64
Nai chopetaanan mia jopainon riki,mia neno iketian ani mananbo shakónon ikax,
2 chiikan zarza moxaya jiwibo menoa keská,
iamax onpax kobinmai keskára mia iti iki.
Jatianra min rawíbaon min jane onanti iki,
jainoax maibotiibi iká jonibora
mii bebonmeax saki ikanti iki.
3 Non shinannama onsá jawékibo akáx,
mia joketianra,
mii bebonmeax ani mananbo shakota iki.
4 Jawetianbira non ninkatama iká iki,
itan non oinnamaribi iki,
mii pekáo wetsa dios jaxon,
jaki koshiaibo axonkin min aká keská,
jawékibo jan aká.
5 Raroshamaanan jakon akaibo, itan
mia keenai ati shinanaibora min biai.
Noa ochaketianra mia sináke;
mia non sinámaara moa basi iki.
6 Jatíbi noabora shinan kerás jonibo iki;
jatíbi jakon jawéki non akábora,
kikin kerás chopa pakex keská kerás iki;
jatikaxbira pei choshi ikai keskati noa paketa iki,
esekan yoiai non ayamakenra, niwen jawéki akai keskáakin noa boai.
7 Jan mia yokákin oranaira tsoabi yamake,
min akinnon ikaxa tsoabi koshiamai;
jaskákinra min noa jonéxona iki,
jainxonra non jakonma aká kopí min noa jenea iki.
8 Jaskara ikenbira, Ibó, mia non papa iki;
noara mapó keska iki, jan noa akaira mia iki;
¡Jatíbira miinshamanbi noa aká iki!
9 Ibó, iorai noki sináyamawe,
esekan yoiai non ayamaabo jatíbitian shinanyamawe.
¡Oinwe noara min jonibo iki!
10 Min jakon jemabora moa
tsoa jonibi jain jaama manan maibicho banéke,
Jerusalénra moa jakonmaayonkana iki,
moa ras akana riki.
11 Non kikin xobo penébires,
non papabaon jainxon mia rabikatikanaira,
chiikan menoxon moa ras aka iki.
¡Jatíbi iorai noa jan keenaira
moa ras akana iki!
12 Ibó, jatian jatíbi neskarabo ikenbiki,
¿Min jawebi atima iki?
¿Jawe iamaiki mia netéresti iki,
jatianki kikinhakin min noa
namanbires shinanmeemati iki?