Israelbo yoitimaa
6
16 Ibonra jawen jonibo yoia iki:“Baibotiibi chankáxon oinkanwe,
yokákakanwe moatian jakátiai keskáki mato jati iki ixon,
bebon jakon axonra;
maton jakon nokoti iki”, akin;
Ikaxbi jabora neskata iki:
“Noara min yoia keskati jayamai”, iki.
17 Jatianra Ibon, jato koiranti sontárobo imaxon,
jawen jonibo yoia iki:
“Ja onsá ikai onanti en mato axona tsararan ikaitian ninkákanwe”, akinbo.
Ikaxbira jonibo neskata iki:
“Yoiti itinra noa keenyamai”, ikibo.
18 Jaskara ikenra Ibon yoia iki:
“Maibotiibixon, ninkakanwe,
jaskara nokon jonibo winoti kaai onankanwe.
19 Ninkáwe, maiká:
Enbira joniboki jakonma jawéki bemai
jakonmabires anoxon shinankana kopí;
nokon joi jawebi ninkákashamakana iken,
itan nokon esé omiskana kopí.
20 ¿Jaweatiki Sabáinoa incienso, itan
ja ochó mainmea inín jiwibo maton ea bexonai?
Ja yoinabo retexon maton keyokin menoatoninra ea raroyamai,
wetsa yoinabo maton ea retexonaitoninribira ea keenyamai”, ikira iká iki.
21 Jakopíra, Ibo neskata iki:
“En amaara maton rawíbaon reteanankin matoareskanti iki.
Papabo itan bakebo, jato patax ikábo, itan jato
jabé raenanaibora jatíbi mawákanti iki”, ikira iká iki.
Norteorixon peoxon Israelbo mai bichinkaskana
22 Ibonra yoia iki:
Ninkakanwe. “Kikinbires koshi sontárobora ochó mainmeax
norteorikeax benox benxokaakanai.
23 Jabora kanóti, itan espada tsomáyabo moa ikanai;
jabora jato ramiaibo iki, noibamismabo;
ja koshín saí ikanara iká iki aniparo xoo ikai keská,
jatianra kabáyonin peyakaaxbo bokanai.
Moa Jerusalén jonibo betan reteanantiresa ikanai”, akin.
24 Jatianra Jerusalén jonibo neskákana iki:
“Nokira joi nokóke, jatianra
kikínbiresi raketi noa koshi keyoke,
noara onisi chexakatai
ainbo bakeni ikai keskati.
25 ¡Xabain boyamakanwe,
bainkoboribi niamakanwe!
¡Non rawíbora moa amistires ikanai;
jatíbiainra onsá iki!” ikibo.
26 ¡Nokon jonibo chexakaati oniskin, xaxa chopa sawekanwe,
chiimapon tarameekanwe,
onísti chopa saweax
chexakaati winikanwe.
Jabicho min bake mawáketian ikai keskati;
jaskara ikenra jan noa keyotibo
moa joti ochóma iki!
27 Ibonra ea yoia iki: “Enra mia yoiai nokon
jonibo min jato tananon ixon. Jaton ikabo, kikinhakin min jato onanti kopí”, akin.
28 Ibó, jatíbi jonibora, kikínbires yoitimabo iki;
ja jonibora jatoki jansokin joi yoiaibo iki, itan jaton shinan moa ramitabo iki;
bebonbires ramitabo ikaxa, jabo bronce betan yami keska iki.
29 Jan niwe xoon atin koshin,
chii xoon akára plomo charatai.
Jakonma akaibo yamatiakin imakasi itira yankabires iki.
30 Jaskara kopíra “plata tsimes”, akin, janekanti iki,
jaskákinra mia, Ibon, min jato potaa iki.