Jatíbitian noimis Dios
54
Bakeaisma itan bakeoma ainbo, raroi sion ireswe;mia bakeaisma koshin bewawe,
jaskara ikenra Ibo neskata iki:
“Ja potaa ainbora, benoya ainbo bebonbires bake ichaya iti iki”, akinra aká iki.
2 Min peota aniawe,
mia ja naman jaa pepan rakéyamakin peanwe,
risbibo nenkeakin pontenwe,
ja jiwi nichinabo kikinhakin tasawe,
3 mekayao itan mexkaora pextin mai min biti iki;
min chiní bakebaonra icha mai jato bichinti iki,
ramatian tsoa jonibi jain jaama
mainkobora jemaabotankanti iki.
4 Rakéyamakanwe, matora osankanai itima iki;
matokira shirokantima iki,
jawebi mato rabintira yamati iki.
Xontakotian rabinkatitaibora mato shinanbenoti iki,
benomaatax atikoma jakonma ikábora moa maton shinantima iki,
5 jaskara ikenra jan mia joniatonin awinhakin mia biti iki.
Jawen jane riki jatíbi atipana Ibo,
jan mia kopí kopiaxon jakiribi mia biara Israelnin Jakon Dios iki,
jatiobi main Dios.
6 Westíora xontako awinhaxonbi potakana keská itan tsokasara mia iká iki,
ikaxbira min Diossen jakiribi mia kenaa iki,
jainxonra mia yoiai:
7 “Jawetio basishokoresa en mia jenea iki,
ikaxbira anibires noibamis ixonra
ebetan mia jakiribi biananamati iki.
8 Ishtonbires sinataton imaara,
jawetio basishokores,
min ointimai ea joneta iki,
ikaxbira jatíbitian noimisti shinanman en mia noibaa iki”.
Mia kopí kopiaxon jakiribi mia bia Ibonra yoiai:
9 “Moa jenen ewan mai
mapowetsatima akonkin
pontekin en Noé yoini keskáakinra
rama en mia akonkin pontekin yoiai,
mikira ea sináwetsatima iki,
mia jakiribi masá tenemakasira ea itima iki.
10 Ani mananbo wetsanko taxkékenbi itan
maxko mananbo reokookenbira en mia noia shinan
wetsayamai, miibetan jakon tantishaman
iti, itan en mibé senenhati shinanara jatíbitian iti iki.
Mion masá shinanai, Ibonra jaskara yoike”, akin.
Bená Jerusalén
11 ¡Jerusalénra jakonma winota jema iki,
niweaba koshín ramiayona riki,
jan tanti shinan bimatira tsoabi yamake!
Ninkakanwe. Min makánbora kikin wisoshaman
makan azabache pekaten en tsamanti iki,
mai meran iká jan xobo tewantira
makan zafiroki en ati iki,
12 min torrebora rubí makánbaon aká iti iki,
itan xepótibora berilo makanbaon aká iti iki,
jatíbi min chikébora metsá makánbaon aká iti iki.
13 Min bakebora en onanmati iki;
jabora jatíbi kikin jakon ikanti iki.
14 Atikeskabiakin min jakon akátoninra mia koshiati iki,
tsonbira mia masá tenematima iki,
jatianra mia rakétima iki,
kikinbiresi rakétininra mia jakonma jakiribi shinanmatima iki.
15 Ja miibetan reteananaibora,
en jato raana itima iki,
ikaxbi jan mia akaibora min jatoaresti iki.
16 “Oinwe, ja yamin teetaira en jonia iki,
janra chii ketéai itan icha jan reteananti jawékibo akai;
enbira ras amis joni jonia iki, jan jato ras ati;
17 ikaxbi jan mia ras ati jawékira tsonbi akáma iki.
Jatíbi jan min jakonma aká yoiaibora min jato netémati iki.
Ja ea akinnabo en jato meniti riki:
Wetsabo jatoareskanti”.
Jan akonkin jaskara ati yoiaira Ibo iki.