Diossen jawen rawíbo masá tenemai
63
Wetsanra yokata iki:—¿Edomhainoa ani jema, Bosráinoax,
joshinman pokoa chopa sawéya,
kikin jakonni raota,
jawen nia koshishaman onsábires ja joaiki tsoa iki? —akin.
Ea riki, enra jatoareskanti jato yoiai,
eara jato kishpinmati koshia iki.
2 ¿Jawekopíki min sawea chopa,
uva jamata keská joshin iki?
3 Eabichora uva jamati jaon penita iki,
tsonbira ea akinyamaa iki;
kikinni sináxonra nokon rawíbo en jamata iki,
bebonbires sinátax jaton peníxonra en jato jatoaresa iki,
jatianra jaton jimi nokon chopaki chaxata iki,
jaskáxonra jatíbi nokon chopa kerásaa iki.
4 Wetsa netén atikeskabiakin
non rawíbo atira en moa shinanna iki;
jatian nokon jonibo en jato
xabaatira senenti iki.
5 En oinnara, tsonbi ea akinti yama iká iki;
jan ea akinti tsoabi yamaketianra ea rateta iki.
Nokon ponyaman akinnara en jatoaresa iki,
itan kikini sinatatonra ea akinna iki.
6 Kikini sináxonra maibotiibi iká
jonibo en jatoaresa iki,
bebonbires sináxonra en jato ras aka iki,
jaton jimira main en baimaa iki.
Diossen Israel noibaa
7 Ibon noiara en mato yoikasai,
jatíbi jan noa axona iketianra já rabii ea bewakasai,
Israelnin rarebobo aniakin noiba iketian,
noibamis ixon, itan kikinbires noimis ixon aká iketian.
8 Janra yoia iki: “Jabora nokon jonibo iki,
ja bakebaonra ea parantima iki”, akin.
Jaskáaxonra jan jato xabaa iki.
9 Jatíbi jaton masá teneainoa.
Wetsabo raanxonra ayamaa iki jato xabaakin;
Ibonbira jato aká iki.
Janra jato jokonmainoa pikoa iki, noimis itan akinmisti shinanya ixon,
jatora wenina iki, itan jatora ikota iki.
Jatíbitianra jaskara aká iki.
10 Ikaxbira Iboki yoitimakana iki,
jaskáxonra kikin jakon ikenbi sinámakana iki;
jatianra moa jaton rawí banetax,
jato betan reteanana iki.
11 Jabaonra ja moatian ikánibo, itan
Moiséssen jaskáaxon jawen jonibo xabaani shinannax yokákaakana iki:
“¿Dioski jawerano iki,
ja Moisés israelitabaon koshi,
jan Nilo paro shitamani?
¿Jaweranokayarin ja Moisés meran jawen jakon shinan jan aní,
12 ja jawen kikin atipana koshi Moisés betan imani,
jawen jonibo bebon jan aniparo napónbekon chopeni, jatíbitianbires ninkakaatai inoxon,
13 jan jato aniparo chichó rainsh imayamakin jato winómani,
tsoa jonibi jain jaama mananman kabayobo winotai keskáakin jato imani,
14 wakabo mai teshanpain ipakeai
keskáakin jan jato imaniki jawerano iki?”
Ibon shinanmanra jato boa iki.
Jaskáaxonra jawen jonibo jato boa iki,
jaskataxa ninkakaatai, itan
kikin jakon yoikanai iti nokoa iki.
Akinnon ixon Isaíassen Dios orana
15 Ibó, naikanxonbi oinwe,
kikinbires jakonshaman, itan penébires
mia jain jaa ikáinxonbi oinwe.
¿Min ani noimisti shinan,
itan min koshiki jawerano iki?
¿Min onísamisti shinanki jawerano iki?
¿Noa noibati min shinanki moa keyota?
16 ¡Miara non papa iki!
Abrahamman noa onankashamaabi, itan
Israelninribi noaakin shinanyamaibira,
Ibó, mia non papa iki;
mia riki jatíbitian, kopíaxon jakiribi noa jan biai.
17 ¿Ibó, jaweatiki non keena keskares akí janon ixon,
miki rakéyamai non jointi chorish
iketian noa yoitimanon ixon min noa imai?
Min yonotibo noia kopí itan min katota jonibo noixon,
moa wetsaresibi shinanya noa imawe.
18 ¡Basimara min jakon jonibo mai ibo ikana iki!
Non rawíbaonra mia rabiti xobo, jaon peníxon jamayonkana iki.
19 Mia non koshi ixonbi, jawetianbi
min ikinama keská riki noa,
noara jawetianbi min joni ikáma keská iká iki.