Yoitimataibo jakonma aká Ibon yoixona
65
Ibonra yoia iki:“Jan ea jawebi yokatamabora eiba bekana iki;
jan ea benaamabaonra ea nokoa iki.
Jan ea kenaama jonibora en yoia iki:
‘Eara neno iki, akin’.
2 Aabaikinra nokon meken en sanana iki,
yoitima jonibo, jakonmabires shinanni jaabo,
areskin jaton shinanbiribi akí jaabo, jato akinkasira ea iká iki;
3 ja jonibaonra beibaxon, onantibiresakin
jatíbitian ea ramiakin sinámakana iki;
joa baná ikainxonbora diosbo
axonkin yoina retexonkana iki,
jaskara ati ladrillo tsamana ikainxonbora
incienso ininti menoxonkana iki;
4 mawá miinkana xaranbora yakákana iki,
jainoax yamébora wetsankobo joneta ikana iki;
kochi namibo pikinra,
jaton kentíbaon ja jene kerás bochoakana iki.
5 Jabora neskata iki: ‘Jainbi iwé, ea tii ayamawe;
min ea menitibira ea kikinbires iresama iki’.
Ja jonibora neten iibaiti chii tiritai keskábo iki;
chii koinman rekinki aká keskáakinra en jakonma teneai”, ikira iká iki.
Bená nai itan bená mai
17 Ibonra yoia iki: “Oinkanwe,
bená nai itan bená maira en jonianoxiki.
Ja moa en aká winotara tsonbi
jaakin jakiribi shinantima iki.
18 Ja en joniati iketian, jatíbitian
kikin raro itan beneshaman ikanwe,
Enra jan rarotishaman
Jerusalén jonianoxiki,
jain jaa jonibora raroshaman ikanti iki.
19 Eabira Jerusalén kopí raroti iki, itan
nokon jonibo kopíra en beneshaman shinanti iki.
Jainra masá tenei winikanai,
saí ikanaibo jakiribi moa ninkátima iti iki.
20 Jainra bakeshokobo pikota pekáo
ichama neteya mawáti yamati iki,
yosiboribira jatio basi jati senenhamabi mawáti yamati iki.
Pacha baritiayanix mawátira,
bakeranonpari ikaxbi mawata keská iti iki,
jatian pacha baritia nokoyamaara jaki jakonma nokota iti iki.
21 Jonibora xoboax jain jakanti iki,
uva jiwi banaxonra jawen bimi kokokanti iki.
22 Wetsan xoboaketianra wetsares jain jatima iki, jainxon
westíora jonin banaketianra wetsanbires jawékiatima iki.
Nokon jonibora icha baritia jati iki,
westiora jiwi jaaitio basi;
en katota jonibaonra jaton mekenman
teexon noeshamanbo jawékiakanti iki.
23 Yankabiresa teekantima iki,
ja iti senenamatianbira jaton bakebo mawátima iki,
ja Ibon jato jakon
shinanxonabaon chiní bakebo ikáx,
jainoax jabaon chiní bakebora jaskáribi ikanti iki.
24 Jabaon ea kenaamatianbira,
en jato ninkáti iki,
jabo yoyo iki senenamatianbira moa jato en ninkáti iki.
25 Pimis yoina itan carnerora pii jainrabebires iti iki,
leónmanra waka benen akai
keskáakin xobi piti iki,
rononra mai jawékiati iki.
Nokon kikin jakon jatíbi mananmanra
jakonma akai tsoabi yamati iki”, akinra aká iki.
Ibonra jaskara yoike.