxon maton boo potakanwe! ¡Tsoa jonibi jain jayamai matokameax onisi bewakanwe! Jaskara ikenra Ibo maton joniboki sinata iki. Jaskatira jaton keenyamaa iki itan jato jenea iki.

30 Ibonra onantiakin yoia iki: “Ikonbiresi ea keenyamai jawékira Judá jonibaon ake: Ea iboamakana rabiti xobonkora ea keenyamai ja rabiti aká jawékibo maton ake, ja meké jawékira maton ramiake.

31 Mai teshanpa Ben-hinomhain Tófelhain makan tsamanxonkanara iká iki, jain jaton benbo bakebo itan ainbo bakebo perakanxon menoti akanara iká iki, jaskara akanon ixonra en jato yoiama iki, enra jaskara shinanamabobi iká iki.

32 Jakopíra eabi, Ibo ixon, onantiakin en yoike ja nete nokóketianra moa janeyamanox ikanai Tófel, akin itan Ben-hinon akin, jainoax reteanankana teshanpa akinra rama janenox ikanai ja Ben-hinon teshanpa. Jatianra mawábo jain miinti yamaketian Tófelhain miinkanti iki.

33 Ja mawata jonibaon yorabora pimis tetébo betan yoina sinábaon piaitian tsonbi ibintima iki.

34 Enra ati iki Jerusalén callenko itan Judá jemanko fiesta akí bewatibo, raroi bewatibo itan wanoi bewatibo keyokin, jatíbi mainkora tsoa jonibi jain jatima iti iki”, ikira iká iki.